Žychary vuł. Cnianskaj sabrali 2500 podpisaŭ suprać uščylnieńnia ich rajona žyłym kompleksam
I spadziajucca na dapamohu Dziaržkantrolu.
U centry Minska praciahvajecca baraćba za spartyŭnuju placoŭku ŭ rajonie pierasiačeńnia vulicy Cnianskaj i zavułka Jakuba Kołasa, dzie kampanija «Tambaz» źbirajecca pabudavać žyły kompleks z troch vyšynnych damoŭ. Na prezientacyi prajekta bolšaść miascovych žycharoŭ vykazałasia suprać budaŭnictva. Za niekalki tydniaŭ ludzi sabrali 2500 podpisaŭ, adnak pakul hetaha niedastatkova, kab spynić prajektavańnie.
— Inicyjatyŭnaja hrupa abyšła ŭsie damy ŭ rajonie i sabrała 2500 podpisaŭ «suprać», — kaža žycharka kvartała Alena Navumčyk. — Na padviadzieńni vynikaŭ hramadskaha abmierkavańnia vyśvietliłasia, što
ŭ zabudoŭščyka jość 800 podpisaŭ za realizacyju prajekta. Pačali hladzieć, što heta za ludzi. Vyjaviłasia, prapisanyja jany na vuł. Jasienina, Anharskaj, u Smalavičach…
Pavodle słovaŭ Aleny, zabudoŭščyk usumniŭsia ŭ sapraŭdnaści podpisaŭ, sabranych žycharami, i zadumaŭ ułasnuju pravierku, tamu padviadzieńnie vynikaŭ hramadskaha abmierkavańnia zaciahnułasia.
Karystajučysia paŭzaj, ludzi pišuć listy ŭ roznyja instancyi, źviartajucca da deputata Juryja Čačukieviča. Apošni choć i kazaŭ padčas prezientacyi prajekta pra vydatki žyćcia ŭ centry horada i pierakonvaŭ zału ŭ tym, što «horadu treba dzieści budavać damy», usio ž pryniaŭ bok miascovych žycharoŭ i paabiacaŭ dasłać list na imia Mikałaja Ładućki ŭ abaronu stadyjona.
Razmaŭlajučy z čynoŭnikami, ludzi zhadvajuć dziaržaŭny łozunh «Za zdarovy ład žyćcia» i prosiać adramantavać spartyŭnuju placoŭku (mnohija hatovyja skinucca na dobraŭparadkavańnie). Na dumku miascovych žycharoŭ, ułady naŭmysna doŭhija hady nie padtrymlivali stadyjon u narmalnym stanie, kab zatym pryznać jaho avaryjnym i pieradać inviestaru. Abaroncy placoŭki pierakananyja, što žyły kompleks sprajektavany sa šmatlikimi parušeńniami: jon zakryje damy ad sonca, pavysić uzrovień zabrudžańnia pavietra, pieratvoryć rajon u «kamiennaje hieta». Svaje pretenzii inicyjatyŭnaja hrupa ŭžo pieradała ŭ Dziaržkantrol i ciapier čakaje adkazu.
Kamientary