Pa fakcie znosu pieršaj minskaj elektrastancyi raspačataja kryminalnaja sprava

U spravie fihurujuć proźviščy mera Minska i inšych dziaržčynoŭnikaŭ.

Nahadajem, što ŭ traŭni 2010 hoda kiraŭnik Biełarusi padpisaŭ ukaz ab budaŭnictvie ŭ Minsku pobač z cyrkam šmatfunkcyjanalnaha kompleksu «Kiempinski».

Pytańni ŭ haradžan da budaŭnictva źjavilisia paśla taho, jak sioleta stvaralniki kompleksu vyrašyli razburyć budynak pieršaj minskaj elektrastancyi. Jana była pabudavanaja pa inicyjatyvie minskaha hubiernatara Karala Huten-Čapskaha i pačała davać pieršy tok u 1895 hodzie. Adnak u 2011 hety pomnik architektury pačaŭ pieraškadžać novaj horadabudaŭničaj palitycy.

U vyniku byŭ znojdzieny kampramis. Budynak vyrašana było pieramiaścić trochi ŭ bok da mosta praź Śvisłač. Pry hetym zachavać razabranuju cehłu i viarnuć jaje ŭ pracu vielmi składana. «Možna adnaŭlać budynak z materyjału, padobnaha da taho, ź jakoha jon pabudavany», — zajaviŭ Čarniaŭski.

Adnak, jak śćviardžajuć u Biełaruskim tavarystvie achovy pomnikaŭ historyi i kultury, sama mahčymaść takoha «kampramisu» zakanadaŭstvam nie praduhledžanaja. A značyć, znos budynka elektrastancyi niezakonny.

— Zajavy, zroblenyja pradstaŭnikami Ministerstva kultury, raźličanyja na natoŭp. Kab ludzi supakoilisia. Pieranos dvuch karpusoŭ: transfarmatarnaj padstancyi i mašynnaj zały — heta ŭsio roŭna najhrubiejšaje parušeńnie dziejnaha zakanadaŭstva ŭ śfiery achovy pomnikaŭ historyi i kultury. Varta ŭličvać, što ŭ dziaržaŭny śpis abjektaŭ, jakija znachodziacca pad achovaj dziaržavy, uvachodziŭ kompleks budynkaŭ elektrastancyi. Jon budavaŭsia ŭ kancy XIX — 20-ch hadoŭ XX st. Adnak Ministerstva kultury na padstavie rašeńnia navukova-mietadyčnaj rady dało dazvoł na znos častki budynkaŭ elektrastancyi i pieranos dvuch samych starych karpusoŭ.

Ale! Ministerstva kultury i navukova-mietadyčnaja rada nie mieli paŭnamoctvaŭ na pryniaćcie rašeńnia ab znosie hetych budynkaŭ. Tamu što rašeńnie ab źniščeńni historyka-kulturnaj kaštoŭnaści moža prymacca tolki na ŭzroŭni Savieta ministraŭ Biełarusi i tolki ŭ vypadku, kali havorka idzie ab likvidacyi nastupstvaŭ katastrof, stychijnych biedstvaŭ, vajennych dziejańniaŭ. Tady dla rašeńnia peŭnych apieratyŭnych zadač moža być źniesienaja peŭnaja historyka-kulturnaja kaštoŭnaść, jakaja pieraškadžaje ažyćciaŭlać takija apieratyŭnyja zadačy. Heta havorycca ŭ 28 artykule Zakona ab achovie historyka-kulturnaj spadčyny.

Akramia taho, u pałažeńni ab rabocie navukova-mietadyčnaj rady, zaćvierdžanym pastanovaj Saŭmina № 762, pradpisana prymać tolki navukova abhruntavanyja rašeńni. Navukova abhruntavanyja — heta rašeńni, pryniatyja na padstavie praviedzienych na abjekcie historyka-kulturnaj spadčyny kompleksnych navukova-daśledčych pošukaŭ. Takija pracy ŭklučajuć u siabie i archieałohiju, i architekturnyja abmiery, i zandaž, i histaryčnyja rosšuki — heta značyć ceły kompleks archiŭna-biblijahrafičnych i archieałahičnych daśledavańniaŭ. Ale takija daśledavańni ŭ dadzienym vypadku nie pravodzilisia.

— Sprava raspačataja pa jakich artykułach? Ci jość kankretnyja fihuranty?

— Kryminalnaja sprava raspačataja jak pa fakcie razbureńnia elektrastancyi, tak i pa fakcie niezakonnych uzhadnieńniaŭ hetaha razbureńnia. Razhladajucca dva artykuły — 344 i 428 Kryminalnaha kodeksa — «źniščeńnie historyka-kulturnych kaštoŭnaściaŭ» i «słužbovaja chałatnaść». Sprava raspačataja Partyzanskim RUUS Minska.

— A Vy sami vierycie, što vinavatyja ŭ znosie historyka-kulturnych kaštoŭnaściaŭ paniasuć zasłužanaje pakarańnie?

— Ščyra kažučy, nie. U spravie zaviazanyja ludzi na vysokich pasadach. Dva apošnich korpusy elektrastancyi byli razburanyja pavodle vusnaha zahadu minskaha kiraŭnika horada Mikałaja Ładućki. Heta ja kažu nie hałasłoŭna. U mianie na rukach pramiežkavyja materyjały adnoj z pravierak, jakuju ładziŭ ABEZ. U ich heta zafiksavana. Akramia taho, u pracesie razbureńnia pieršaj minskaj elektrastancyi niepasredna «zamazanyja» čynoŭniki Ministerstva kultury. Taksama varta ŭličvać, što adnym z zasnavalnikaŭ kampanii «Elit Estejt», jakaja vystupaje zakazčykam budaŭnictva «Kiempinski», źjaŭlajecca firma «Trajpł». Tamu ja asabliva ŭ sudovuju pierśpiektyvu hetaj spravy nie vieru. Ale prynamsi była praviedzienaja vielmi kvalifikavanaja pravierka. Jaje pramiežkavyja materyjały pakazali, što sapraŭdy adbyłosia. Heta ŭpieršyniu ŭ historyi niezaležnaj Biełarusi, kali pravaachoŭnyja orhany na papiery dajuć narmalnuju pravavuju acenku staŭleńnia čynoŭnikaŭ da historyka-kulturnaj spadčyny.

• 0
• 0
• 0
• 0
• 0
• 0
• 0
• 0