Gemius: Беларуская інтэрнэт-аўдыторыя за год павялічылася на паўмільёна чалавек

Паводле звестак даследавання, беларуская інтэрнэт-аўдыторыя за год павялічылася на 16,73%. У абсалютных значэннях — з 3.029.760 чалавек у студзені 2010 года да 3.536.647 у студзені 2011 года.

Пра гэта паведаміў Міхаіл Дарашэвіч, прадстаўнік праекта Gemius Belarus — агенцтва па анлайн-даследаваннях Цэнтральнай і Усходняй Еўропы.

Паводле яго слоў,

інтэрнэт-карыстальнікам называецца чалавек, які на працягу месяца хаця б аднойчы скарыстаўся інтэрнэтам.

Даследаванне праводзілася ў студзені 2011 года. Выбарка анкет — 16.709.

Паводле звестак даследавання, згодна з гендарнымі крытэрыямі аўдыторыя беларускага інтэрнэту выглядае наступным чынам: 51,18% карыстальнікаў мужчыны, 48,82% — жанчыны.

Асноўная маса беларускіх карыстальнікаў — людзі ва ўзросце 25–34 гадоў (28%) і 19–24 гадоў (26,4%).

Колькасць карыстальнікаў ва ўзросце 15–18 гадоў складае 10,31%, 35–44 гадоў — 18,3%, 45–54 гадоў — 12,3%, ад 55 гадоў і больш — 4,5%.

Праведзенае апытанне паказала, што 33,2% беларускіх інтэрнэт-карыстальнікаў маюць вышэйшую адукацыю, 19,5% — поўную сярэднюю, 26,7% — сярэднюю спецыяльную, 11,9% — няскончаную вышэйшую, 7% — няскончаную сярэднюю.

Што да сямейнага становішча, то амаль 43% беларускіх карыстальнікаў не жанатыя/не замужам, 6% — жывуць у грамадзянскім шлюбе.

Па родзе заняткаў большасць карыстальнікаў — 17,7% — школьнікі і студэнты, за імі ідуць спецыялісты/вядучыя спецыялісты — 16,4%, інжынеры/рабочыя на вытворчасці — 10,5%, спецыялісты ў бюджэтнай установе — 6,25%, офісныя работнікі — 5,43%.

У рэгіянальным разрэзе больш за 39% апытаных жывуць у Мінскай вобласці, прыкладна 15% — у Брэсцкай, 12,8% — у Віцебскай, прыблізна 13% — у Гомельскай, 9,83% — у Магілёўскай, 9,5% — у Гродзенскай.

Пры гэтым 71,48% апытаных адзначылі, што карыстаюцца інтэрнэтам штодня,

17,28% — тры-пяць разоў на тыдзень, 8,26% — адзін-два разы на тыдзень, амаль 3% — адзін-тры разы на месяц.

У якасці месца доступу прыблізна 90% рэспандэнтаў назвалі выхад у інтэрнэт з дому, 27,86% карыстаюцца інтэрнэтам на працоўным месцы. Амаль 48% рэспандэнтаў для гэтых мэтаў выкарыстоўваюць шырокапалосны доступ, прыкладна 18,5% — мадэмнае злучэнне, 5,5% — мабільную сувязь, 3,3% — Wi-Fi.

Gemius — міжнароднае даследчае агенцтва, еўрапейскі лідар і піянер у сферы вымярэння інтэрнэту і даследаванняў у інтэрнэце. Вымярэнне анлайн-аўдыторыі gemiusAudience з’яўляецца стандартам амаль у палове краін Еўропы.

Агенцтва Gemius было заснавана ў Польшчы ў 1999 годзе і актыўна дзейнічае больш як у 30 краінах Еўропы і Блізкага Усходу.

• 0
• 0
• 0
• 0
• 0
• 0
• 0
• 0