Sud: pryhavaryć da rasstrełu

16:31

Luboŭ Kavalova, usia sčarniełaja ad pieražyvańnia, usio ž prakamientavała žurnalistam prysud. Jana ličyć spravu sfabrykavanaj.

Luboŭ Kavalova zaznačyła, što napisała zajavu ab pamiłavańni na imia Łukašenki.

Pravaabaronca Ludmiła Hraznova zajaviła, što sudździa Fiedarcoŭ unik ad hałoŭnaha pytańnia, nijak pra prakamientavaŭ chadajnictvy advakata, a taksama nie razhledzieŭ toj fakt, što ludzi, paciarpiełyja padčas teraktu ŭ minskim mietro, byli ranienyja bietonam, a nie šarykami, jakimi była načyniena vybuchoŭka. Ludmiła Hraznova skazała, što vystup sudździ byŭ jašče horšy, čym prakurora.

16:25

Niekatoryja ludzi sustreli prysud sa ślaźmi. Maci Uładzisłava Kavalova pakul kamientaroŭ nie daje.

Častka ludziej stałaha ŭzrostu ŭchvalaje rasstreł. Pieravažna heta piensijaniery. Adna ź piensijanierak kaža: «Mała im im było 19 śniežnia [akcyi pratestu paśla preidenckich vybaraŭ], dyk jany jašče i 11 krasavika arhanizavali».

15:30

Viarchoŭny sud pastanaviŭ pryhavaryć Dźmitryja Kanavałava i Uładzisłava Kavalova da rasstrełu. Sudździa patłumačyŭ takoje rašeńnie vyklučnaj niebiaśpiekaj dla hramadstva, jakuju ŭjaŭlajuć saboj Kanałavaŭ i Kavaloŭ, pad uvahu byŭ pryniaty fakt, što jany złačynstvy ździajśnialii nieadnarazova. Abskardzić prysud nielha.

Taksama sudździa spasłaŭsia na zaklučeńnie ekśpiertaŭ, jakija ŭstanavili, što ŭ Kanavałava była patałahičnaja ciaha da vybuchaŭ.

Sudździa nie vyjaviŭ na videa ŭ mietro faktaŭ mantažu, taksama sudździa Fiedarcoŭ zaznačyŭ, što videa było vyniata biez parušeńnia zakanadaŭstva, na što źviartali ŭvahu advakaty.

Jon patłumačyŭ, čamu nie było vybuchovaha rečyva na Kanavałavu i Kavalovu: jano było vyrablena zahadzia i dastaŭlena ŭ hiermietyčnych jomistaściach.

Kanavałaŭ i Kavaloŭ taksama pavinny vypłacić kampiensacyju paciarpiełym.

Sud kvalifikavaŭ dziejańni Kanavałava pa epizodach dvuch vybuchaŭ u Viciebsku na padstavie čč. 1 i 2 art. 289 KK (teraryzm). Pavodle słoŭ Fiedarcova, Kanavałaŭ učyniŭ vybuchi «z metaj zapałochvańnia nasielnictva».

Što da vybuchu ŭ Minsku na śviatkavańni Dnia Niezaležnaści, to, jak adznačyŭ Fiedarcoŭ, Kanavałaŭ pryznaŭ svaju vinu va ŭčynieńni terakta 4 lipienia 2008 hoda z metaj destabilizacyi stanovišča. Jon vyrabiŭ dźvie vybuchovyja pryłady, adna ź jakich spracavała ŭ 0.23 4 lipienia, druhaja — była znojdziena i abiasškodžana.

Pavodle słoŭ sudździ, na abiasškodžanaj samarobnaj vybuchovaj pryładzie (SVP) byli vyjaŭleny adbitki palcaŭ Kanavałava i hienietyčny materyjał, jaki naležyć Kanavałavu.

Ekśpiertyza pakazała anałahičnaść vyrabu abodvuch SVP, vybuchovaha rečyva ŭ ich, paražalnych elemientaŭ, elemientaŭ siłkavańnia, skručvańnia i spajki pravadoŭ. Bolš za toje, jak zajaviŭ sudździa, kavałak izalacyjnaj stužki ŭ adnym SVP akazaŭsia praciaham kavałku izalacyjnaj stužki, vykarystanaj u inšym SVP.

Takim čynam, zajaviŭ Fiedarcoŭ, vina Kanavałava ŭ terakcie, pavodle mierkavańnia suda, dakazana.

Što tyčycca Uładzisłava Kavalova, to jon, pavodle słoŭ sudździ, viedaŭ pra ŭčynieńnie Kanavałavym asabliva ciažkaha złačynstva, pra padrychtoŭku teraktaŭ u 2005 i 2008 hadach, pra asobaŭ, jakija ich učynili, ale nie paviedamiŭ pra heta ŭ pravaachoŭnyja orhany. Sud kvalifikavaŭ jaho dziejańni pavodle čč. 1 i 2 art. 406 KK (niedaniasieńnie pra złačynstva).

«Vina abvinavačanych paćviardžajecca sukupnaściu sabranych pa spravie i daśledavanych u sudzie dokazaŭ», — zajaviŭ Fiedarcoŭ.

Kavaloŭ słuchaŭ pryhavor spakojna, Kanavałaŭ — adstaroniena.

BiełaPAN

13.15

Abvieščany pierapynak da 14:00.

Sud paličyŭ, što vina Kanavałava nie dakazana ŭ padpale hazietnaha šapika ŭ 2002 hodzie ŭ Viciebsku, a Kavaloŭ apraŭdany pa vybuchach u Viciebsku 14 i 22 vieraśnia 2005 hoda (jaho vinavacili ŭ tym, što niedanios na Kanavałava). U astatnim vyrak suda supadaje z pazicyjaj abvinavačvańnia.

12.20

Sud ustanaviŭ, što ekśpierymientalnyja vybuchi ŭ lesie i na palihonie Kanavałaŭ pravodziŭ z 2004 hoda. Zdymki vybuchaŭ i ich vynikaŭ znojdzienyja na fłeš-kartach pamiaci, zabranych u Kanavałava. Na adnym sa zdymkaŭ zafiksavanyja palcy Kanavałava. Apošni zapis datavany studzieniem 2011 hoda. U padvale Kanavałava znojdzienyja saletra, aluminijevaja pudra, trypierakis acetonu i inšyja rečyvy, a taksama elemienty samarobnych prystasavańniaŭ, detanataraŭ, prydatnyja dla ažyćciaŭleńnia vybuchu. Kanfiskavany ŭ padvale Kanavałava detanatar identyčny detanataru, jaki byŭ znojdzieny ŭ prystasavańni, jakoje nie vybuchnuła 4 lipienia 2008 hoda ŭ Minsku. Sud ličyć dakazanaj vinu Kanavałava ŭ nabyćci i vyrabie vybuchovych rečyvaŭ.

12.25

Pa vybuchach u Viciebsku ŭ vieraśni 2005 hoda, pierad prezidenckimi vybarami, sud taksama pryznaŭ vinavatym Kanavałava.

11.30

Sud ustanaviŭ, što Kanavałaŭ ažyćciaviŭ akt teraryzmu 11 krasavika 2011 hodu ŭ Minsku, zdabyŭšy vybuchovaje prystasavańnie ŭ Viciebsku. Kavaloŭ razam z Kanavałavym dastaviŭ vybuchovaje prystasavańnie na zdymnuju kvateru i ažyćciaŭlaŭ pasobnictva Kanavałavu ŭ pryviadzieńni prystasavańnia ŭ bajavy stan. Kanavałaŭ pryznany vinavatym u tym, što pryvioz prystasavańnie ŭ mietro i ździejśniŭ vybuch. Sudździa nazyvaje proźviščy ŭsich 15 zahibłych i kala dvuchsot paranienych, paviedamlaje radyjo «Svaboda».

11.25

Kanavałaŭ pryznany vinavatym taksama ŭ ažyćciaŭleńni vybuchu na 3 Lipienia 2008 hoda ŭ Minsku. Kavaloŭ i pa hetym epizodzie pryznany vinavatym u niedaniasieńni.

11.20

Sudździa zaznačyŭ, što Kavaloŭ dakładna viedaŭ pra hetyja dziejańni Kanavałava i nie paviedamiŭ pra heta kampietentnym orhanam.

11.10

Spačatku sud ustanaviŭ viciebskija epizody — abvinavačanyja ździejśnili vybuchi ŭ padjezdach žyłych damoŭ, raźbili šyby dziciačaj biblijateki, ustaloŭvali raściažki na ściažynach, padpalvali kijosk. Kanavałaŭ nabyvaŭ tracił i zachoŭvaŭ jaho. Kanavałaŭ nie mieniej za 10 razoŭ vyrablaŭ vybuchovyja prystasavańni z trypierakisu acetonu, a taksama inšych rečyvaŭ i vypraboŭvaŭ ich u lesapasadcy.

11:09

Paciarpiełyja paprasili sud abviaścić vyrak całkam. Takim čynam prysud pa spravie ab terakcie ŭ minskim mietro, jaki składaje 114 listoŭ, budzie začytvacca całkam. Pavodle słovach sudździ Viarchoŭnaha suda Alaksandra Fiedarcova, abviaščeńnie prysudu zojmie 4–5 hadzin.

Sa zhody ŭsich udzielnikaŭ pracesu možna było začytać tolki vynikovuju častku prysudu, jakaja składaje 14 listoŭ, adnak niekatoryja paciarpiełyja zapatrabavali začytać jaho całkam, paviedamlaje BiełaPAN.

Abviaščeńnie prysudu pačałosia prykładna ŭ 11:05.

Pasiadžeńnie pačałosia. Žurnalistaŭ z fota- videkamierami ŭ zału nie puścili.

Mabilnaja suviaź u zale suda pa-raniejšamu nie pracuje.

10.55

Apošnimi ŭ zału zaviali abvinavačanych — pryhnutymi, tvarami ŭniz. Ich achoŭvaje 20 milicyjantaŭ — 6 na scenie i 14 pad scenaj. Na tvary Kanavałava nijakich emocyj, Kavaloŭ razhubleny, uhladajecca ŭ zału, šukaje kahości. Zała zapoŭnienaja tolki na pałovu. Mabilnaja suviaź u zale adklučanaja. Advakaty viaduć pieramovy z padsudnymi, pieradaje radyjo «Svaboda».

* * *

Abviaščeńnie prysudu pačniecca ab 11-j hadzinie ŭ staličnym Domie pravasudździa, što pa adrasie Siamaški, 33 (rajon 9-j kliničnaj balnicy). Dźmitryja Kanavałava i Uładzisłava Kavalova vinavaciać u arhanizacyi vybucha ŭ minskim mietro 11 krasavika, u vyniku jakoha zahinuli i pamierli ad ran 15 čałaviek, a traŭmy atrymali 387 čałaviek. 14 listapada namieśnik hienprakurora Alaksiej Stuk paprasiŭ sud pryhavaryć Kanavałava i Kavalova da vyšejšaj miery pakarańnia — śmiarotnaj kary. Abvinavačańnie ličyć, što ich vinavataść pa ŭsich epizodach paćviardžajecca vyvučanymi ŭ sudzie dovadami, abstavinaŭ, jakija źmiakčajuć vinu abvinavačvanych, nie ŭstanoŭlena.

Maci Uładzisłava Kavalova Luboŭ, stojačy na prystupkach suda skazała, paviedamlaje Radyjo Svaboda, što jana choča, kab začytali ŭvieś vyrak. Tady ludzi zmohuć pabačyć, ci jość niejkija dokazy vinavataści padazravanych.

Kala ścienaŭ suda ŭžo niekalki dziasiatkaŭ žurnalistaŭ.

