Niaklajeva bačyła dziažurnaja advakatka: «Na samaadčuvańnie nie skardziŭsia»
Jana prysutničała pry dačy tłumačeńniaŭ Niaklajevym śledčamu ŭ SIZA KDB ŭviečary 20 śniežnia.
Adziny, chto paviedamiŭ, što bačyŭ Niaklajeva paśla jaho zachopu ŭ Balnicy chutkaj medycynskaj dapamohi, — dziažurny advakat Neli Padsadnaja. Jana prysutničała pry dačy tłumačeńnia Niaklajeva śledčamu ŭ SIZA KDB ŭviečary 20 śniežnia. Karespandentka hazety «Narodnaja vola» Volha Hryniavickaja datelefanavałasia da Neli Padsadnoj i zadała joj niekalki pytańniaŭ.
— Neli Piatroŭna, skažycie, kali łaska, jak siabie adčuvaŭ Uładzimir Niaklajeŭ? Da hetaha času ź im nia moža sustrecca jaho advakat Tamara Sidarenka. Składvajecca ŭražańnie, što niechta naŭmysna nie dapuskaje jaje da padabaronnaha, i tamu ŭźnikajuć versii: maŭlaŭ, Niaklajeŭ tak drenna siabie adčuvaje, što jaho chavajuć ad rodnych i advakataŭ…
— Adčuvaŭ jon siabie narmalna, davaŭ tłumačeńni śledčamu. Da kanca dopytu kazaŭ, što balić hałava. Moža, stamiŭsia. Ale nie narakaŭ. Kali ŭ jaho śledčy i ja pytalisia, ci nie pierapynić dopyt, kali jon siabie drenna adčuvaje, jon adkazvaŭ, što hatovy adkazvać na ŭsie pytańni. Adkazvaŭ na pytańni vyrazna, zrazumieła.
Jak vyhladaŭ? Uschvalavany, bo ž sytuacyja. Pad vokam u jaho siniak, na hałavie ślady ad zialonki.
— Dyk vy ličycie, što niebiaśpieki jaho zdaroŭju niama?
— Jon nia skardziŭsia. Kazaŭ tolki, što jaho zabrali z balnicy biez adzieńnia. Ale adzieńnie jamu dali. Chto? Nia viedaju. Na im byŭ pułover, štany, jon byŭ u abutku.
— A što ŭ jaho pytaŭsia śledčy?
— Ja nie mahu pra heta kazać. U nas biaruć padpisku pra nierazhałošańnie źviestak, pakolki idzie śledztva.
Mahu tolki skazać, što Niaklajeŭ davaŭ tłumačeńni. Na toj momant jon byŭ zatrymany, nie aryštavany. Ciapier, musić, jamu ŭžo abiaruć mieru strymańnia.
— A jakija jon moh davać tłumačeńni?
— Tłumačyŭ, što adbyłosia. Jaki jon u hetym braŭ udzieł.
Kamientary