«U nas niama kankurentaŭ». Biełaruska raskazała, jak adkryła papularny barbieršop u rajcentry
Hanna Šybka ŭ tandemie ź siabroŭkaj adkryła pieršy barbieršop u nievialikim haradku pad Minskam. Stylny sałon va Uździe chutka staŭ papularnym. Pa modnyja stryžki miascovyja žychary vystrajvajucca ŭ čarhu, choć i praciahvajuć pa zvyčcy nazyvać novaje miesca cyrulniaj. Barbier raspaviała Myfin pra ŭkładańni, zarobak i asabistuju sistemu nazapašvańniaŭ.
Ź sielskaj cyrulnicy ŭ barbiery: jak Hanna znajšła svaju nišu
Hanna vučyłasia ŭ Minskim technałahičnym kaledžy, paśla navučańnia viarnułasia va Uzdu, dzie stała pracavać cyrulnicaj-univiersałam. Pieršym pracoŭnym miescam staŭ kambinat bytavoha absłuhoŭvańnia. Časam vyjazdžała na pracu ŭ susiednija vioski (akazvała pasłuhu tak zvanaha vyjezdnoha servisu). Paśla piaci hadoŭ takoj pracy dziaŭčyna vyrašyła pracavać sama na siabie — stała stryhčy doma, ale nieŭzabavie ŭładkavałasia pa najmie adnačasova i ŭ miascovy ŭzdienski sałon na 0,25 staŭki, i ŭ minskuju cyrulniu.
Nieŭzabavie majstar zrazumieła, što choča stać barbieram i stryhčy vyklučna mužčyn — tamu što heta svabodnaja niša ŭ maleńkim horadzie. Adpraviłasia na śpiecyjalizavanyja kursy. U skarboncy dziaŭčyny — majstar-kłasy pa roznych technikach stryžak, a taksama pa afarmleńni i haleńni barady.
Navošta vučycca i tracić na heta hrošy? Hanna padkreślivaje, što heta dazvalaje raści jak prafiesijanału.
Praca pa najmie doŭžyłasia na praciahu troch hadoŭ. Hanna stała mienš stryhčy ŭ Minsku, zasiarodziŭšysia na klijentach va Uździe. Praź niejki čas dziaŭčyna ŭbačyła abjavu ab zdačy ŭ arendu pamiaškańnia, jakoje jana daŭno prykmieciła. U hetym miescy paśpieli pabyvać mahazin, cyrulnia, zaatavary i majsternia pa ramoncie klučoŭ. Łakacyja ŭ centry z dobraj prachodnaściu stała vyznačalnym faktaram u žadańni pracavać na siabie.
— Jak tolki my ź siastroj ubačyli abjavu «Arenda», ja adrazu ž patelefanavała, kab abmierkavać detali.
Taksama Hanna zaručyłasia padtrymkaj siabroŭki, jakaja paśla stała nadziejnym biznes-partnioram.
Na starcie było ŭsiaho $200. Dzie ŭziali astatnija hrošy na adkryćcio?
Kapitał barbiera na starcie składaŭ ścipłyja $200, choć hrošaj treba było ŭ dziasiatki razoŭ bolš. Pryjšłosia šmat pracavać, kab zrabić ramont. Dziaŭčyna adznačaje, što ŭ sałonie całkam pierarabili ścieny, stol i padłohu, nie mianiajučy tolki akno. Ahulnyja ŭkładańni siabrovak skłali kala $5 000.
— Muž siabroŭki zajmajecca budoŭlaj. Jon vielmi dapamoh u abnaŭleńni prastory. Za pracu my nie płacili, tolki za materyjały i abstalavańnie. Usio nieabchodnaje zakazali ŭ Kitai. Taksama źviartalisia pa dapamohu da daŭnich klijentaŭ. Takim čynam u nas źjavilisia lusterki. Ličym, što ŭdałosia dobra zekanomić. Pry hetym daviałosia pazyčyć krychu hrošaj u siabroŭki.
Ludzi adrazu ž pačali prychodzić i cikavicca pasłuhami. Sałon znachodzicca ŭ centry horada, dzie zasiarodžana bolšaja kolkaść piacipaviarchovikaŭ, tamu prapuścić barbieršop niemahčyma. Dziaŭčaty pryjšli sa svajoj klijenckaj bazaj, jakaja stała pašyracca dziakujučy «sarafannamu radyjo». Akazałasia, što ŭ maleńkim horadzie nie patrebny tarhiet. Akramia taho, miascovych žycharoŭ pryciahnuŭ niezvyčajny interjer. U barbieršopie «Kultura» šmat pradmietaŭ ručnoj pracy, jość dreva, mietał i chrom. Majstar padkreślivaje, što nie zaŭsiody sustrakała padobnyja detali navat u staličnych sałonach.
Vydatki barbieršopa
Hanna pracuje tolki z mužčynami, a jaje siabroŭka zajmajecca žanočymi i mužčynskimi pryčoskami. Taksama ŭ sałonie robiać stryžku i taniroŭku barady, jość i pasłuha pa vydaleńni vałasoŭ voskam z nosa i vušej. Dziaŭčyna adznačaje, što pracuje nie kožny dzień i nie staić na nahach sutkami.
Dziciačaja stryžka kaštuje 15—20 rubloŭ, mužčynskaja — 25—30 rubloŭ, stryžka i afarmleńnie barady abyducca ŭ 40 rubloŭ.
