Śviatłana Šacilina patłumačyła, čamu pakinuła pasadu kiraŭnicy Misii demsił Biełarusi va Ukrainie
«Ja zvykła abo być efiektyŭnaj, abo nie marnavać čas».
Śviatłana Šacilina pakinuła pasadu kiraŭnicy Misii demakratyčnych sił Biełarusi va Ukrainie. Jana prapracavała na hetym kirunku 11 miesiacaŭ, adnak, pavodle jaje słoŭ, tak i nie zmahła damovicca z Ofisam Śviatłany Cichanoŭskaj i Abjadnanym pierachodnym kabinietam nakont taho, jak mienavita pavinna pracavać misija.
U razmovie z «Našaj Nivaj» Śviatłana Šacilina kaža:
«Mnie padajecca, što 11 miesiacaŭ — dastatkovy čas, kab zrazumieć, ci adpaviadaje praca tvaim pryncypam. Ja zvykła pracavać na vynik, a dla hetaha pavinny isnavać peŭnyja pracesy. Majo bačańnie taho, jak misija musić pracavać u jakaści pradstaŭnictva Ofisa, i bačańnie Ofisa krychu adroźnivalisia. Tamu dla mianie heta było absalutna śviadomaje i pravilnaje rašeńnie».
«Historyja z synam nijak nie źviazanaja z majoj adstaŭkaj»
Publična raskryvać usie detali roznahałośsiaŭ byłaja kiraŭnica misii nie choča. Pavodle jaje, isnujuć dakumienty i damoŭlenaści, razhałošvańnie jakich moža paškodzić ahulnaj spravie. Adnak sutnaść kanfliktu jana akreślivaje davoli jasna: baki pa-roznamu bačyli status misii i jaje miesca ŭ sistemie demakratyčnych sił.
Śviatłana Šacilina chacieła, kab pradstaŭnictva ŭ Kijevie pracavała jak paŭnavartasnaja palityčnaja struktura, faktyčna jak budučaja biełaruskaja ambasada:
«Stratehična ŭsie razumieli, što ŭkrainski kirunak treba raźvivać. Ale adroźnivalisia padychody. Majo bačańnie było takim: misija — heta pradstaŭnictva, umoŭnaja protaambasada. Na žal, za hety čas mnie nie ŭdałosia damahčysia, kab takoje ž bačańnie było i ŭ Ofisa».
«Ja zvykła abo być efiektyŭnaj, abo nie marnavać daremna ni svoj čas, ni čas inšych», — dadaje jana.
Samu adstaŭku Šacilina nazyvaje narmalnym demakratyčnym instrumientam:
«Heta narmalny sposab palityčna zajavić, što ty nie zhodnaja z peŭnymi pracesami. Ja heta zrabiła».
Apošnim časam imia Šacilinaj zhadvałasia ŭ miedyja i ŭ suviazi z kryminalnaj spravaj suprać jaje syna Mikity Šacilina. Adnak byłaja kiraŭnica misii admaŭlaje, što hetaja historyja mahła paŭpłyvać na jaje adstaŭku abo pracu va Ukrainie:
«Heta nijak nie źviazana. Tak, u dačynieńni da majho syna raspačataja kryminalnaja sprava. Ale ciapier jon pracuje ź vieteranami. Jon byŭ uznaharodžany, dvojčy vajavaŭ: jašče ŭ ATA, a potym u 2022—2023 hadach. Z boku ŭkrainskich uładaŭ ja ni ad kaho nie pačuła, kab hetaja situacyja mieła choć niejkaje značeńnie dla majoj pracy».
Što paśpieła zrabić za 11 miesiacaŭ
Śviatłana Šacilina kaža, što pakidaje paśla siabie ŭžo farmalizavanuju strukturu: u misii jość pamiaškańnie, jurydyčnaje afarmleńnie i bankaŭski rachunak.
Adnym z hałoŭnych vynikaŭ jana ličyć sistematyzacyju prablem, ź jakimi sutykajucca biełarusy va Ukrainie. Siarod ich — lehalizacyja, praterminavanyja biełaruskija pašparty, ciažkaści z adkryćciom i vykarystańniem bankaŭskich rachunkaŭ.
Pašpartnaje pytańnie asabliva abvastryłasia paśla taho, jak u 2023 hodzie biełaruskija ŭłady faktyčna pazbavili biełarusaŭ za miažoj mahčymaści abmieńvać dakumienty ŭ konsulstvach. Va Ukrainie, jakaja paśla rasijskaha ŭvarvańnia ŭviała dadatkovyja abmiežavańni dla hramadzian Biełarusi, heta stała pahražać ludziam strataj lehalnaha statusu.
