Apošni tankier z rasijskim dyzielnym palivam, jaki nakiroŭvaŭsia ŭ ZŠA, raźviarnuŭsia kala amierykanskaha ŭźbiarežža
Sudna Agioi Fanendes źmianiła kurs prykładna za 740 kiłamietraŭ ad Ńju-Jorka, paviedamlaje Bloomberg sa spasyłkaj na servisy adsočvańnia sudnaŭ.
Tankier vyjšaŭ z rasijskaha porta Prymorsk 22 kastryčnika. Punktam pryznačeńnia byŭ paznačany Ńju-Jork. Ciapier sudna paviedamlaje, što čakaje dalejšych rasparadžeńniaŭ.
Pavodle danych servisaŭ adsočvańnia, nivodnaje sudna z rasijskim dyzielnym palivam tak i nie dasiahnuła bierahoŭ ZŠA. U minułym miesiacy Rasija ŭ miežach tak zvanaj «dyzielnaj ździełki» adpraviła čatyry tankiery.
5 listapada Financial Times paviedamiła, što dva ź ich — Leruo i Talisman — źmianili maršruty. Pieršy ŭziaŭ kurs na Braziliju, druhi nakiravaŭsia ŭ Mižziemnaje mora. Treciaje sudna, Beast, taksama paviarnuła ŭ bok Brazilii.
Pres-sakratar Uładzimira Pucina Dźmitryj Piaskoŭ u adkaz na hetyja paviedamleńni zajaviŭ, što pastaŭki byli zroblenyja. Pavodle jaho słoŭ, havorka idzie pra kamiercyjnyja ździełki, tamu ich detali nie mohuć być publičnymi, ale ŭsio dyzielnaje paliva znojdzie svaich kupcoŭ.
Śpiecpradstaŭnik Pucina Kirył Dźmitryjeŭ nazvaŭ infarmacyju Financial Times fejkam. Jon śćviardžaŭ, što tankiery, jakija nakiroŭvajucca ŭ ZŠA, praciahvajuć ruchacca pavodle zapłanavanych maršrutaŭ.
Damoŭlenaść ab pastaŭkach rasijskaha dyzielnaha paliva ŭ ZŠA vyklikała krytyku ŭ amierykanskim Kanhresie. Donald Tramp damoviŭsia z Pucinym pra hetyja pastaŭki za niekalki tydniaŭ da pramiežkavych vybaraŭ. Bieły dom raźličvaŭ takim čynam źnizić ceny na paliva na fonie deficytu naftapraduktaŭ.
Adnak častka demakrataŭ i respublikancaŭ pastaviła pad sumnieŭ zakonnaść pahadnieńnia i zapatrabavała jaho skasavańnia. Amierykanskija kupcy taksama nie śpiašajucca nabyvać rasijskaje paliva praź jurydyčnyja i sankcyjnyja ryzyki.
Pavodle infarmacyi Financial Times, zapasy dyzielnaha paliva ŭ ZŠA skaracilisia da mienš jak 100 miljonaŭ baralaŭ — upieršyniu bolš čym za 20 hadoŭ. Deficyt źviazvajuć sa skaračeńniem suśvietnych mahutnaściaŭ naftapierapracoŭki na fonie vojnaŭ va Ukrainie i Iranie.
Ciapier čytajuć
Biełaruska hod adpracavała dalnabojščycaj u Jeŭropie. Ciapier sprabuje pastupić u italjanski ŭniviersitet3
Kamientary