«Milinkievič taki prosty i dušeŭny! I hołas u jaho pryjemny!».
Śviatočnym kancertam u party‑bufiecie «JOJO» 29 śniežnia «Indiga» razam sa svaimi prychilnikami adznačyć nadychod Novaha hodu! «Nie abyjdziecca biez sapraŭdnych kaladnych padarunkaŭ!» – abiacaje Rusia. Kožny addany «indyhanavy» fen pry nabyćci kvitku atrymaje asabisty numar, a ŭ čas kancertu, jak sapraŭdnyja prychilniki super‑hulni «Super Łato», «Indiga» zładzić siarod słuchačoŭ svajo łato, kaladna‑indyhanaŭskaje: uładalnik ščaślivaha numaru atrymaje ad hurta ŭ padarunak maleńkuju jalinku. «Nam by chaciełasia sustreć hety Novy hod z kožnym našym słuchačom, ‑ raspaviadaje Rusia, ‑ ale ž heta niemahčyma. Tamu hetaja jalinka stanie častkaj našaha ščyraha serca, i na Novy hod my budziem razam!»
Kaladny kancert «Indiga» ładzić razam z maładym hurtom NHS‑ethno, jaki na pačatku śniežnia pieramoh na samym bujnym festyvali folkavaj muzyki ŭ Polščy – Mikolajki Folkowe. Miž inšym, možna skazać, što «Indiga» peŭnym čynam spryčyniłasia da hetaje pieramohi maładoha hurtu: «My vielmi ŭrazilisia vystupam NHS‑ethno, kali hrali razam na niejkim kancercie, ‑ kaža Rusia, ‑ a tamu paraili hurt pradusaru Iharu Znyku, jaki vyciahnuŭ ich na hety fest, dzie NHS‑ethno i ŭziali hałoŭnyja ŭznaharody! «. Na kaladnym kancercie ŭ «JOJO» «Indiga» razam z NHS‑ethno vykanaje dla słuchačoŭ kaladnuju piesieńku pra zajeńku, kab stvaryć sapraŭdny kaladny nastroj!
U čas padrychtoŭki da kancertu, Rusia zapisvała kaladnuju prahramu na radyjo "Racyja2. I, miž inšym, prapanavała praśpiavać razam kaladnuju pieśniu «Ho‑ho, kaza» palityku Alaksandru Milinkieviču. «Ja navat nie čakała, čto sp. Alaksandar pahadzicca razam sa mnoj praśpiavać i dla mianie stała pryjemnym siurpryzam toje, što jon taki prosty i dušeŭny čałaviek. I hołas u jaho dobry! Možna navat padumać pra sumiesnyja śpievy Milinkieviča ź biełaruskimi artystami. A što? ‑ uśmichajecca Rusia, ‑ nie zaŭsiody ž palitykaj zajmacca!».
Kamientary