U čakańni cudu

Płošča vyznačyć palityčnuju situacyju na nastupnuju piacihodku.

Adrazu šeść kandydataŭ zaklikajuć vybarcaŭ pryjści na Płošču 19 śniežnia. Heta Vital Rymašeŭski, Mikoła Statkievič, Andrej Sańnikaŭ, Ryhor Kastusioŭ, Uładzimir Niaklajeŭ i Jarasłaŭ Ramančuk.

Hienieralnaja prakuratura zreahavała na zakliki papiaredžańniami.

Tym nie mienš, kandydaty kličuć mienavita na Kastryčnickuju płošču. Jana najbolšaja i simvaličnaja. Na joj źbiralisia i ŭ 2006 hodzie. Tady ź lohkaj ruki piśmieńnika Uładzimira Arłova ŭdzielniki namiotavaha miastečka pieranazvali jaje ŭ płošču Kalinoŭskaha.

Na jaje lohka vyjści sa stancyj mietro «Kastryčnickaja» i «Kupałaŭskaja». Kali ŭ 2006-m ułady zakryli hetyja dźvie stancyi, ludskija ručainki ściakalisia na jaje ad «Niamihi» i «Płoščy Pieramohi».

Dziejańni arhanizataraŭ uskładniajucca chałodnym nadvorjem. Na 19 śniežnia sinoptyki abiacajuć da 11 marozu ŭranku i minus 8–10 uviečary ź nievialikim śnieham. 19 sakavika 2006 hoda bolšaść mitynhoŭcaŭ razyšłasia ŭ časie śniežnaha škvału. Tady vykazvalisia navat mierkavańni, što jon byŭ štučna vyklikany śniehavymi harmatami.

Na vybarach lahčej

Va ŭmovach, kali niama prazrystaha padliku hałasoŭ, mienavita vychad na Płošču dla hramadzian staŭ hałoŭnaj prajavaj ich pazicyi. Padobnaje adbyvałasia va ŭsich krainach, dzie vybarcy nie byli ŭpeŭnienyja ŭ spraviadlivaści vynikaŭ. Časta paślavybarčyja pratesty pierarastali ŭ pieramohu apazicyi — na Filipinach, u Sierbii, Hruzii, Ukrainie.

Mižnarodnyja naziralniki pahadžajucca, što peŭny prahres na hetych vybarach nazirajecca. Zbor podpisaŭ adbyvaŭsia svabodna, jak i sustrečy kandydataŭ z vybarcami. Ale da pravavych normaŭ jašče vielmi daloka. Najpierš tamu, što apazicyja znoŭ nie była ŭklučanaja ŭ vybarčyja kamisii. Jaje tam 0,25%. Na telebačańni daminuje adzin palityk, jakomu, pavodle źviestak manitorynhu Biuro pa demakratyčnych instytutach i pravach čałavieka ABSIE, było pryśviečana 90% času, što advodzicca vybaram. Dziejnaść inšych pretendentaŭ nie aśviatlajecca ci aśviatlajecca ŭ niehatyŭnym śviatle.

Pa-raniejšamu nie admienienaje daterminovaje hałasavańnie. A naziralniki kažuć, što mienavita ź biuleteniami dla daterminovaha hałasavańnia adbyvajecca najbolš falsifikacyj. Pra ich miechanizm sioleta padrabiazna raskazaŭ pałkoŭnik Kazłoŭ, jaki zafiksavaŭ ukidvańnie padrobnych biuleteniaŭ u skryni ŭ noč z suboty na niadzielu padčas parłamienckich vybaraŭ.

U kožnym razie,

imknieńnie ŭładaŭ zahnać ludziej na hałasavańnie mienavita daterminova vyklikaje zakanamiernyja padazreńni.

Tak i nie raspracavanyja da kanca abaviazki i pravy naziralnikaŭ. Usio heta dazvalaje havaryć apazicyi pra nielehitymnaść pracesu.

Dzieviać hienierałaŭ

Niajasnym zastajecca toje, ci zmohuć dzieviać «hienierałaŭ» adnačasova kiravać padziejami na Płoščy. Viadoma, što ahulnaha bačańnia ŭ ich doŭhi čas nie było.