— U našym horadzie šmat majstroŭ i sałonaŭ. Navieści pryhažość možna taksama ŭ cyrulnikaŭ doma. Varta adznačyć, što dobrych śpiecyjalistaŭ vielmi mała, a tych, chto śpiecyjalizujecca na mužčynskich stryžkach, i zusim niama. U asnoŭnym usie ŭniviersały. Naprykład, kamuflaž barady na dobraj kaśmietycy nie robić nichto. Kankurencyi ŭ nas niama.
Arenda pamiaškańnia i kamunałka abychodziacca dziaŭčatam u 500 rubloŭ. Na pieršy čas patrebnuju kaśmietyku majstry zakazali zahadzia, vyłučyŭšy 300 rubloŭ. Klijenty sałona taksama mohuć padabrać nieabchodnyja dahladnyja srodki, tamu zapasy pastajanna papaŭniajuć.
Adzin dzień na tydzień Hanna pa-raniejšamu stryže ŭ Minsku. Jana aranduje kavorkinh, što zručna dla žycharoŭ Uzdy, jakija vučacca abo pracujuć u stalicy. Pry hetym dziaŭčyna padkreślivaje, što jeździć nie dziela taho, kab pabolš zarabić. Vyjezdy dapamahajuć raźviejacca i pahutaryć ź siabrami.
Kamu admaŭlajuć u pasłuhach?
Pa słovach Hanny, pryhažość navodziać usie — ad małoha da vialikaha. U barbieršop prychodziać navat ź niemaŭlatami na rukach. Samym junym klijentam «Kultury» ŭsiaho 10 miesiacaŭ. Niepadaloku znachodzicca škoła, tamu časta ŭ kresła da majstra sadziacca i padletki. Pastryhčy dzietsadaŭca — 15 rubloŭ, a školnika — 20. Pry hetym Hanna adznačaje, što stryhčy maleńkich dziaciej najciažej, i košt pavinien być vyšejšym.
— Jość dzieci, jakija błaha siadziać na adnym miescy abo tolki na rukach u baćkoŭ. Jak praviła, jany bajacca i płačuć, a jašče kruciacca. Kryčać na čužoje dziciaci nielha — treba prykłaści šmat namahańniaŭ i ciarpieńnia.
Hanna ličyć siabie majstram-ščaśliŭčykam, tamu što nie sustrakała klijentaŭ z vošami, a voś kalehi sutykalisia z padobnym. Adnak da barbiera prychodzili mužčyny ŭ stanie ałkaholnaha apjanieńnia, jakim adrazu ž było admoŭlena ŭ pasłuzie. Da taho, što dzieci i darosłyja mohuć zasnuć padčas pracedury, majstar užo pryvykła.
— Vypadak, jaki zapomniŭsia, adbyŭsia padčas pracy pa najmie. Mnie zapisali klijenta, jaki ŭsiu stryžku siadzieŭ ź niezadavolenym tvaram. Viadoma, pačynaješ siabie nakručvać i pieražyvać. Ja ŭdakładniła, ci mahu niešta vypravić. Mužčyna adkazaŭ, što stryžka dobraja, ale jamu ciažka vytrymlivać čužyja dotyki, i prychodzicca ź ciažkaściu ciarpieć usie manipulacyi. Ja paprasiła administratara bolš jaho da mianie nie zapisvać.
Siem klijentaŭ za źmienu. Kolki zarablaje barbier u nievialikim horadzie?
Hanna pryznajecca, što čym bolš zarablaje, tym bolš joj chočacca pavialičyć prybytak.
— Ja tranžyra, pastajanna kuplaju novuju vopratku. Vielmi mocna lublu tracić hrošy na toje, što treba i nie treba, tamu imknusia bolš pracavać.
Dziaŭčyna ŭpeŭniena, što nazapašvać realna navat pry maleńkim dachodzie. U barbiera majecca ŭłasnaja sistema kanviertaŭ. Naprykład, asobnyja dla padarožžaŭ, pracoŭnych momantaŭ i dziavočych «chaciełak». Taksama jość źbieražeńni na niepradbačanyja vydatki. Hanna padkreślivaje, što takich kanviertaŭ u jaje šmat, i kožny treba papoŭnić. Takim čynam, u dziaŭčyny atrymlivajecca padarožničać: viasnoj była ŭ Murmansku, a asieńni adpačynak praviała ŭ Hruzii.
Majstar pracuje nie štodnia, a za źmienu moža absłužyć minimum siemiarych. Pry hetym kali ŭ kreśle šmat dziaciej, to vyjści na prystojnuju sumu nie atrymlivajecca.
— Moj vykładčyk u kaledžy kazaŭ, što prafiesija cyrulnika zaŭsiody dazvolić zarabić na chleb z masłam, a vielmi dobryja śpiecyjalisty zmohuć zarabić jašče i na ikru. Ikru my pieryjadyčna jamo, ale nie kožny dzień. Klijentaŭ chapaje, tak što zarobak dla našaha horada davoli niadrenny.
Ciapier čytajuć
Zamiest pareštkaŭ Vitaŭta za ścianoj Vilenskaj katedry znajšli tolki kuču kamianioŭ. Ale ŭłady Litvy hatovyja vydatkavać na praciah pošukaŭ jašče 1,5 miljona jeŭra2828
Kamientary