«Kvateru źniać ciapier — biez šancaŭ». Jak studenty zasialajucca ŭ minskija internaty
U kancy žniŭnia abstanoŭka kala studenckich internataŭ vyhladaje prykładna adnolkava: la ŭvachodu vyrastajuć barykady z valizak, sumki z rečami traščać pa švach, a baćki dajuć apošnija kaštoŭnyja nakazy pierad adpraŭkaj «ptušaniat» u samastojnaje žyćcio.
Žurnalisty Onliner vyrašyli pahladzieć na zasialeńnie ŭ Studenckuju viosku i novy internat BDUFK i daviedacca, jak heta — źmianić utulnuju baćkoŭskuju kvateru na studenckuju ramantyku.
«Staim u čarzie ŭžo dźvie hadziny»
Čarhu da ŭvachodu ŭ novy internat BDUFK na vulicy Viasiołkavaj, 25 vidać zdalok. Na pieršy pohlad, sabrałasia kala paŭsotni čałaviek.
Siońnia zasialajucca pieršakurśniki — tyja samyja ščaśliŭčyki, jakija stoadsotkava atrymajuć spalnaje miesca. Z druhoha kursa budzie składaniej — daviadziecca dobra vučycca, prajaŭlać aktyŭnaść — prosta tak, za pryhožyja studenckija vočy, internat užo nie daduć.
U natoŭpie niechta adrazu staić z valizkaj, a niechta pryjechaŭ z pustymi rukami — prosta atrymać pakoj, a ŭsie rečy pryvieźci paźniej, bieź mituśni. Čarha ruchajecca pavolna, ale stomlenaści na tvarach pieršakurśnikaŭ nie vidać: naadvarot, jany znajomiacca, žartujuć, dzielacca płanami na budučaje studenckaje žyćcio. Mnohija pryjechali z baćkami — u nieznajomym horadzie padtrymka lišniaj nie budzie.
Praces zasialeńnia raściahnuŭsia na niekalki dzion — zasialajuć pa fakultetach. Naprykład, učora pa klučy prychodzili budučyja mieniedžary ŭ sporcie, siońnia čarha dajšła da tych, chto abraŭ trenierskuju dziejnaść.
Pieršakurśniki padavali zajavy adrazu paśla pastupleńnia, a potym niervova manitoryli sajt univiersiteta ŭ čakańni śpisaŭ.
U chvaście čarhi Jeva i Lera. Dziaŭčaty pryjechali z Homiela: adna zajmajecca lohkaj atletykaj, druhaja — akademičnym viesłavańniem. Abiedźvie vučylisia ŭ adnym kłasie, pastupać vyrašyli taksama razam. Spadziajucca, što pašancuje zaniać dvuchmiesny pakoj.
Novy internat padzieleny na błoki: u kožnym jość svaja kuchnia i sanvuzieł. Pytańnie tolki ŭ tym, kolki budzie susiedziaŭ.
— Uvohule ja ŭžo znajšła sabie kvateru na Załatoj Horcy, u samym centry. Kaštavała tysiaču z kapiejkami — adnapakajoŭka z vydatnym ramontam. Kłasnaja! Ale ŭ internacie ŭsio ž lepš — usie razam. Kab była svaja tusoŭka. Paznajomicca z usimi chočacca, — kaža Jeva.
Safija, Lera i Klim. Dziaŭčaty pastupajuć na śpiecyjalnaść «spartyŭnaja psichałohija», Klim — na trenierskuju dziejnaść pa karate. Dla pastupleńnia ŭsim daviałosia zdavać spartyŭnyja narmatyvy, ale chłopcy i dziaŭčaty ścipła adznačajuć, što spravilisia biez asablivych prablem.
— Nie pastupić było strašna, dy i ciapier chvalavańnie jość, — pryznajecca Safija. — Čakać u čarzie davodzicca doŭha — ja tut užo kala dźviuch hadzin. Kažuć, pieršyja ludzi pryjechali siudy a siomaj ranicy. My ź Leraj pakul pryjechali biez rečaŭ — prosta prajści ŭsie pracedury. Vierniemsia dadomu i ŭžo z valizkami zasielimsia 30-ha.
Pakul astatnija prasoŭvajuć svaje sumki napierad usiaho na paru santymietraŭ, Maša ŭžo rychtujecca zajści ŭ budynak. Dziaŭčyna pryjechała z Červienia. Z 10‑ha kłasa jana maryła pastupić mienavita siudy. Jana surjozna zajmajecca lohkaj atletykaj — pastajanna jeździła na respublikanskija spabornictvy i zajmała pryzavyja miescy (da pieršaha darosłaha razradu nie chapiła zusim krychu). U BDUFK dziaŭčyna vybrała spartyŭnuju režysuru.
— Spačatku płanavała iści na reabilitacyju. Ale potym pahladzieła na svaje bały i vyrašyła nie ryzykavać, a pajści na režysuru. Jak ja zrazumieła, tam vučać arhanizoŭvać spartyŭnyja mierapryjemstvy i h. d., — ščyra raspaviadaje Maša. — Vielmi rada, što trapiła ŭ novy internat. Univiersitet maje jašče i stary budynak, u im niekali žyła maja mama. Jana kazała, što žyć było vielmi viesieła. Spadziajusia, tut budzie hetak ža.
Varvara pakazvaje videa sa svajho błoka: minimalistyčnaje azdableńnie ŭ spakojnych tanach, akuratnaja kuchnia, śviežaja plitka ŭ sanvuzłach. U pakojach — adnajarusnyja i dvuchjarusnyja łožki, pracoŭnyja stały.
— Budynak novy, tamu ŭmovy vydatnyja. Płacić usiaho 54 rubli. Za takija hrošy ŭsio vyhladaje supier, — ličyć surazmoŭnica. — Chaciełasia b pražyć studenckija hady mienavita ŭ internacie — adčuć hetuju atmaśfieru.
«Atrymać internat zusim niaprosta»
Zusim inšaja karcina razhortvajecca ŭ Studenckaj vioscy kala stancyi mietro «Piatroŭščyna». U adroźnieńnie ad BDUFK, dzie kipiać pieršakurśnickija straści, tut cicha. Kala niekatorych karpusoŭ naohuł ni dušy. Čas ad času niechta projdzie z čamadanam abo stosam papier, dy na łaŭkach sumujuć baćki, pakul ich dzieci prachodziać farmalnaści.
Usia asnoŭnaja mituśnia i šturm karpusoŭ pačnucca zaŭtra, kali pryjeduć pieršakurśniki. Siońnia ž dzień byvałych — zasialajucca ŭ asnoŭnym starejšyja studenty.
Lera, Anhielina i Nastaśsia pierajšli na treci kurs Instytuta psichałohii BDPU.
— My byli ŭpeŭnienyja, što nas zasielać, tolki nie viedali, kudy mienavita. Z našaha fakulteta ŭsie studenty atrymali miescy. U Studenckuju viosku ŭ asnoŭnym zasialajuć aktyvistaŭ, jakija ŭdzielničajuć u hramadskim žyćci. My taksama ŭsiudy staralisia zaśviacicca, — kažuć siabroŭki. — My ŭsie ź pieršaha kursa žyviom u internacie, tam i paznajomilisia.
Nastroj u dziaŭčat vydatny: raniej jany žyli ŭ starym internacie.
— Płacić budziem kala 60 rubloŭ. U inšym budynku było krychu tańniej, ale tam była ahulnaja kuchnia na paviersie, jakaja začyniałasia paśla 00:00: kali zachočaš pajeści nočču, nie atrymajecca. A jašče davodziłasia arandavać chaładzilnik na pakoj abo pryvozić jaho z domu, tak što pa hrošach toje na toje i vychodziła.
Da adsutnaści asabistaj prastory dziaŭčaty daŭno pryzvyčailisia, choć biez bytavych nieparazumieńniaŭ nie abychodzicca.
— Samaja častaja prablema — uborka pa hrafiku. Niepryjemna, kali davodzicca rabić usio za inšych. Ale z časam padładžvajeciesia adna pad adnu, i ŭsio stanovicca narmalna.
Na hanku adnaho z karpusoŭ staić siamja z Homiela — pryjechali razam z dačkoj. Anastasija sioleta pierajšła na čaćviorty kurs ekanamičnaha fakulteta BDU.
— Na čaćviortym kursie zasialeńnie prachodzić za piać chvilin, a voś na pieršym było niešta ź niečym — vielizarnyja čerhi, — uspaminaje mama Valancina.
— Uvohule, ciapier internat atrymać usio składaniej, ilhoty skaračajuć. Naprykład, pa čarnobylskim paśviedčańni ŭ nastupnym hodzie ŭžo nie budzie palohkaŭ. Mnie pašancavała, što ja na apošnim kursie i paśpieła skarystacca hetym u apošni raz, — kaža Anastasija. — Nakštałt i dla šmatdzietnych siemjaŭ chočuć ilhoty admianić… Napeŭna, heta praz zamiežnych studentaŭ — ich stanovicca bolš, i žyllo im pradastaŭlajuć u pieršuju čarhu.
Kožnaje leta dziaŭčyna ŭdzielničaje ŭ svojeasablivaj «łatarei»: pakoi i susiedziaŭ pastajanna mianiajuć.
— Źniać kvateru ciapier — pa takich koštach biez šancaŭ, — razvažaje baćka Kanstancin. — Byli b lišnija hrošy — arandavali b, a tak vyručaje internat. Dačka chacieła ŭ Minsk, bały dazvalali, my padtrymali. Ciapier užo čaćviorty kurs, treba dumać pra pracu i raźmierkavańnie. Moža, i ŭ Homiel vierniecca, chto viedaje.
Miłana i Natalla pryjechali ŭ stalicu z Baranavičaŭ. Dziaŭčyna vučycca na druhim kursie BDUZM i ščyra pryznajecca: kab žyć u dobrym internacie, treba «pachać» uvieś hod.
— Prosta tak ničoha nie dajuć. Nie budzieš ničoha rabić — pojdzieš u stary internat, dzie ŭmovy nie takija kamfortnyja. Na viesiałość času prosta niama. Treba dobra vučycca, udzielničać u mierapryjemstvach… Heta minčanam dobra — im nikudy chadzić nie treba, jany atrymlivajuć asałodu ad studenckaha žyćcia.
— A źniać kvateru ciapier — heta niemahčyma, — dałučajecca mama Natalla. — I ładna kvatera, navat pakoj znajści — prablema. Pačynać pošuki treba jašče ŭ krasaviku-mai. U červieni ludzi ŭžo płaciać za arendu napierad, prosta kab prytrymać miesca da vieraśnia. A ŭ žniŭni možna navat nie sprabavać niešta arandavać.
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary
Začiem voobŝie sozdavať takije očieriedi radi "formalnostiej"? V 21 viekie vsie formalnosti možno sdiełať onłajn