«Akazvajecca, čytać ja ŭmieju… A voś pisać tak i nie navučyłasia»
Raspovied byłoj fiłfakaŭki, jak jaje zarezali na ekzamienach.
Pačnu z taho, što asabista viedaju Nastu. Heta vielmi dobry i razumny čałaviek. Nie viedaju, jak jana zdavała zaliki, ale spadziajusia, što maja historyja moža być dla jajo niejkaj padtrymkaj.
Ja była studentkaj BDU. Adličyli mianie 23 sakavika 2011 hoda. Chaču raskazać, jak heta było.
Pačałosia ŭsio z krasavika 2010 hoda, kali ja na svaim fakultecie, dzie ličycca dobrym lubić litaraturu, raźviesiła ŭlotki, ŭ jakich było źmieščana zaprašeńnie na sustreču z Uładzimieram Arłovym. Nastupnym etapam było 27 lipienia 2010 hoda. Kali ja pryjšła pakłaści ružu da pomnika Jakubu Kołasu. Mianie zatrymali, zakinuli da suda na Akreścina. Dali štraf. U pačatku navučalnaha hoda mianie vyklikali ŭ dekanat, patrabavali tłumačalnuju zapisku.
U pieradvybarčuju kampaniju ja pracavała ŭ štabie kandydata na prezidenta zasłužanaha paeta Biełarusi, Uładzimira Niaklajeva. Źbirała podpisy, raskidvała ŭlotki.Zrazumieła, što heta zabirała ad vučoby peŭnuju kolkaść času.
24 listapada ja pajšła na sustreču z kandydatami na Kastryčnickuju płošču. Praź niekalki dzion mianie znoŭ vyklikali ŭ dekanat.Pierada mnoj pakłali fatazdymki, na jakich ja z Nastaj Pałažankaj, Vikaj Ładzis dy inšymi trymała raściažku «Saša, sychodź». Patrabavali tłumačalnuju.
Potym ja dała intervju «Svabodzie». Prosta apisała hetuju situacyju, jakaja adbyłasia.Tolki praŭdu. Spadar Aleh Hruździłovič, jaki pisaŭ ab hetym artykuł, telefanavaŭ ŭ dekanat i zapytvaŭsia, jak usio było. Namieśnik dekana, jaki jašče i vykładaŭ u mianie biełaruskuju movu, vymušany byŭ adkazvać na jaho pytańni.
Praź niekalki tydniaŭ pačynałasia siesija. Zalikovuju ja zdała narmalna.Usie zaliki byli zdadzieny. 19 śniežnia ja schadziła na vybarčy ŭčastak, prahałasavała. Reštu dnia i viečara ja praviała doma, pieražyvajučy za svaich siabroŭ, chto byŭ na Płoščy.
Ispyty… Voś tut pačynajecca cikavieńkaje. Pieršyja try ispyty ja zdała narmalova.Adzin ź ich — niamieckaja litaratura. Usie, chto vučacca na fiłfaku ci FMA BDU, viedajuć, što takoje zdavać ispyt Halinie Vienijaminaŭnie Siniła. Pa im ja atrymała 7. Biełaruskuju litaraturu zdała na 10. Potym była biełaruskaja mova….
Akazvajecca, čytać ja ŭmieju… A voś pisać tak i nie navučyłasia.Maleńkaja remarka, kali ja zdavała CT, to pa movie nabrała 89 bałaŭ. A ispyt va ŭniviery nie zdała, nie hledziačy na toje, što na kansultacyi nam abiacali 7 bałaŭ harantavanych za hramatyčny razbor skaza, jaki, pa słovach vykładčyka, ja zrabiła «biezdakorna», i ŭvohule, rychtavałasia da ispytu ja mnoha i staranna. Niamieckuju movu, jakuju ja 11 hadoŭ vučyła ŭ adnoj z najlepšych škoł respubliki i jakuju mnie vykładała adna ź lepšych nastaŭnic respubliki, ja taksama nie zdała. Na CT pa niamieckaj movie ja ŭziała 74 bały.
Adna z vykładčyc u kamisii na ispycie siadzieła nie padymajučy hałavy, pakul ja adkazvała. Kali mnie skazali, što «niečaha nie chapiła», ja ščyra dumała, što havorka idzie pra 8–9 bałaŭ, ale nijak nie 4.
A ciapier, spadary, jakija pišuć źniavažlivyja kamienty pra Nastu, pra jaje vučobu(nievučobu)…
Voś vam jašče adzin prykład «abjektyŭnaści»…. Ja vielmi chacieła vučycca na svaim fakultecie… Ciapier takoj mahčymaści nie maju, ab čym vielmi škaduju.Dziakuj, spadaru Viktar, za vaš artykuł… Nastačka, trymajsia, rodnaja…
Darečy, ja była adnoj z tych, kamu Nasta nasiła pieradački… Tamu, usim kamientataram mahu dać paradu: «nie suditie da nie sudimy budietie».
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary