«Šukajuć takija chady, kab nielha było začapicca jurydyčna».
Jak apavioŭ sakratar prafsajuza Anatol Litvinka, jaho žonku zvolnili, nie prapanavaŭšy nijakaj inšaj pasady. Spadarynia Ludmiła pracavała mašynistkaj kancylaryi na zamienie dekretnaha adpačynku:
«Jany niepasredna na nas užo nie cisnuć, a cisnuć praz svajakoŭ. Pry hetym šukajuć takija chady, kab nielha było začapicca jurydyčna.Maja žonka pracavała na zamiaščeńni dekretnaha adpačynku. Taja dziaŭčyna, jakuju jana padmianiała, jašče pavinna była bolš za dva hady być u dekrecie. Adnak atrymałasia tak, što jana vyjšła z dekretnaha adpačynku. I, jak my daviedalisia, heta jaje prosta paprasili vyjści, kab zvolnić maju žonku. Takim čynam jany chočuć nacisnuć na mianie».
Anatol kaža, što zvyčajna ŭ padobnych situacyjach čałavieku prapanujuć inšuju pasadu, adnak jaho žoncy Ludmile nijakich varyjantaŭ nie znajšli: «U nas, pavodle praktyki, było tak na pradpryjemstvie: kali ŭžo čałaviek pracuje na zamienie dekretnaha adpačynku, dla jaho zaraniej užo šukajuć inšuju pasadu, ale pakidajuć pracavać. Ale z majoj žonkaj voś tak abyšlisia, bo jaŭna zamova była. Tak, farmalna atrymlivajecca ŭsio pravilna. Adnak
niadaŭna ŭ mianie adbyłasia razmova z načalnikam strukturnaha padraździaleńnia, dzie mnie zrabili namiok nakont pracy majoj žonki».
Padobnaja situacyja zdaryłasia i z žonkaj inšaha prafsajuznaha aktyvista.
Žonku rabočaha «Hranitu» Mikałaja, jaki prasiŭ nie nazyvać jahonaha proźvišča, zvolnili z pasady vartaŭnika, dzie jana taksama pracavała na padmienie dekretnaha adpačynku.Mikałaj kaža, što joj taksama nie prapanavali inšaj pracy. Aktyvist pierakanany, što heta — taki sposab cisku na jaho za ŭdzieł u niezaležnym prafsajuzie:
«Jak skazaŭ načalnik drabilna-sartavalnaha zavodu Siarhiej Michajłaŭ, hetyja aktyvisty dziesiacihodździami razam ź siemjami nia zmohuć uładkavacca bolš na «Hranit». Maŭlaŭ, dziasiataje pakaleńnie ich na zavod nie ŭładkujecca. Heta niepasredna na płaniorcy im byli skazanyja takija słovy ŭ prysutnaści mnohich ludziej».
Pry kancy 2011 hoda niekalki socień pracaŭnikoŭ pradpryjemstva pa zdabyčy budaŭničaha kamieniu «Hranit» u Mikaševičach napisali zajavy na vychad z aficyjnaha prafsajuza. Takim čynam pracaŭniki vykazali pratest suprać nizkich, na ich dumku, zarobkaŭ, pahardlivaha staŭleńnia z boku administracyi i biaździejańnia aficyjnaha prafsajuza. Rabočyja praviali ŭstanoŭčy schod supołki niezaležnaha prafsajuza i ciapier dabivajucca rehistracyi hetaj supołki.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary