Biełaruskaja kampanija choča pabudavać 18 handlovych centraŭ u Rasii
Kampanija «Biełrusnaftahaz» stvoranaja pa daručeńni biełaruskaha ŭrada. 24% akcyj naležać "Biełarusnafcie".
Kampanija «Biełrusnaftahaz», stvoranaja pry ŭdziele ŭrada Biełarusi, šukaje ŭ Rastovie ŭčastak dla budaŭnictva handlova-łahistyčnaha centra płoščaj 100 000 kv. m
U kancy žniŭnia ambasadar Biełarusi ŭ Rasii Vasil Dałhaloŭ pieradaŭ hubiernataru Rastoŭskaj vobłaści Vasilu Hołubievu list hiendyrektara ZAT «Biełrusnaftahaz» Rašada Kurbanava z prośbaj prapanavać kampanii pieralik ziamielnych učastkaŭ u Rastovie dla budaŭnictva šmatfunkcyjanalnaha handlova-łahistyčnaha kompleksu.
Kompleks ahulnaj płoščaj 100 000 kv. m budzie ŭklučać handlova-zabaŭlalny centr (65 000 kv. m) z hipiermarkietam, handlovymi paviljonami, restaranami i kafe, łahistyčny centr z chaładzilnymi kamierami (30 000 kv. m) i vystavačny centr (5000 kv. m). «Biełrusnaftahazu» patrebny ŭčastak u 10-15 ha. Inviestycyi składuć kala $100 miljonaŭ.
Handlovyja centry «Biełrusnaftahaz» źbirajecca budavać u 18 haradach Rasii, jość adzinaje architekturnaje rašeńnie, paśla vydzialeńnia ŭčastku kala vaśmi miesiacaŭ pojdzie na padrychtoŭčyja pracy i paŭtara hodu na budaŭnictva.U pačatku nastupnaha hoda budaŭnictva pačniecca ŭ Nižnim Noŭharadzie i Kazani. Finansujucca prajekty za košt ułasnych srodkaŭ (30-40%) i bankaŭskich kredytaŭ.
«Biełrusnaftahaz» stvorany ŭ 2005 h. pa daručeńni ŭrada Biełarusi.Realizavanych prajektaŭ u Rasii ŭ kampanii pakul niama, jana była padradčykam budaŭnictva mietanołavaha zavodu ŭ Baku.
Kampanija na 24% prynaležyć dziaržaŭnamu vytvorčamu abjadnańniu «Biełarusnafta», na 76% — ZAT «Pramnaftahaz».
«Łukašenka pieršym adčuje katastrofu Pucina» — Śviatłana Aleksijevič u vialikaj hutarcy TOK10
Kamientary