Gemius: Biełaruskaja internet-aŭdytoryja za hod pavialičyłasia na paŭmiljona čałaviek

Pavodle źviestak daśledavańnia, biełaruskaja internet-aŭdytoryja za hod pavialičyłasia na 16,73%. U absalutnych značeńniach — z 3.029.760 čałaviek u studzieni 2010 hoda da 3.536.647 u studzieni 2011 hoda.

Pra heta paviedamiŭ Michaił Daraševič, pradstaŭnik prajekta Gemius Belarus — ahienctva pa anłajn-daśledavańniach Centralnaj i Uschodniaj Jeŭropy.

Pavodle jaho słoŭ,

internet-karystalnikam nazyvajecca čałaviek, jaki na praciahu miesiaca chacia b adnojčy skarystaŭsia internetam.

Daśledavańnie pravodziłasia ŭ studzieni 2011 hoda. Vybarka ankiet — 16.709.

Pavodle źviestak daśledavańnia, zhodna z hiendarnymi kryteryjami aŭdytoryja biełaruskaha internetu vyhladaje nastupnym čynam: 51,18% karystalnikaŭ mužčyny, 48,82% — žančyny.

Asnoŭnaja masa biełaruskich karystalnikaŭ — ludzi va ŭzroście 25–34 hadoŭ (28%) i 19–24 hadoŭ (26,4%).

Kolkaść karystalnikaŭ va ŭzroście 15–18 hadoŭ składaje 10,31%, 35–44 hadoŭ — 18,3%, 45–54 hadoŭ — 12,3%, ad 55 hadoŭ i bolš — 4,5%.

Praviedzienaje apytańnie pakazała, što 33,2% biełaruskich internet-karystalnikaŭ majuć vyšejšuju adukacyju, 19,5% — poŭnuju siaredniuju, 26,7% — siaredniuju śpiecyjalnuju, 11,9% — niaskončanuju vyšejšuju, 7% — niaskončanuju siaredniuju.

Što da siamiejnaha stanovišča, to amal 43% biełaruskich karystalnikaŭ nie žanatyja/nie zamužam, 6% — žyvuć u hramadzianskim šlubie.

Pa rodzie zaniatkaŭ bolšaść karystalnikaŭ — 17,7% — školniki i studenty, za imi iduć śpiecyjalisty/viadučyja śpiecyjalisty — 16,4%, inžyniery/rabočyja na vytvorčaści — 10,5%, śpiecyjalisty ŭ biudžetnaj ustanovie — 6,25%, ofisnyja rabotniki — 5,43%.

U rehijanalnym razrezie bolš za 39% apytanych žyvuć u Minskaj vobłaści, prykładna 15% — u Bresckaj, 12,8% — u Viciebskaj, pryblizna 13% — u Homielskaj, 9,83% — u Mahiloŭskaj, 9,5% — u Hrodzienskaj.

Pry hetym 71,48% apytanych adznačyli, što karystajucca internetam štodnia,

17,28% — try-piać razoŭ na tydzień, 8,26% — adzin-dva razy na tydzień, amal 3% — adzin-try razy na miesiac.

U jakaści miesca dostupu pryblizna 90% respandentaŭ nazvali vychad u internet z domu, 27,86% karystajucca internetam na pracoŭnym miescy. Amal 48% respandentaŭ dla hetych metaŭ vykarystoŭvajuć šyrokapałosny dostup, prykładna 18,5% — mademnaje złučeńnie, 5,5% — mabilnuju suviaź, 3,3% — Wi-Fi.

Gemius — mižnarodnaje daśledčaje ahienctva, jeŭrapiejski lidar i pijanier u śfiery vymiareńnia internetu i daśledavańniaŭ u internecie. Vymiareńnie anłajn-aŭdytoryi gemiusAudience źjaŭlajecca standartam amal u pałovie krain Jeŭropy.

Ahienctva Gemius było zasnavana ŭ Polščy ŭ 1999 hodzie i aktyŭna dziejničaje bolš jak u 30 krainach Jeŭropy i Blizkaha Uschodu.

• 0
• 0
• 0
• 0
• 0
• 0
• 0
• 0