Pavodle Šacilinaj, misija źbirała infarmacyju pra takija vypadki i viała pierapisku z ukrainskimi orhanami, a taksama padrychtavała prapanovy nakont mahčymych rašeńniaŭ. Rabiłasia heta razam z pradstaŭnikami biełaruskaj dyjaspary:
«Dla dobraachvotnikaŭ pytańnie praterminavanych pašpartoŭ užo vyrašana, ale dla bolšaści cyvilnych biełarusaŭ — nie. My zdoleli nie tolki apisać prablemy, ale i prajaśnić ich va ŭkrainskich uładaŭ, prapanavać svajo bačańnie vyrašeńnia.
Akramia taho, misija ŭdzielničała ŭ padrychtoŭcy vizitu Śviatłany Cichanoŭskaj u Kijeŭ, pravodziła stratehičnyja siesii ź biełarusami va Ukrainie i sprabavała naładzić dyjałoh pamiž roznymi častkami dyjaspary. Pačałasia i praca z ukrainskimi dziaržaŭnymi dy hramadskimi arhanizacyjami, jakim my tłumačyli pazicyju biełaruskich demakratyčnych sił».
«Mahčyma, treba było bolš tłumačyć Ofisu»
Adnosiny pamiž aficyjnym Kijevam i demakratyčnymi siłami Biełarusi doŭhi čas zastavalisia strymanymi. Adnak paśla vizitu Śviatłany Cichanoŭskaj va Ukrainu, ličyć Šacilina, u adnosinach adbylisia prykmietnyja źmieny:
«Hradus paciapleńnia ŭ staŭleńni da biełaruskich demakratyčnych sił adčuvajecca. Palityčnaja vola jość, ciapier treba, kab jana pieratvaryłasia ŭ administracyjnyja rašeńni. Heta i pytańnie lehalizacyi, i pryznańnie praterminavanych pašpartoŭ, i bankaŭskija rachunki, asabliva dla ludziej z časovymi paśviedčańniami. Praca tut tolki pačałasia».
Śviatłana Šacilina pryznaje: mahčyma, padčas svajoj pracy na pasadzie joj varta było bolš tłumačyć svajo bačańnie i peŭnyja rečy Ofisu:
«Kali ty ličyš niešta vidavočnym, to časam nie zaŭvažaješ, što dla inšaha boku heta moža być nie tak. Dla mianie było vidavočna, što Ukraina — adzin z asnoŭnych kirunkaŭ i što adpaviednym čynam pavinny być arhanizavanyja ŭsie kamunikacyi i pracesy».
Pry hetym całkam z palityčnaj pracy jana nie sychodzić. Śviatłana Šacilina zastajecca čalcom Kaardynacyjnaj rady i frakcyi «Abjadnanaja hramadzianskaja płatforma», dzie źbirajecca praciahvać zajmacca ŭ tym liku ŭkrainskim kirunkam.
Usie kantakty i padrychtavanyja dakumienty jana pakinuła misii. Pamočnica Šacilinaj taksama praciahvaje tam pracavać.
Biełarusy va Ukrainie pakul nie stali «adnym hołasam»
Adnoj z zadač, jakija byłoj kiraŭnicy tak i nie ŭdałosia vykanać całkam, stała abjadnańnie biełaruskaj dyjaspary. Zrešty, Šacilina prapanuje havaryć nie pra jaje raźjadnanaść, a pra «siehmientavanaść»:
«Heta peŭny etap rostu biełaruskaha hramadstva za miažoj. Jość ludzi, jakija dapamahali źbirać infarmacyju pra prablemy, rychtavać listy i prapanovy dla ŭkrainskaj dziaržavy. Ja im ščyra ŭdziačnaja za dapamohu. Ale jość i tyja, chto nie vielmi daviaraje palityčnym strukturam demakratyčnych sił».
Novaj kiraŭnicy misii Volzie Zazulinskaj Śviatłana Šacilina raić uličvać asablivaści krainy, jakaja žyvie va ŭmovach vajny, i damahacca taho, kab biełarusy vystupali pierad ukrainskimi ŭładami «adnym hołasam»:
«My ŭsie roznyja, ale ŭ peŭnych pytańniach pavinny być adzinym kułakom. Ukrainskija ŭłady musiać razumieć, što ŭ namahańniach abaranić intaresy biełarusaŭ my vystupajem adnym frontam. Dla hetaha dyjaspara pavinna daviarać misii, a misija — sapraŭdy prasoŭvać jaje prablemy. Mnie nie ŭdałosia davieści hety praces da kanca. Ciapier heta zadača nastupnaha kiraŭnika».
Ciapier čytajuć
«Ja supracoŭnik KDB, u vas buduć prablemy». Minčanka chacieła napisać skarhu ŭ optycy, ale supracoŭnica pakazała koračku19
Kamientary