Hramadskija aktyvisty zładzili tałaku na siadzibie sadavoda Ivana Sikory
Kala 20 čałaviek sabralisia na tałaku 29 krasavika na siadzibie sadavoda-sielekcyjaniera Ivana Sikory ŭ vioscy Małyja Ałaški Šarkoŭščynskaha rajona (Viciebskaja vobłaść).
U tałace pryniali ŭdzieł krajaznaŭcy, mastaki, hramadskija aktyvisty z usiaho rehijona. Pryjechali Hanna Bazarevič z Brasłava, Ada i Aleh Rajčonki z Hiermanavičaŭ, Źmicier Kurcevič ź Dzierkaŭščyny, Michał i Lilija Hili, Ihar Prakapovič z Pastavaŭ dy inš. Jak raspaviała hramadskaja dziajačka Ada Rajčonak, udzielniki tałaki prybrali śmiećcie, adramantavali bramku, śpiłavali suchija haliny z dreŭ, pasadzili kvietki. Kali mieli pierapynak u pracy, častavalisia harbataj sa staradaŭniaha samavaru i piernikami, što śpiakła Lilija Hil.
Kali tałaka skončyłasia, vydaviec Valer Bułhakaŭ i historyk Aleś Paškievič praviali prezientacyju knih i časopisaŭ «Arche».
***
Ivan Sikora naradziŭsia ŭ 1885 hodzie ŭ vioscy Małyja Ałaški (zaraz Šarkoŭščynski rajon). U 20-ja hady XX st. pracavaŭ nastaŭnikam; zvolnieny na zahad polskich uładaŭ, bo vykładaŭ pa-biełarusku. Paśla zvalnieńnia z nastaŭnickaj pracy asvoiŭ pracu sadavoda. Vyvieŭ kala 500 hatunkaŭ jabłyni, 100 hatunkaŭ ihruš, mnohija hatunki ślivaŭ, bezu, ružaŭ. U mnohich sadach našaha kraju rastuć jabłyki «Pamiać Sikory» – jany smačnyja i dobra zachoŭvajucca. Ivan Sikora pamior u 1966 hodzie. Niekalki hod tamu siabry kulturna-aśvietnickaha centra imia Jazepa Drazdoviča nabyli chatu sadavoda, padtrymlivajuć tam paradak.
Viktar Sikora, syn Ivana, pry niamieckaj akupacyi byŭ siabram Sajuza biełaruskaj moładzi i Biełaruskaj niezaležnickaj partyi. Paśla prychodu Čyrvonaj armii ŭznačaliŭ antysaviecki partyzanski atrad. Adsiedzieŭ dziesiać hod u HUŁAHu, viarnuŭsia ŭ 1954 hodzie. Žyŭ u Małych Ałaškach, pamior u 2008 hodzie.
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary