Siońnia — vybary prezidenta Respubliki Biełaruś

Siońnia — asnoŭny dzień hałasavańnia na vybarach prezidenta Respubliki Biełaruś. Vybarčyja ŭčastki adkrylisia ŭ 8 hadzin ranicy i buduć pracavać da 20.00.

Pavodle źviestak CVK, u daterminovym hałasavańni ŭziali ŭdzieł 23,1% vybarščykaŭ.

Usiaho stvorana 6.390 vybarčych učastkaŭ, ź jakich 44 — za miažoj. Z 6.346 učastkaŭ na terytoryi Biełarusi 281 adkryty ŭ stacyjanarnych lačebna-prafiłaktyčnych ustanovach, 52 — u voinskich čaściach.

Zamiežnyja ŭčastki pracujuć u 34 krainach. Ź ich najbolšaja kolkaść (pa čatyry) — u Polščy i Rasii; pa dva ŭčastki stvorany ŭ Hiermanii, Kitai, Łatvii i ZŠA.

Pavodle źviestak Centrvybarkama, uziać udzieł u hałasavańni majuć prava bolš jak 7 młn. 54 tys. hramadzian.

Za vybarami ŭ Biełarusi sočać bolš jak tysiača mižnarodnych i zvyš 27 tysiač unutranych naziralnikaŭ.

Na pasadu prezidenta pretendujuć dziesiać čałaviek:

— namieśnik staršyni Partyi BNF Ryhor Kastusioŭ;

— dziejny prezident Alaksandr Łukašenka;

— kiraŭnik sajuza «Za madernizacyju» Aleś Michalevič;

— lidar hramadzianskaj kampanii «Havary praŭdu!» Uładzimir Niaklajeŭ;

— namieśnik staršyni Ab`iadnanaj hramadzianskaj partyi Jarasłaŭ Ramančuk;

— sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski;

— lidar kampanii «Jeŭrapiejskaja Biełaruś» Andrej Sańnikaŭ;

— lidar arhkamiteta pa stvareńni Biełaruskaj sacyjał-demakratyčnaj partyi (Narodnaja Hramada) Mikałaj Statkievič;

— staršynia savieta Asacyjacyi małoha i siaredniaha pradprymalnictva Viktar Ciareščanka;

— dyrektar minskaha TDA «Tryvium» Dźmitryj Us.

Pieramožcam vybaraŭ budzie kandydat, jaki nabiare zvyš 50% hałasoŭ. U advarotnym vypadku nie paźniej čym praz dva tydni pavinien prajści druhi tur z udziełam dvuch kandydataŭ, jakija nabrali najbolšuju kolkaść hałasoŭ.

Ab chodzie hałasavańnia CVK budzie paviedamlać na pres-kanfierencyjach, arhanizavanych u infarmacyjnym centry Centrvybarkama ŭ Pałacy Respubliki. Pres-kanfierencyi buduć pravodzicca kožnyja dźvie hadziny, pačynajučy z 10.00

Pieršyja źviestki ab vynikach vybaraŭ — z zakrytych učastkaŭ (balnicy, sanatoryi, voinskija čaści) — Centrvybarkam płanuje abnarodavać u 20.00.

Papiarednija vyniki vybaraŭ buduć ab`iaŭleny ŭ 23.30.

Vybary prezidenta Biełarusi aśviatlajuć 1.025 žurnalistaŭ z 50 krain: 670 pradstaŭlajuć zamiežnyja ŚMI, 355 — biełaruskija. 250 supracoŭnikaŭ zamiežnych ŚMI majuć pastajannuju akredytacyju ŭ Biełarusi, 410 — atrymali časovuju akredytacyju ŭ MZS.

***

Bolšaść demakratyčnych kandydataŭ u prezidenty zajavili ab tym, što rychtujucca falsifikacyi, i zaklikali hramadzian vyjści viečaram 19 śniežnia na Kastryčnickuju płošču Minska, kab adstajać svoj vybar. Pry hetym Uładzimir Niaklajeŭ ličyć nieabchodnym pravieści novyja prezidenckija vybary 19 sakavika 2011 hoda biez udziełu ŭ ich Alaksandra Łukašenki, jaki, na jaho dumku, nie maje prava brać udzieł u ciapierašnich vybarach, pakolki nieadnarazova parušaŭ zakanadaŭstva.

U svaju čarhu, Hienprakuratura zaklikała prychilnikaŭ apazicyjnych kandydataŭ «nie paddavacca na pravakacyjnyja zakliki» i nie vychodzić na płošču 19 śniežnia.

Ab masavych parušeńniach padčas vybarčaj kampanii zajavili pravaabaroncy. Siarod najbolš raspaŭsiudžanych pravaparušeńniaŭ — prymus da daterminovaha hałasavańnia i pieraškody pracy niezaležnych naziralnikaŭ.

CVK, u svaju čarhu, zajaviŭ, što vybarčaja kampanija prachodzić u adpaviednaści z zakanadaŭstvam.

18 śniežnia, za dzień da asnoŭnaha hałasavańnia, Uładzimir Niaklajeŭ i Andrej Sańnikaŭ paviedamili, što hatovy pradastavić zamiežnym naziralnikam dokazy falsifikacyi prezidenckich vybaraŭ.

Krainy Jeŭrasajuza i ZŠA nieadnarazova zajaŭlali, što ich adnosiny z aficyjnym Minskam buduć u mnohim zaležać ad chodu ciapierašniaj vybarčaj kampanii.

• 0
• 0
• 0
• 0
• 0
• 0
• 0
• 0