U suviazi z hibiellu ŭ avijakatastrofie jarasłaŭskaha «Łakamatyva» prodaž biletaŭ na matčy chakiejnaha kłuba «Dynama» (Minsk) časova spynieny, paviedamiŭ BiełaPAN pres-ataše kamandy Aleh Šybieka.
8 vieraśnia «Dynama» i «Łakamatyŭ» pavinny byli sustrecca na «Minsk-Arenie» ŭ pieršym tury novaha siezona Kantynientalnaj chakiejnaj lihi. Na 10 vieraśnia zapłanavana sustreča «Dynama» z mahnitahorskim «Mietałurham», na 12-je — z omskim «Avanhardam», na 14-je — z chanty-mansijskaj «Juhroj», na 16-je — ź nižaharodskim «Tarpieda».
Kiraŭnictva «Dynama» abmiarkoŭvaje farmat praviadzieńnia žałobnych mierapryjemstvaŭ u suviazi z trahiedyjaj. Kala «Minsk-Areny» pryspuščany ściahi, vyviešany łahatyp «Łakamatyva», da jakoha možna prynosić kvietki.
«Kamanda ŭsia ŭ šoku. „Łakamatyŭ“ vydatna hladzieŭsia ŭ niadaŭnim matčy z nami na turniry ŭ Ryzie, tam dobra vyhladali i hulcy biełaruskaj zbornaj… Mnie telefanujuć žurnalisty, ale ŭ mianie prosta niama słoŭ. Spačuvańni ŭsim rodnym, siemjam zahinułych…» — zajaviŭ pres-słužbie «Dynama» vice-kapitan kamandy Andrej Michaloŭ.
Samalot Jak-42 raźbiŭsia pry vylecie z aeraporta Tunošna ŭ Jarasłaŭskaj vobłaści. Pavodle papiaredniaj infarmacyi, zahinuli 43 čałavieki i vyžyli dvoje — chakieist Alaksandr Halimaŭ i bortpravadnik Alaksandr Sizoŭ. Siarod zahinułych — biełaruskija chakieisty Rusłan Salej i Siarhiej Astapčuk. Šerah ŚMI paviedamiŭ, što Saleju ŭdałosia paźbiehnuć hibieli, bo jon byccam by prybyŭ u Minsk raniej. Niama jaho proźvišča ŭ kančatkovym śpisie zahinułych, apublikavanym resursam lifenews.ru. U toj ža čas, pavodle słoŭ pres-ataše «Dynama», za dźvie hadziny da vyletu Salej źviazvaŭsia z kłubam, kab paprasić vydzielić bilety na matč dla svajakoŭ.
U suviazi z katastrofaj pieraniesieny zapłanavany na 7 vieraśnia matč-adkryćcio čempijanatu Biełarusi pa chakiei pamiž minskim «Junactvam» i hrodzienskim «Niomanam».
Kamientary