Małako pa sacyjalna značnych cenach u kramy viernie Dziaržkantrol?

Siońnia na staličnych pryłaŭkach ciažka znajści małako, tańniejšaje za 4 tysiačy rubloŭ.

— Ja hatovaja kuplać małako 1,5% tłustaści biez usiakich dadatkaŭ, — patelefanavała ŭ redakcyju «Kamsamołki» čytačka. — Čamu nam nie dajuć vybaru, i ŭ kramach tolki darahoje małako z łaktułozaj za 4 tysiačy?

Nahadajem, małako adnosicca da sacyjalna značnych praduktaŭ, ceny na jakija rehuluje dziaržava. U polietylenavym pakiecie litr małaka tłustaściu 3,5% pavinien kaštavać maksimum 2320 rubloŭ), a 1,5-pracentnaj tłustaści — 1425 rubloŭ. Ale ŭ staličnych kramach takich cen niama daŭno, tamu što ŭsio małako siahońnia ŭzbahačanaje roznymi dadatkami, za košt jakich raście cana.

«Kamsamołka» vyrašyła adšukać u minskich kramach małako biez dadatkaŭ. Zachodžu ŭ kramu na vulicy Bieraścianskaj. Małako ŭ polietylenavych pakietach tłustaściu 3,2% kaštuje 5 tysiač rubloŭ. U składzie niama ni kalcyju, ni łaktułozy, ni inšych dadatkaŭ. Napisana tolki, što jano «narmalizavanaje i adnoŭlenaje». Zahadkavy nadpis dla luboha pakupnika.

— Dziaŭčyna, a čamu małako biez dadatkaŭ kaštuje 5 tysiač? I što značyć «narmalizavanaje i adnoŭlenaje»?

— Nie viedaju, inšaha niama, — adrezała pradaviec.

U inšaj kramie, kala praśpiekta Niezaležnaści, jość małako tłustaściu i 1,5%, i 3,2%, ale adno z łaktułozaj, druhoje — z kalcyjem. Pakupnicy ŭvažliva razhladajuć skład małaka na pakiecie.

— Znoŭ z dadatkami, — aburajecca piensijanierka.

— Biez dadatkaŭ małako raniej pryvozili, ale apošnim časam jaho niama, — tłumačyć pradaviec. — Pakupniki aburajucca, ale što my možam zrabić. Zavody nam jaho prosta nie pastaŭlajuć.

Jašče ŭ troch kramach u centry horada na pryłaŭku małako było tolki z dadatkami.

Prablemaj užo zacikaviŭsia Dziaržkantrol. Načalnik hałoŭnaha ŭpraŭleńnia kantrolu spažyvieckaha rynka i śfiery pasłuh kamiteta Uładzimir Kalenik zajaviŭ, što vytvorcy Biełarusi nie zabiaśpiečvajuć unutrany rynak u šyrokim asartymiencie nizkatłustaj małočnaj pradukcyjaj. Pavodle dadzienych BiełTA, śpiecyjalist skazaŭ, što ceny na małako i kiefir tłustaściu 1,5 — 2% u dva razy vyšejšyja, tamu što vyrablajuć ich z roznymi dadatkami. Na jaho dumku, treba davodzić da vytvorcaŭ patrabavańni pa pastaŭkach pradukcyi na ŭnutrany rynak dyrektyŭna.

Jak mienavita buduć rehulavać pastaŭki tannaha małaka i kiefiru ŭ kramy, pakul nieviadoma.

• 0
• 0
• 0
• 0
• 0
• 0
• 0
• 0