Viciebski abłasny sud nie zadavoliŭ skarhu advakataŭ Andreja Sańnikava na admovu administracyi kałonii «Vićba-3» u sustrečach ź ich padabaronnym.
Jak paviedamiła advakat Maryna Kavaleŭskaja, razhlad skarhi ŭ abłasnym sudzie adbyŭsia 30 studzienia.
«My abskardzili rašeńnie rajonnaha suda Viciebska i rašeńnie ŭpraŭleńnia departamienta vykanańnia pakarańniaŭ pa Viciebskaj vobłaści, jakija pryznali zakonnym rašeńnie administracyi kałonii „Vićba-3“ ab niadopusku nas da Sańnikava.
Na žal, naša skarha zastałasia biez zadavalnieńnia», — skazała advakat.
Pavodle słoŭ Kavaleŭskaj, na rašeńnie Viciebskaha abłasnoha suda budzie padadziena skarha ŭ paradku nahladu.
Nahadajem, advakaty i svajaki Andreja Sańnikava nie dapuskalisia da jaho na praciahu bolš jak dvuch miesiacaŭ. Načalnik kałonii «Vićba-3» Vital Ahnistykaŭ tłumačyŭ heta niejkaj pravierkaj, jakaja nibyta pravodzicca dla taho, kab vyśvietlić, ci nie pahražaje Sańnikavu niebiaśpieka.
***
U mai 2011 hoda eks-kandydat u prezidenty Biełarusi Andrej Sańnikaŭ byŭ pryhavorany da piaci hadoŭ pazbaŭleńnia voli ŭ kałonii ŭzmocnienaha režymu pa abvinavačańni ŭ arhanizacyi masavych biesparadkaŭ 19 śniežnia 2010 hoda. Adbyvać pakarańnie jon pavinien byŭ u kałonii Navapołacka (Viciebskaja vobłaść), adnak palityka niekalki razoŭ etapavali ŭ inšyja kałonii. Z 8 listapada pa 20 studzienia Sańnikava trymali ŭ poŭnaj izalacyi ad źniešniaha śvietu. 20 studzienia da jaho dapuścili advakata, a 24-ha — pradastavili karotkaterminovaje spatkańnie z žonkaj i maci.
Na nastupny dzień paśla spatkańnia žonka eks-kandydata Iryna Chalip sklikała pres-kanfierencyju, na jakoj paviedamiła: pad uździejańniem katavańniaŭ jaje muž vymušany byŭ napisać prašeńnie ab pamiłavańni na imia Łukašenki. Pavodle jaje słoŭ, prašeńnie było napisana jašče 20 listapada, kali Sańnikaŭ znachodziŭsia na pierasyłcy ŭ mahiloŭskaj turmie. Pakolki 23 śniežnia Łukašenka publična zajaŭlaŭ, što Sańnikaŭ da jaho z prośbaj ab pamiłavańni nie źviartaŭsia, Chalip apasajecca, što jaje muža nie źbirajucca vypuskać z kałonii i jamu pahražaje śmiarotnaja niebiaśpieka.
U MUS, u svaju čarhu, śćviardžajuć, što prašeńnie ab pamiłavańni Sańnikaŭ padaŭ 23 śniežnia, i 23 studzienia administracyja kałonii «Vićba-3» adpraviła jaho ŭ adździeł pa pytańniach hramadzianstva i pamiłavańnia Administracyi prezidenta.
Kamientary