«Nie tykaj mnie ŭ tvar palcam, a to ŭkušu» — «Nu kusaj!» A jana i ŭkusiła. Biełarusa pasadzili za žorstkaje źbićcio žonki ŭ Rasii

U rasijskim Ivanavie pasadzili hramadzianina Biełarusi Paŭła Siarhiejeva. Jaho pryznali vinavatym u naŭmysnym pryčynieńni ciažkaj škody zdaroŭju svajoj žoncy Lubovi. Siarhiejevu dali 5 hadoŭ, ale z ulikam raniejšych, jašče nie adbytych pakarańniaŭ kančatkovy termin skłaŭ 7 hadoŭ kałonii strohaha režymu.

Kanflikt pamiž Paŭłam i Luboŭju ŭźnik doma, kali jany pili harełku. U niejki momant Pavieł staŭ tykać žančynie palcam u tvar. Taja papiaredziła, što ŭkusić jaho, kali jon nie spynicca. «Nu kusaj!» — adkazaŭ mužčyna. I Luboŭ sapraŭdy ŭkusiła jaho za miezieniec levaj ruki.

Paśla ŭkusu Pavieł razzłavaŭsia i nakinuŭsia na žonku. Spačatku nanios joj try ŭdary rukoj u tvar, u nos, ad jakich Luboŭ upała na ziamlu. A paśla jašče dadaŭ piać udaraŭ nahami pa ciele i adzin udar nahoj u hałavu

U vyniku žančyna atrymała pierałom nosa, a taksama pierałomy dvuch rebraŭ źleva.

Pra zdareńnie ŭ palicyju paviedamiła ciotka paciarpiełaj — joj patelefanavała dačka Lubovi i paprasiła vyklikać palicejskich, bo sama zvanić bajałasia. Chutkuju dapamohu ž vyklikała sama dačka, kali maci, užo ŭ domie, paskardziłasia, što nie moža dychać, a na tvary ŭ toj źjaviłasia kroŭ. U balnicy žančynie pastavili drenaž u hrudnuju kletku, kab adpampavać kroŭ, jakaja sabrałasia ŭ lohkim, i jana prajšła kurs stacyjanarnaha lačeńnia.

U sudzie Pavieł pryznaŭ vinu tolki častkova: paćvierdziŭ, što biŭ žonku kułakom u tvar paśla ŭkusu, adnak admaŭlaŭ, što nanosiŭ udary nahami, spasyłajučysia na toje, što žančyna nibyta spatyknułasia ab paroh i ŭpała sama. Ale jamu nie pavieryli

Asabliva surovym termin atrymaŭsia z-za minułaha Paŭła. Raniej jon užo byŭ asudžany za naŭmysnaje pryčynieńnie ciažkaj škody zdaroŭju, jakoje ź nieaściarožnaści paciahnuła śmierć čałavieka — tady jamu dali amal 12 hadoŭ kałonii, ź jakich jon byŭ vyzvaleny ŭmoŭna-daterminova. Mienavita hetaja nieadbytaja sudzimaść stała padstavaj pryznać u jaho dziejańniach niebiaśpiečny recydyŭ. Aprača taho, na momant novaha prysudu jon jašče nie adbyŭ pakarańni pa dvuch inšych spravach — za prymianieńnie hvałtu da pradstaŭnika ŭłady (3 hady 4 miesiacy pazbaŭleńnia voli) i za chulihanstva (zamienienaje na 3 hady prymusovych rabot). Častkova skłaŭšy novaje pakarańnie z hetymi dvuma nieadbytymi terminami, sud i vyznačyŭ kančatkovyja 7 hadoŭ.

Da suda Siarhiejevu dazvolili być doma, ale paśla vyniasieńnia prysudu ŭziali pad vartu.

Sa słoŭ svajački, Pavieł i raniej nieadnojčy padymaŭ ruku na Luboŭ: taja pisała zajavy ŭ milicyju, ale paźniej zabirała ich, kali muž prasiŭ prabačeńnia.

Na stadyi śledstva Luboŭ patrabavała spahnać z muža kala $12 tysiač u jakaści kampiensacyi maralnaj škody, adnak užo ŭ sudzie admoviłasia ad hetaha pazovu. U apošnim słovie Pavieł jašče raz paprasiŭ u žonki prabačeńnia, i jana jaho pryniała — adnak daravać mužčynu nie zmahli jaje dzieci.

• 1
• 0
• 0
• 1
• 0
• 0
• 2
• 0