Aleh Trusaŭ: «Instrukcyja Radźkova – heta nie dekret prezydenta»

Kiraŭnictva HA «Tavarystva biełarusaj movy imia Franciška Skaryny» źviarnułasia ź listom da premjer-ministra Siarhieja Sidorskaha, u jakim zaklikaje jaho skasavać rašeńnie Ministerstva adukacyi ab pieravodzie vykładańnia historyi Biełarusi i hieahrafii na rasiejskuju movu.

Nahadajem, što vykładańnie historyi Biełarusi i hieahrafii u starejšych klasach rasiejskamoŭnych škołaŭ z 1 vieraśnia pieraviedzienaje na rasiejskuju movu. Ministar adukacyi Alaksandar Radźkoŭ padrychtavaŭ adpaviedny instrukcyjny list.

U hutarcy z karespandentam «NN» staršynia TBM raspavioŭ nastupnaje. Zvarot da premjera matyvavany tym, što instrukcyja ministra adukacyi – heta nie dekret ci ŭkaz prezydenta, abo źmiena ŭ zakonie ab adukacyi. Tamu, na dumku A.Trusava, skasavańnie hetaha rašeńnia nie zapatrabuje składanych pracedurnych mierapryjemstaŭ z boku kiraŭnika ŭradu. «My adasłali aficyjnyja listy, a taksama padtrymali ideju zboru podpisaŭ za skasavańnie rašeńnia Ministerstva adukacyi», – kaža sp. Trusaŭ. Pavodle jahonych słovaŭ, zbor podpisaŭ daje svoj plon. Tak, ź Ministerstva adukacyi adkazali, što pierachod na rasiejskuju movu vykładańnia budzie adbyvacca sa zhody miascovych uładaŭ. «U Lidzie miascovyja ŭłady pastanavili pakinuć vykładańnie historyi Biełarusi pa-biełarusku. A voś mienskija ŭłady apelujuć da rasparadžeńnia ministra Radźkova», – kaža A. Tusaŭ. Tamu kiraŭnictva TBM źviarnułasia ź listom da ministra Radźkova, u jakim davodzić, što kančatkovaje słova ŭ vyrašeńni moŭnaha pytańnia musić być za nastaŭnikami-pradmietnikami, vučniami i ich baćkami. Aleh Trusaŭ z aptymizmam zaznačaje, što prajšli tyja časy, kali ŭ takija momnty ŭsie čakali na TBM: «Ciapier ludzi sami raspačynajuć zbor podpisaŭ ci ładziać akcyi ratestu. My tolki padtrymlivajem hetyja inicyjatyvy». Prykładam takoj samaarhanizacyi sp.Trusaŭ nazvaŭ inicyjatyvu pa zbory podpisaŭ bieraściejskich nastaŭnikaŭ, jakija žadajuć praciahvać vykładańnie svaich pradmietaŭ pa-biełarusku. Na jahonuju dumku, tolki zbor podpisaŭ, kali ŭ adpaviednuju strukturu dasyłajecca persanalny list, zdolny prynieści pieramohu. Takija zvaroty hramadzianaŭ nielha pakinuć biez adkazu, bo heta ahavorana zakonam. «Ja navat viedaju patrebnuju ličbu – 50 tysiačaŭ podpisaŭ vyrašyli pytańnie biełarusizacyi našych ełktryčak».

• 0
• 0
• 0
• 0
• 0
• 0
• 0
• 0