«Rabočych začyniajuć u cechach, kab jany nie krali. A jany zhareli»

Aficyjnaja pryčyna pažaru na aršanskim miasakanservavym kambinacie, u časie jakoha zahinuli 4 čałavieki, — parušeńni techniki biaśpieki padčas praviadzieńnia zvaračnych prac. Adnak tamtejšyja rabočyja raspaviadajuć pra inšyja parušeńni supraćpažarnych patrabavańniaŭ z boku kiraŭnictva pradpryjemstva.

Pavodle aficyjnaj infarmacyi MNS, pažar, jaki zdaryŭsia na aršanskim miasakanservavym kambinacie 24 traŭnia, pačaŭsia tamu, što była parušana technika biaśpieki pry zvarcy, kali viali ramont u halerei cechu chaładzilnych ustanovak. Halereja pryznačana dla razmarožvańnia miasa. Jana złučaje cech chaładzilnych ustanovak z cechami, dzie robiać kiłbasu i kanservy, tłumačać rabočyja.

«Zahinuła žančyna-pensijanerka, jakaja pracavała vachciorkaj pamiž cecham, dzie adbyvajecca zaboj skata, i chaładzilnym cecham. Bo ŭ nas z cechu ŭ cech tak prosta nia trapiš — niekatoryja navat začyniajuć na zamok na ŭvieś pracoŭny dzień, kab rabotniki nia krali miasa. Byvali vypadki, kali z cechu chaładzilnych ustanovak vykidali marožanyja śvinyja tušy praz vakno… I heta taksama ž parušeńnie supraćpažarnaj biaśpieki — kali čałaviek nia moža pakinuć pamiaškańnie. A jašče ŭ nas tut usio ramantavali i abšyli ŭsio, što možna, plastykavymi panelami. Jany harać duža chutka, i smurod tady atrutny. Ludzi ŭ cechu chaładzilnych ustanovak apynulisia ŭ izalacyi: u susiedni cech nia trapić, a ŭ halerei hareŭ plastyk i ciepłaizalacyja», — na ŭmovach ananimnaści raspavioŭ rabotnik pradpryjemstva.

Jašče troje zahinułych — mužčyny siaredniaha vieku. Pavodle aficyjnaj infarmacyi MNS, jany mieli mahčymaść uratavacca, ale zamiest hetaha sprabavali tušyć pažar. Supracoŭniki supraćpažarnaj i hazadymaabarončaj słužbaŭ vyratavali z pažaru 9 čałaviek i jašče 14 — evakuiravali.

Aršanskaja haradzkaja prakuratura raspačała kryminalnuju spravu pavodle častki 3 artykuła 306 — «Parušeńnie praviłaŭ achovy pracy, jakoje paciahnuła za saboj praź nieaściarožnaść śmierć čałavieka abo naniasieńnie ciažkoha cialesnaha paškodžańnia dźvium i bolš asobam». Niekatoryja rabotniki ličać, što pra nieaściarožnaść havorki nie pavinna iści, bo izalacyja rabočych u cechach — heta vidavočnaje parušeńnie techniki biaśpieki.

Akaličnaści pažaru na miasakanservavym kambinacie buduć pilna vyvučacca jašče j tamu, što z 24 traŭnia ŭ Voršy i Aršanskim rajonie pracuje kamisija MNS, jakaja vyvučaje, siarod inšaha, i stan supraćpažarnaj biaśpieki na pradpryjemstvach.

• 0
• 0
• 0
• 0
• 0
• 0
• 0
• 0