«Ja sam aficer i źviarnusia da aficeraŭ».
Kandydat u prezidenty Mikałaj Statkievič rychtuje videazvarot da supracoŭnikaŭ milicyi z nahody padziej u dzień vybaraŭ.
«Ja sam aficer i źviarnusia da aficeraŭ. Na nastupnym tydni budzie moj videazvarot da ich», — paviedamiŭ kandydat padčas sustrečy z vybarščykami ŭ Viciebsku viečaram 11 śniežnia.
Statkievič zaklikaŭ hramadzian da kansalidacyi 19 śniežnia. «Ja asabista źbirajusia pryjści na Kastryčnickuju płošču horada Minska ŭ 20 hadzin i zaklikaju tych, chto nie baicca, pryjści tudy», — skazaŭ jon.
Na pytańni pra mahčymy siłavy scenaryj padziej na płoščy palityk adkazaŭ:
«Supakojciesia, kryvi nijakaj, ja dumaju, nie budzie.
A voś pałochać buduć, i buduć isteryki, buduć padać na kaleni i kryčać: nie idzicie, nie viadzicie vašych dziaciej!»
«Ale vašy dzieci — heta ludzi, — padkreśliŭ Statkievič. —
Jany prymajuć rašeńnie, jany majuć hodnaść, ich jašče nie złamali. Dyk dajcie im mahčymaść hodna zabiaśpiečyć svaju budučyniu».
Kandydat padkreśliŭ, što hatovy stać u pieršyja šerahi demanstrantaŭ: «Ja siabie niejak paznaču i budu napieradzie. Kali zdarycca niejkaja niebiaśpieka, ja budu pamiž ludźmi, pamiž vami, vašymi dziećmi i hetaj niebiaśpiekaj. Voś heta ja mahu vam abiacać. Na žal, ničoha inšaha abiacać nie mahu».
Na pytańnie, ci vieryć jon, što 20 śniežnia Łukašenka moža ŭžo nie być prezidentam, Statkievič zajaviŭ:
«Vieryć možna ŭ Boha, siabroŭ, blizkich, u siabie. Za ŭsio astatniaje treba zmahacca».
Sustreča z vybarščykami prachodziła ŭ aktavaj zale internata Viciebskaha liceja pryborabudavańnia. Akramia Statkieviča na joj prysutničaŭ kandydat u prezidenty Dźmitryj Us. Niahledziačy na toje što internat znachodzicca daloka ad centra horada, aktavaja zała, raźličanaja prykładna na 150 čałaviek, była poŭnaj.
Kandydat Us raskazaŭ vybarščykam pra svajo asabistaje žyćcio i deputackuju pracu, pra toje, što pajšoŭ u palityku paśla raptoŭnaj chvaroby i śmierci svajoj žonki, a taksama pra stan pryvatnaha biźniesu ŭ Biełarusi i adarvanaści ŭłady ad realnych prablem ludziej.
«Maja asnoŭnaja meta — nie ahitavać vas za siabie ci jašče za kahości, a raskryć vam vočy na toje, što adbyvajecca ŭ našaj krainie. U nas ciapier čas raskidvać kamiani, a potym budziem źbirać ich», — skazaŭ jon. Pavodle słoŭ Usa, «druhoha tura na vybarach nie budzie: užo ŭsio vyrašana, učastkovym kamisijam užo pastaŭleny zadačy».
Raniej z vybarščykami Viciebska sustrakalisia kandydaty ŭ prezidenty Andrej Sańnikaŭ, Vital Rymašeŭski, Jarasłaŭ Ramančuk, a taksama davieranyja asoby Uładzimira Niaklajeva.
Kamientary