Abvinavaŭcy razhladajuć Kanavałava i Kavalova, sud nad jakimi pačaŭsia 14 vieraśnia, jak «vyklučna niebiaśpiečnych dla hramadstva i dziaržavy».

Tak, D. Kanavałaŭ abvinavačvajecca ŭ ździajśnieńni złačynstvaŭ, praduhledžanych č. 1, 2, 3 art. 289 KK (teraryzm), čč. 2, 3 art. 295 (niezakonny abarot zbroi, bojeprypasaŭ, vybuchovych rečyvaŭ), čč. 2, 3 art. 339 (złosnaje i asabliva złosnaje chulihanstva), č. 2 art. 218 (naŭmysnyja źniščeńnie albo paškodžańnie majomaści), č. 1 art. 14 i č. 3 art. 339 (zamach na złosnaje chulihanstva), č. 1 art. 14 i č. 2 art. 218 (zamach na naŭmysnaje źniščeńnie majomaści).

Kavaloŭ abvinavačvajecca pa č. 6 art. 16 i č. 3 art. 289 (saŭdzieł u akcie teraryzmu), č. 3 art. 295, hh. 2, 3 art. 339, č. 2 art. 218, č. 2 art. 405 (ŭkryvalnictva złačynstvaŭ), čč. 1, 2 art. 406 (niedaniasieńnie ab złačynstvie).

Svaju vinu jany pryznali častkova. Tak, Kanavałaŭ pryznaŭ siabie vinavatym va ŭčynieńni dvuch teraktaŭ u Minsku — 11 krasavika 2011 hoda na stancyi mietro «Kastryčnickaja» i 4 lipienia 2008 hoda kala steły «Minsk — horad-hieroj». Astatnija abvinavačańni, u tym liku ŭ teraktach u Viciebsku 14 i 22 vieraśnia 2005 hoda, jon admaŭlaje. Kavaloŭ nie pryznaŭ siabie vinavatym u niedaniasieńni ab rychtavanych Kanavałavym złačynstvach u 2005 hodzie ŭ Viciebsku i admoviŭsia ad svaich pakazańniaŭ, dadzienych na papiarednim śledstvie. Jon nie pryznaŭ svajoj viny va ŭtojvańni damkrata, jaki Kanavałaŭ nibyta vykarystoŭvaŭ pry vyrabie vybuchovych rečyvaŭ. Razam z tym Kavaloŭ pryznaŭ siabie vinavatym u niedaniasieńni ab rychtavanym terakcie ŭ Minsku 3–4 lipienia 2008 hoda (pieršaje vybuchovaje prystasavańnie, ustanoŭlenaje 3 lipienia, nie spracavała). Nie pryznaŭ siabie saŭdzielnikam terakta na stancyi mietro «Kastryčnicaja» 11 krasavika, ale pryznaŭ niekalki faktaŭ nabyćcia tratyłu.

Ad dačy pakazańniaŭ u sudzie Kanavałaŭ admoviŭsia.

Vina Dźmitryja Kanavałava, jaki byŭ abvinavačany ŭ ździajśnieńni teraktu ŭ minskim mietro i inšych złačynstvach, całkam dakazanaja, zajaviŭ u efiry telekanała STV muž adnoj z zahinułych na stancyi «Kastryčnickaja».

«Na pramovie abvinavačvańnia ja prysutničaŭ, na pramovie abarony prysutničaŭ. 30-ha [listapada] pajdu na vyniasieńnie prysudu. Ja tak dumaju, što dla Kanavałava, a jaho vina całkam dakazanaja, na maju dumku, budzie vyšejšaja miera pakarańnia…», — skazaŭ mužčyna. Pry hetym jon adznačyŭ: «Liču, što prosta rasstreł, jak paprasiła abvinavačvańnie na sudzie, zanadta lohkaja śmierć».

