U sudzie nad Alaksandram Krutym, jaki sprabavaŭ vosieńniu minułaha hoda pradstaŭlać na pracesie pa terakcie ŭ minskim mietro intaresy svajoj paciarpiełaj dački Iniesy, abjaŭleny pierapynak da 20 sakavika.
Śviedki, u tym liku dačka abvinavačanaha, jakija dali padpisku ab nievydavańni materyjałaŭ sudovaha razhladu, nie zdoleli paviedamić, što pasłužyła nahodaj dla praciahu pracesu. Pieršy sud, jaki adbyŭsia 6 śniežnia 2011 hoda, zaviaršyŭsia za adzin dzień. Padobnych mier u dačynieńni da śviedak nie prymałasia.
Iniesa Krutaja ličyć, što prysud budzie abjaŭleny 20 sakavika, i ździŭlajecca, navošta treba było rabić pasiadžeńnie suda zakrytym dla hramadskaści i brać padpisku ab nievydavańni, kali ničoha novaha ŭ paraŭnańni z tym, što paviedamiŭ u sudzie pa terakcie pra jaje baćku pieršy namieśnik staršyni Viarchoŭnaha suda Alaksandr Fiedarcoŭ, jana nie pačuła.
Pavodle niepaćvierdžanaj infarmacyi, na ranišnim pasiadžeńni sud vyvučyŭ materyjały spravy pa abvinavačańni Krutoha ŭ chulihanstvie, zasłuchaŭ śviedak,advakat Natalla Mackievič zajaviła chadajnictva ab pryciahnieńni da pracesu niezaležnych ekśpiertaŭ. Vyniki razhladu sudom hetaha chadajnictva nieviadomyja.
Paŭtorny razhlad spravy ŭ dačynieńni da Krutoha, źmieščanaha pad vartu pavodle abvinavačvańnia ŭ chulihanstvie (č. 1 art. 339 KK), prachodzić u sudzie Maskoŭskaha rajona Minska.
Sudovy razbor adbyvajecca biez Krutoha i, jak i pieršy raz, u zakrytym režymie. Sudździa Jaŭhien Chatkievič zadavoliŭ chadajnictva ab hetym dziaržabvinavaŭcy Vańkoviča i paciarpiełaj — hałoŭnaha ŭrača palikliniki № 32 Valanciny Čupryk. Paciarpiełaja zajaviła, što zakryć praces nieabchodna z metaj praduchileńnia vydavańnia źviestak, jakija ŭščamlajuć jaje hodnaść.
Nahadajem, sprava była znoŭ nakiravana ŭ rajonny sud Minskim haradskim sudom paśla razhladu 10 lutaha kasacyjnaj skarhi na pryhavor, vyniesieny 6 śniežnia. Minharsud admoviŭ u vyzvaleńni Krutoha
20 vieraśnia Alaksandr Krutoj, jaki aktyŭna vystupaŭ na pracesie pa terakcie, byŭ zatrymany milicyjaj u Minsku. 22 vieraśnia Alaksandr Fiedarcoŭ, jaki byŭ staršynioj na pracesie, častkova začytaŭ pastanovu ab jaho zatrymańni. U joj skazana, što Krutoj «17 žniŭnia, znachodziačysia ŭ kabiniecie adnoj ź miedycynskich ustanoŭ Minska, naŭmysna ŭčyniŭ chulihanskija dziejańni z asablivym cynizmam i hrebavańniem normami marali». Heta vyjaviłasia ŭ tym, što jon vyliŭ źmieściva dvuch słoikaŭ — vadkaść z pacham mačy — na hałoŭnaha ŭrača. Pavodle nakiravańnia prakurora Krutoj byŭ adpraŭleny ŭ RNPC psichičnaha zdaroŭja. Ekśpiertyza pryznała ŭ jaho stan poŭnaj adsutnaści pamiaci.
6 śniežnia sud Maskoŭskaha rajona pastanaviŭ prymianić da Alaksandra Krutoha prymusovyja miery biaśpieki i lačeńnia. Paśla RNPC jon znachodziŭsia ŭ žodzinskaj turmie, zatym byŭ pieraviedzieny ŭ SIZA № 1.
Kamientary