«Junimiłk» atrymaŭ dostup da piaci biełaruskich zavodaŭ

Hałoŭny rasijski vytvorca małočnaj pradukcyi i dziciačaha charčavańnia «Junimiłk» praciahvaje aktyŭna raźvivać biznes u Biełarusi. Uśled za stvareńniem sumiesnych pradpryjemstvaŭ u Škłovie i Pružanach rasijskija małočniki majuć namier naładzić vytvorčaść u Słucku i Vysokim.

Nahadajem, što «Junimiłku» z III kvartała 2009 hoda ŭ Biełarusi naležać kantrolnyja pakiety akcyj (51%) u STAA «Junimiłk Škłoŭ» i STAA «Junimiłk Pružany». Partniorami rasijskaj kampanii stali Škłoŭski masłarobny zavod i Pružanski małočny kambinat, a taksama miascovyja vytvorcy syraviny. Pradpryjemstvy na 99% źjaŭlajucca eksparciorami.

Na Biełaruskim inviestforumie ŭ Frankfurcie-na-Majnie «Junimiłk» padpisaŭ inviestycyjnaje pahadnieńnie ź Minskim abłvykankamam ab stvareńni ekspartaaryjentavanaha kłastara pa vytvorčaści syroŭ i małočnych kansiervaŭ na bazie AAT «Słucki syrarobny kambinat» i aktyvaŭ AAT «Słucki pivavarny zavod», havorycca ŭ paviedamleńni «Junimiłk «.

Ahulny abjom inviestycyj u prajekt składzie kala 80 młn jeŭra ŭ pieryjad da 2017 hoda. Struktura i košt pahadnieńnia buduć raskrytyja pa miery dasiahnieńnia damoŭlenaści ź biełaruskim bokam, paviedamili ŭ kampanii.

Madernizavanyja mahutnaści syrarobnaha kambinata dazvolać vypuskać da 37 tys. ton syru. Kala 90% vyrablenaj pradukcyi płanujecca pastaŭlać na ekspart u krainy SND.

Dziciačyja soki zastalisia ŭ cieni

Adnak kali pra hetyja prajekty było zajaŭlena davoli hučna, to nabyćcio «Junimiłk» zavoda ŭ nievialikim haradku na Brestčynie supravadžali tolki čutki. Vyjaviłasia, što ŭ kancy vieraśnia rasijskaja kampanija stała ŭładalnikam ZTAA «VySokavaje» (h. Vysokaje, Kamianiecki rajon), vykupiŭšy ŭ niamieckaj kampanii Leahg Holding 100% u statutnym kapitale pradpryjemstva. Sumu pahadnieńnia ŭ «Junimiłk» nie ahučvajuć.

Varta adznačyć, što letam 2008 hoda Deutsche Welle, paviedamlajučy ab prychodzie niamieckaha inviestara na Brestčynu, acaniła inviestprajekt ŭ 10 młn jeŭra.

Razam z tym pres-sakratar «Junimiłk» Jaŭhienija Łampadava zajaviła, što «z druhoj pałovy 2011 hoda my pačniem na zavodzie ŭ Vysokim vytvorčaść dziciačych sokaŭ pad ułasnaj markaj «Cioma», a taksama pad brendami Disney i «Śmiašaryki «. Inviestycyi ŭ rekanstrukcyju pradpryjemstva składuć kala 7 młn jeŭra. Zapłanavanyja abjomy vytvorčaści — 3000–5000 t sokaŭ u miesiac. 100% vypuskanaj pradukcyi inviestar raźličvaje pastaŭlać na ekspart.

Praz deficyt mahutnaściaŭ u Rasii «Junimiłk» raźmiaščaje zakazy pa vytvorčaści soku na inšych zavodach. Tamu ŭ rasijskaj kampanii čakajuć, što «zavod u Biełarusi harantavana zabiaśpiečyć zapatrabavańnie ŭ sokavaj pradukcyi; da taho ž rynak dziciačaha charčavańnia vysokarentabielny i pierśpiektyŭny».

«Junimiłk» dapamahli «vajna» i Danone

Aktyŭnaść «Junimiłk» na biełaruskim rynku ekśpierty źviazvajuć ź dźviuma pryčynami.

Pieršaja — adhałoski «małočnaj vajny», miravym raźviazańniem jakoj, pa najaŭnaj infarmacyi, staŭ dostup rasijskich kampanijaŭ na biełaruski rynak.

• 0
• 0
• 0
• 0
• 0
• 0
• 0
• 0