U maskoŭskim instytucie, jakim kiruje siabar Pucina, sabrali pažyłych małpaŭ dla stvareńnia «eliksiru daŭhalećcia»

U hadavalnikach instytuta ŭtrymlivajecca bolš za 7 tysiač prymataŭ 22‑ch vidaŭ. Navukoŭcy vyvučajuć małpaŭ va ŭzroście ad 18 da bolš jak 30 hadoŭ, kab daśledavać roznyja stadyi stareńnia. Pravodziacca bijachimičnyja i strukturnyja daśledavańni, vyvučajucca sasudy i mozh.

Kavalčuk nazvaŭ prymataŭ najbolš blizkaj da čałavieka madellu dla vyvučeńnia stareńnia i stvareńnia sistemy, jakaja dazvolić padaŭžać praciahłaść žyćcia.

Instytut Kurčatava razam z Rasijskim navukovym centram chirurhii ŭžo stvaryŭ bijabank uzoraŭ kryvi małpaŭ-doŭhažycharoŭ. Pa słovach dyrektara centra Kanstancina Kacienki, hetyja materyjały buduć vykarystoŭvać dla vyvučeńnia pracesaŭ stareńnia.

Michaiła Kavalčuka ličać daŭnim siabram 74‑hadovaha Pucina i jaho nieaficyjnym daradcam u navukovych pytańniach. Jahony brat, miljarder Juryj Kavalčuk, uvachodzić u najbližejšaje atačeńnie rasijskaha prezidenta. Sam Pucin prajaŭlaje vialikuju cikavaść da prablemy daŭhalećcia. U vieraśni 2025 hoda padčas vizitu ŭ Kitaj jon, jak vyśvietlili žurnalisty, abmiarkoŭvaŭ z kiraŭnikom Kitaja Si Czińpinam mahčymaść padaŭžeńnia žyćcia da 150 hadoŭ.

Daśledavańniami ŭ halinie hienietyki zajmajecca i starejšaja dačka Pucina, doktarka-endakrynołah Maryja Varancova. U kastryčniku jana vystupiła ŭ Maskoŭskaj škole kiravańnia «Skołkava», dzie adkryłasia łabaratoryja daŭhalećcia. Varancova nazvała sproby vyjści za naturalnyja miežy čałaviečaha žyćcia imknieńniem «padmanuć Boha».

Pavodle źviestak The Wall Street Journal, u miežach rasijskich prajektaŭ pa padaŭžeńni žyćcia navukoŭcy taksama pracujuć nad zapavoleńniem kletkavaha stareńnia z dapamohaj hiennaj terapii i vyroščvańniem orhanaŭ dla transpłantacyi ŭ hienietyčna madyfikavanych mini-śviniej.

Na takija daśledavańni Kreml vydzialaje značnyja srodki. U biudžecie na 2027—2029 hady na prajekt «Novyja technałohii zachavańnia zdaroŭja», jaki praduhledžvaje raspracoŭku sposabaŭ padaŭžeńnia zdarovaha žyćcia, zakładziena amal 18 miljardaŭ rasijskich rubloŭ (kala 216 miljonaŭ dalaraŭ).

U pryvatnaści, na 2027 hod zapłanavana vydzielić 625,4 miljona rubloŭ (kala 7,5 miljona dalaraŭ) na technałohii prafiłaktyčnaj miedycyny i zdarovaha daŭhalećcia, 288,5 miljonaŭ (kala 3.47 miljona dalaraŭ) — na raspracoŭku technałohij bijadruku tkanak i orhanaŭ, a jašče 137,4 miljona (1,65 miljona dalaraŭ) — na vyvučeńnie pryčyn stareńnia.

• 0
• 0
• 0
• 0
• 0
• 0
• 0
• 0