«Pavinna być ahulnaja stratehija na Płoščy, stvorany kamitet z tych kandydataŭ, usich ci amal usich, jakija zaprašali na Płošču. Jon budzie prymać rašeńni pa jaje farmacie, praviadzieńni i hetak dalej. Vykanaŭcam pryniatych rašeńniaŭ daručana być mnie», — kaža M.Statkievič. Pavodle jaho słovaŭ, na sustrečy prysutničaŭ Vital Rymašeŭski, a taksama pradstaŭniki Uładzimira Niaklajeva, Jarasłava Ramančuka i Ryhora Kastusiova. Ale kančatkovaj zhody sa štaboŭ Sańnikava i Niaklajeva pakul niama.

Takim čynam, kandydaty sprabujuć razmaŭlać i damaŭlacca, ale realnaj zastajecca mahčymaść taho, što ŭ Płoščy moža być niekalki punktaŭ kiravańnia. Umoŭna kažučy, adzin uznačalić Uładzimir Niaklajeŭ, a druhi — Mikoła Statkievič. I imaviernaja razroźnienaść dziejańniaŭ pojdzie na škodu Płoščy.

Adnak pad ciskam hramadskaje dumki, zdajecca, lidary vymušanyja dziejničać supolna. U subotu Niaklajeŭ i Sańnikaŭ zajavili, što nie pryznajuć vynikaŭ vybaraŭ, kali pieramožcam budzie abvieščany Łukašenki. A Rymašeŭski paviedamiŭ, što asnoŭnym łozunham Płoščy budzie «My — adzin narod».

Statkievič paabiacaŭ pryjści na Płošču pad charuhvaj z ułasnym šlachieckim hierbam.

Stała viadoma, što na Płoščy budzie adna trybuna i supolny štab.

Kolki pryjdzie ludziej sioleta? Adny kažuć pra piać tysiač, inšyja — pra piaćdziasiat. U lubym vypadku, jana stanie samaj masavaj manifiestacyjaj apazicyi za apošnija hady.

Statkievič zaklikaŭ aŭtaamataraŭ nie karystacca asabistym transpartam viečaram 19 śniežnia ŭ centry Minska ci vyklučyć sa svaich maršrutaŭ rajon Kastryčnickaj płoščy.

«Mohuć utvarycca zatory, i budziecie stajać u ich niekalki hadzin», — skazaŭ Statkievič.

Inšyja

kandydaty nahadvajuć ludziam pra ciopłuju vopratku i kamfortny abutak, jakija zachavajuć ad marozu.

Ułady, u svaju čarhu, pravodziać kampaniju zapałochvańnia — časam davoli štukarskuju. Adnak, zdajecca, nichto nie vieryć u mahčymaść surjoznych pravakacyj i hvałtu na Płošču,

Scenary

Kandydaty abiacajuć, što scenary na 19 śniežnia ŭ ich majucca. Pryčym raspracoŭvajucca samyja roznyja varyjanty. Jasnaja sprava, što dla presy ich nie ahučvajuć. Bajacca, što hetym skarystajucca ŭłady.

Paśla 2006 hoda šmat chto imknuŭsia papraknuć Milinkieviča, što ŭ jaho nie było jasnaha płana. Paźniej Milinkievič pryznajecca, što jon nie vieryŭ, što ŭłady puściać ich na Kastryčnickuju. Ciapier u kandydataŭ jość mahčymaść dakazać, što jany lepšyja stratehi i taktyki za Milinkieviča.

Kazać, što niechta z kandydataŭ pieramoh, chutčej za ŭsio, nie buduć.

Patrabavać druhoha tura — małaimavierna. Bolš vierahodny varyjant — praviadzieńnia novych, spraviadlivych vybaraŭ biez Łukašenki.

Paśla minułych vybaraŭ na druhi dzień moładź raźbiła na Płoščy namiotavaje miastečka, jakoje praisnavała čatyry dni.

Tady šmat chto kazaŭ pra maralnuju pieramohu. Pra pieramohu realnuju pakul nichto nie havaryŭ.

Tym nie mienš, sioleta

kožny čałaviek vychodzić na Płošču ŭ čakańni cudu. Chaj i nie kažuć pra toje ŭhołas.

Nu, a dobry nastroj dla ŭdzielnikaŭ pavinien być zabiaśpiečany. Minułaja Płošča dała mocny zarad enierhii, jakim žyvilisia nastupnyja hady.

U niadzielu viečaram my daviedajemsia adkazy na ŭsie pytańni.

• 0
• 0
• 0
• 0
• 0
• 0
• 0
• 0