Svajo mierkavańnie vykazała i maci adnaho z zahinułych: «Ja, viadoma, nie juryst. Jurystam byŭ moj syn. Miarkuju, što ŭsio tut pravilna, što heta jany. Niama prosta bolš vo nijakaha žalu da takich ludziej. Ja miarkuju, što pavinna być śmiarotnaje pakarańnie, inakš možna ŭsio i ŭsim, razumiejecie?»

Hetyja vykazvańni cytuje ahienctva BiełTA. Jak i łukašenkaŭskija telekanały, jano praktyčna nie infarmavała pra arhumienty abarony Kanavałava j Kavalova. Ni razu nie davali jany słova i praciŭnikam śmiarotnaha pakarańnia pa hetaj spravie.

Tym časam u Internecie idzie zbor podpisaŭ suprać kary śmierciu.

Na ranak sierady pad pietycyjaj padpisalisia kala 45 tysiačy čałaviek.

«Ludzi za samaje žorstkaje pakarańnie lubych terarystaŭ, ale źbirajuć podpisy tamu, što jany nie vierać hetamu sudu i pradjaŭlenym dokazam. Jany bajacca strašnaj pamyłki, jakich było šmat u „spravie Michasieviča“, naprykład», — skazaŭ «Našaj Nivie» adzin ź ludziej, jakija pryznalisia ŭ tym, što pastavili svoj podpis.

Niekatoryja ludzi miarkujuć, što nieadkładnaje pakarańnie śmierciu nie dazvolić vykryć peŭnyja sakrety teraktaŭ u tym vypadku, kali ich sapraŭdy ździejśniŭ Kanavałaŭ.

Na minułym tydni Luboŭ Kavalova, maci adnaho z abvinavačvanych, raźmiaściła ŭ internecie svaju pietycyju, u jakoj prosić mižnarodnuju supolnaść vyratavać ad śmiarotnaj kary abvinavačvanych u vybuchu ŭ minskim mietro, jana taksama źviarnułasia asabista da Łukašenki z prośbaj «dapamahčy nie zabić» jaje syna i Dźmitryja Kanavałava, «a zamiest hetaha — zapatrabavać znajści tych, chto sapraŭdy pavinien nieści adkaznaść za ŭčynienyja złačynstvy».

Darečy, pa niekatorych epizodach, jakija inkryminujucca Kanavałavu j Kavalovu raniej byli asudžanyja ludzi.

U vyniku vybuchu na stancyi mietro «Kastryčnickaja» 11 krasavika zahinuła i pamierli ŭ balnicach 15 čałaviek, cialesnyja paškodžańni roznaj stupieni ciažaru atrymała 387 čałaviek.

***

20 listapada Alaksandr Łukašenka ŭ intervju žurnalistu kanała «Rośsija-24» Siarhieju Brylovu zajaviŭ:

«Mnie jašče pryjdziecca, chaču ja hetaha ci nie, — jak i ŭ Rasijskaj Fiederacyi, apošniaje słova ŭ hetaj situacyi, kali sud vyniesie takoje rašeńnie ab śmiarotnaj kary hetych ludziej, chaču ja hetaha ci nie, dakładna tak, jak i ŭ vas, —

ja pavinien budu padpisać ukaz, pamiłavać ci nie pamiłavać».

«Usio naša hramadstva pieražyło taki šok, — adznačyŭ biełaruski kiraŭnik. — Heta niedaravalna, i ja jak prezident liču, što pavinna być samaje žorstkaje pakarańnie za padobnyja dziejańni. Što padšturchnuła ciabie? Jakaja matyvacyja? Kab paciešyć i pahladzieć, jak buduć hinuć ludzi? Jak kravišča budzie chvastać? Za heta treba adkazvać pa poŭnaj prahramie».

Na remarku Brylova: «Moža być, jak raz adkazam na heta varvarstva było b toje, kab nie adkazvać śmierciu na śmierć, a niachaj siadziać ŭsio žyćcio ŭ turmie?» — A. Łukašenka zajaviŭ: «Moža być, i tak. Vy majecie prava na hety punkt hledžańnia».

• 0
• 0
• 0
• 0
• 0
• 0