«... I napieradzie kalony, abniaŭšysia, iduć Paŭličenka i Bandarenka»

Kaardynatar «Chartyi'97» Źmicier Bandarenka prapanavaŭ abvieścić 25 Sakavika dziaržaŭnym śviatam – Dniom voli i jadnańnia, adznačyŭšy jaho supolnaj akcyjaj uładaŭ i apazycyi ŭ abaronu niezaležnaści Biełarusi pad lozunham «Za Svabodu! Za Biełaruś!».

«25 sakavika 2007 h. pavinna stać dziaržaŭnym śviatam – Dniom Jadnańnia i Prymireńnia ŭsich biełarusaŭ. Ciapier nia čas padzialać biełarusaŭ na «svaich» i «čužych». Samo žyćcio prymušaje biełarusaŭ jadnacca. (…) U śviatkavańni pavinny ŭziać udzieł kiraŭnictva krainy i lidery apazycyi, staršynia Rady BNR Ivonka Surviłła, kiraŭniki pravasłaŭnaj i katalickaj cerkvaŭ, inšych kanfesij, viadomyja hramadzkija i kulturnyja dziejačy. Ułada ŭ svaju čarhu pavinna zrabić kroki nasustrač: akramia abviaščeńnia 25 Sakavika dziaržaŭnym śviatam, pavinny być vyzvalenyja ŭsie palityčnyja viaźni i zroblenaja zajava kiraŭnictva krainy pra pačatak adkrytaha dyjalohu z apazycyjaj. A devizam ahulnanacyjanalnaj akcyi prymireńnia i jadnańnia 25 sakavika 2007 h. mohuć stać słovy – «Za Svabodu! Za Biełaruś!», — havorycca ŭ zajavie Z. Bandarenki.

Što dumajuć pra mahčymaść praviadzieńnia takoj akcyi pradstaŭniki apazycyjnych palityčnych partyjaŭ, pradstaŭniki ŭładaŭ, dziejačy kultury?

Deputat Siarhiej Kaścian miarkuje, što «Pamiž biełarusami nie było nijakaj vajny, tamu nia moža być nijakaha dnia prymireńnia i jadnańnia. Tym bolš z takoj apazycyjaj, jakuju my majem u Biełarusi. Viadoma, apazycyja patrebnaja ŭ hramadztvie, ale patrebnaja takaja apazycyja, jakaja b nia jeździła na Zachad i nie patrabavała nijakich sankcyjaŭ suprać aficyjnaha Miensku. Niachaj apazycyja taksama pracuje dziela taho, kab kraina kvitnieła i raźvivałasia. Nia treba nijaki šum i mitynhi ŭładam nie patrebnyja, ludzi i tak bačać, što jany robiać dla dabra krainy».

Partyja BNF u svaju čarhu pryniała rašeńnie sklikać arhkamitet śviatkavańnia Dnia Voli. «25 Sakavika musić stać hałoŭnym dniom viasny‑2007, – śćviardžaje Vincuk Viačorka. – 25 Sakavika musić stać nahodaj dla ahučvańnia našych padychodaŭ da budučyni Biełarusi. Siońnia jość tupik u raźvićci biełaruskaj ekanomiki, tupik u raźvićci biełaruskaj dziaržaŭnaści. I vyjście z usiaho hetaha – terminovyja demakratyčnyja reformy. Jany dazvolać nam viarnucca ŭ Eŭropu, atrymlivać surjoznuju dapamohu z boku Eŭraźviazu i ZŠA. Jak śćviardžaje ŭłada, niezaležnaść jość kaštoŭnaściu j dla jaje. Takim čynam ułada atrymlivaje mahčymaść zaśviedčyć, što na hlebie Niezaležnaści jana moža jadnacca z demakratyčnymi siłami».

Piśmieńnik Uładzimier Arłoŭ u svaju čarhu miarkuje, što «jadnańnie» biełaruskaha narodu i tak štohod adbyvajucca na Dzień Voli, «kali pradstaŭniki pravaachoŭnych orhanaŭ źbivali tych, chto prychodziŭ adznačyć hety dzień na płoščy Miensku i inšych haradoŭ. Ludzi roznych palityčnych pierakanańniaŭ u hety dzień užo daŭno źbirajucca ŭ adnych i tych miescach. Toj ža milicyi na Dzień Voli vydajuć admysłovuju śviatočnuju ekipiroŭku. Što da sioletniaha śviatkavańnia, to ja nia baču symptomaŭ, kab jano skłałasia nie pa tradycyi apošnich hadoŭ. Što da perspektyvy, to ja ŭpeŭnieny, što 25 Sakavika stanie dziaržaŭnym śviatam».

Muzyka hurtoŭ N.R.M. i «Harackija» Pit Paŭłaŭ nakont sumiesnaha ŭdziełu ŭ kancercie 25 Sakavika razam z praŭładnymi muzykami: «Hałoŭnaje, kab z nami była papiaredniaja damoŭlenaść, kab byli abmierkavanyja ŭsie kroki pa ŭdziele. Kali takoha nia budzie, to my vidavočna nia budziem udzielničać. Patencyjna ž my nia suprać».

Staršynia Abjadnanaj hramadzianskaj partyi Anatol Labiedźka ličyć, što ideja cikavaja, ale małarealistyčnaja: «Ideja kreatyŭnaja. Pierad vačyma ŭ mianie adrazu prabiahajuć nastupnyja kadry jadnańnia na Śvisłačy. Pieršaj chvalaj iduć Łukašenka z Šejmanam, druhoj – Milinkievič, Kalakin, Labiedźka, a napieradzie ŭsioj hetaj kalony iduć abniaŭšysia Dźmitry Paŭličenka i Źmicier Bandarenka. Karcina amal kazačnaja, ale nia vielmi realistyčnaja. Siońnia ja słaba pradstaŭlaju takoje raźvićcio padziejaŭ, bo my dobra viedajem, što ŭjaŭlaje saboj hetaja ŭłada. Adnak padobnyja mesydžy i nadalej pavinny sychodzić z našaha boku».

• 0
• 0
• 0
• 0
• 0
• 0
• 0
• 0