Jeŭrazijski bank raźvićcia rekamienduje ŭładam Biełarusi abmiežavać unutrany popyt

Jeŭrazijski bank raźvićcia (JEABR) nastojliva rekamienduje ŭładam Biełarusi «značna abmiežavać unutrany popyt». Pra heta havorycca ŭ acency spravazdačy Ministerstva finansaŭ Biełarusi ab vykanańni ŭmoŭ 2-ha tranšu kredytu Antykryzisnaha fondu JeŭrAzES (AKF), jakaja padrychtavana ekśpiertami JEABR.

Jak adznačajecca ŭ dakumiencie, u vyniku praciahu ŭ 2011 hodzie palityki praźmiernaha stymulavańnia ŭnutranaha popytu, dahetul nie ŭdałosia vyrašyć klučavuju prablemu ekanomiki Biełarusi — krytyčna vysoki deficyt rachunku biahučych apieracyj. Praviadzieńnie takoj palityki vyklikała trochznačnuju inflacyju i narastańnie prablem u bankaŭskim siektary.

U metach najchutčejšaj stabilizacyi makraekanamičnaj situacyi JEABR «nastojliva rekamienduje ŭładam Biełarusi značna abmiežavać unutrany popyt praz spynieńnie emisijnaha finansavańnia dziaržaŭnych prahram i uzmacnieńnie žorstkaści hrašova-kredytnaj palityki, u tym liku praz pavyšeńnie realnych pracentnych stavak da stanoŭčaha ŭzroŭniu».

Jak havorycca ŭ dakumiencie, na fonie prablem z valutaj u pačatku minułaha hoda intensiŭnaje finansavańnie dziaržprahram z emisijnych krynic (7% VUP za pieršyja piać miesiacaŭ) i značnaje pavieličeńnie zarpłaty spravakavali bolš hłybokuju, čym čakałasia, devalvacyju biełaruskaha rubla i imklivy rost cen u ekanomicy. Spažyvieckija ceny za 10 miesiacaŭ uzraśli na 89%, a ceny vytvorcaŭ — bolš jak u dva razy. Jak čakajecca, pavodle vynikaŭ hoda ISC pieravysić 120%.

Emisijnaje finansavańnie ŭ druhim paŭhodździ niekalki zapavoliłasia — častkova dziakujučy spynieńniu metavaha kredytavańnia ekanomiki z boku Nacbanka. «Tym nie mienš, za dzieviać miesiacaŭ finansavańnie dziaržprahram z emisijnych krynic skłała 10 trłn. rubloŭ (5,3% VUP), i praciahvajecca dalej, staviačy pad pahrozu vydaču 3-ha tranšu, pavodle ŭmoŭ jakoha abjom kredytaŭ pa dziaržprahramach nie pavinien pieravyšać 4% VUP pa vynikach hoda», — skazana ŭ dakumiencie.

Śpiecyjalisty kanstatujuć: va ŭmovach vysokaj inflacyi i devalvacyi, jakija supravadžalisia množnaściu kursaŭ, u druhoj pałovie hoda pačałosia zapavolvańnie inviestycyjnaj i spažyvieckaj aktyŭnaści. Tempy pryrostu VUP źnizilisia z 13,1% u studzieni-mai da 7% u studzieni-kastryčniku z čakanym dalejšym źnižeńniem da 4,5% pavodle vynikaŭ hoda. Hetyja ž faktary pačali adbivacca na stanie bankaŭskaha siektara, uzmacniŭšy ŭraźlivaść likvidnaj pazicyi bankaŭ u zamiežnaj valucie i pahoršyŭšy jakaść ich aktyvaŭ.

Niahledziačy na niekatoraje palapšeńnie ŭ handli tavarami i pasłuhami apošnim časam, deficyt rachunku biahučych apieracyj (RBA) zastajecca pa-raniejšamu vysokim. Kali ŭ 2010 hodzie jon finansavaŭsia pryvatyzacyjnymi pastupleńniami, to sioleta — nazapašvańniem źniešniaj zapazyčanaści, vypłata pracentaŭ pa jakoj, u svaju čarhu, pryvodzić da čarhovaha paharšeńnia RBA.

Uzrovień mižnarodnych reziervaŭ pry hetym zastajecca «nieprymalna nizkim i nie pieravyšaje 1,2 miesiaca impartu».

Jak padkreślivajecca ŭ dakumiencie, rola skaračeńnia ŭnutranaha popytu ŭ cełym jak faktaru stabilizacyi ekanomiki ŭzrastaje ŭ ciapierašnich umovach šmatrazova. Dalejšy praciah jaho stymulavańnia jak instrumienta rostu VUP niepaźbiežna pryviadzie da čarhovaha vitku inflacyi, dalejšaj devalvacyi rubla i rostu źniešniaha doŭhu.

Nahadajem, 30 śniežnia 2011 hoda Biełarusi byŭ pieraličany druhi tranš kredytu AKF u 440 młn. dołaraŭ. U adpaviednaści z zaćvierdžanym raniej płanam, treci tranš kredytu ŭ 440 młn. dołaraŭ pavinien być vydzieleny Biełarusi nie paźniej za 28 lutaha 2012 hoda.

• 0
• 0
• 0
• 0
• 0
• 0