Eduard Zankaviec: Hałoŭny trenier chakiejnaj zbornaj pavinien być prystojnym i sumlennym

«Chaciełasia b, kab na čale kamandy stajaŭ prystojny, sumlenny čałaviek, jaki ŭ asnovu stavić nie asabistyja ambicyi i mety, a mienavita mety kamandy, mety raźvićcia nacyjanalnaj zbornaj», — zajaviŭ BiełaPAN były hałoŭny trenier zbornaj Biełarusi pa chakiei Eduard Zankaviec.

19 maja trenierski saviet Fiederacyi chakieja Biełarusi zadavoliŭ jaho zajavu ab adstaŭcy ŭ suviazi ź nievykanańniem pastaŭlenaj zadačy na čempijanacie śvietu ŭ Słavakii: kamanda zaniała 14-je miesca, tady jak płanavaŭsia vychad u vaśmiorku.

«Rašeńnie padać u adstaŭku dałosia lohka, — skazaŭ Zankaviec. — Na samoj spravie „adstaŭka“ nie zusim toje słova, heta pierabolšanaja forma, tamu što ŭ mianie kantrakt zakančvajecca 20 maja. Kantrakt zakončyŭsia — usio».

«Stan paśla trenierskaha savieta nie samy lohki, tamu što, kali štości robiš, staviš peŭnyja mety, žyvieš imi, štości atrymlivajecca i bačyš, što moža štości atrymacca, ale, na žal, z-za niejkich pryčyn nie možaš dalej praciahvać hetym zajmacca, — heta zasmučaje. Ja viedaju, što nie ŭsio kiepska było ŭ našaj pracy. Kamanda była dastojnaja pakazać lepšy vynik — ja ŭ heta ščyra vieryŭ i vieru, tamu rasstavacca z kamandaj, hulcoŭ jakoj pavažaješ, ceniš, — padzieja nie z pryjemnych. Ale nie zaŭsiody našy žadańni supadajuć z našymi mahčymaściami», — skazaŭ Zankaviec.

Adkazvajučy na pytańnie ab žadańni znoŭ stać pretendentam na pasadu hałoŭnaha treniera zbornaj, śpiecyjalist zajaviŭ, što nie vyklučaje luboha raźvićcia padziej. «Adzinaje, što pavinny być peŭnyja ŭmovy, pry jakich hety varyjant mahčymy. U ahulnych rysach, heta padychod da raźvićcia ŭnutranaha čempijanatu plus maje asabistyja abstaviny pavinny dazvolić hetym zajmacca. Pažadana, kab trenier na praciahu siezona byŭ uvieś čas u hulniovym tonusie. Tamu mnie nieabchodna praca ŭ kłubie», — adznačyŭ Zankaviec.

Čempijanat śvietu ŭ Słavakii staŭ dla jaho «dadatkovym adukacyjnym urokam — heta značyć, vobrazna kažučy, prajšoŭ navučańnie jašče ŭ adnoj ustanovie, pryčym paskoranaje, darahoje». «Ja atrymaŭ peŭnyja viedy, vopyt, zasnavany ŭ tym liku na ŭłasnych pamyłkach. Dla mianie heta darahi vopyt, jaki, spadziajusia, nadalej budzie karysnym. Kali paraŭnoŭvać z papiarednim čempijanatam śvietu, to ja b hety čempijanat nie pramianiaŭ by na papiaredni», — zajaviŭ trenier.

«Dniami» Zankaviec «pačaŭ ruch u bok pošuku miesca pracy». «Pakul kankretnych varyjantaŭ niama, ale zaraz pošuk źviazany z kłubami za miežami Biełarusi. Heta nie abaviazkova KCHŁ», — skazaŭ jon.

Pra svaich mahčymych pierajemnikach Zankaviec nie zadumvaŭsia. «Hety štab zakončyŭ svajo isnavańnie. Kožny, chto pracavaŭ u im, — kvalifikavany śpiecyjalist. Usie prystojnyja ludzi, tamu i Andryjeŭski, i Cypłakoŭ, i Husaŭ mahli b uznačalić kamandu», — ličyć jon.

20 maja ŭ Ministerstvie sportu i turyzmu adbudziecca sumiesnaje pasiadžeńnie kalehii viedamstva, vykankamaŭ NAK i FCHRB, na jakim buduć padviedzieny vyniki vystupleńnia chakiejnaj zbornaj na ČS u Słavakii. Zankaviec maje namier tam prysutničać.

• 0
• 0
• 0
• 0
• 0
• 0
• 0
• 0