Stomleny Michałok, Vajciuškievič u prydarožnaj kaviarni, Varaškievič u zakutku bara – paŭsiadzionnaść zabaronienych tvorcaŭ u novym śpiecprajekcie Siarhieja Hudzilina.
Fatohraf «NN» Siarhiej Hudzilin ad pačatku 2012 hoda zdymaŭ tvorčuju paŭsiadzionnaść biełaruskich kulturnych dziejačoŭ. Ich kancertnaja dziejnaść źviedała šmatlikija pieraškody, a sami tvorcy trapili ŭ sumnaviadomy «BLACK LIST».
Pra «čorny śpis» 2.0 usie daviedalisia paśla prezidenckich vybaraŭ-2010. (Pieršaja chvala zabaronaŭ prakaciłasia paśla vybaraŭ-2006.)
Technałohija biełaruskaha kulturnaha «čornaha śpisu» standartnaja –
kancerty admianiajucca nieviadoma kim paśla naviedvańnia kancertnych placovak «ludźmi sa śpiecsłužbaŭ».Dakumientaŭ, zahadaŭ, podpisaŭ pad takimi rasparadžeńniami čaściej za ŭsio niama: kłubnyja dyrektary ŭ panicy, muzyki ździŭlenyja, a fanaty hurtoŭ zdajuć kvitki. Vinavacić nibyta i niama kaho, ale ŭsie razumiejuć čamu adbyvajecca tak.
«Svabodny Teatr»
Kiraŭnictva teatra paśla represij prezidenckaj kampanii-2010, pad pahrozaj kryminalnaha pieraśledu, vyjechała ŭ Łondan. Trupa repietuje i ładzić zakrytyja pakazy śpiektaklaŭ ŭ nievialikim pryvatnym damku na ŭskrainie Minska. Prahony śpiektaklaŭ aktory pravodziać pa Skype-kanfierencyi z režysiorami teatra.
Źmicier Vajciuškievič (muzyka)
Siabie Vajciuškievič adnios da vieteranaŭ «čornaha śpisu» – u jaho jon traplaje ŭžo druhi raz. Z-za bardaŭskaha charaktaru svajoj tvorčaści Vajciuškieviču ŭdavałasia ładzić padpolnyja kvaterniki, «ofiśniki» i «siadzibniki» ciaham usiaho hoda. Aktyŭna śpiavak daje kancerty dla pradstaŭnikoŭ biełaruskaj dyjaspary ŭ Polščy i Rasiei.
Alaksandar Kulinkovič (hurt «Niejra Dziubiel»)
Za apošni hod Alaksandr Kulinkovič atrymaŭ bolej admovaŭ na kancerty svajho hurtu, čym hetych kancertaŭ adbyłosia. Chacia sam i ŭdakładniaje, što niekatoryja kancerty prachodzili navat u rajcentrach, ale biez afiš i rekłamy.
Aleś Maračkin (mastak)
Prezentacyju svajoj apošniaj pracy «Dva hienierały, puha i sabaka» mastak ładziŭ u napaŭzakrytym režymie. Na karcinie -- niedvuchsensoŭnaja parodyja na asob, jakija lubiać uznačalvać vajskovyja parady. Bolšaść svaich karcin Maračkin pakazvaje šmatlikim naviednikam svajoj majsterni.
Ihar Varaškievič (hurt «Krama»)
Apošni vialiki elektryčny vystup hurtu adbyŭsia na «harotnaj» Rok-Karanacyi-2011. Sam muzyka, vidać, bolš za ŭsich paciarpieŭ ad čornaha śpisu. Ciapier Varaškievič pracuje ledź nie ŭ stoł i naprykancy tydnia hraje ŭ niekalkich kaviarniach Minska suśvietnuju rok-kłasiku. Płaciać 30 dalaraŭ za vystup.
Anastasija Špakoŭskaja (hurt NAKA)
Hurt NAKA najvierahodniej zaličyli ŭ Black List za niekalki vostrasacyjalnych pieśniaŭ – «Usich zabrali» i «Za siekundu da vybuchu». U arhanizacyi vystupaŭ uźnikajuć dziŭnyja pieraškody, ale niekalki kancertaŭ sioleta Špakoŭskaja zmahła adyhrać. Z małaviadomaj tvorčaj spadčyny Anastasii možna ŭzhadać jašče, što jana hraje ŭ śpietaklach u adnym ź minskich teatraŭ.
Lavon Volski (hurt «Krambambula»)
Skandał pačatku hoda – admiena kancerta «Krambambuli» ŭ kłubie RePublic. Pakul usie razvodzili rukami, Volski ŭłasnaručna viartaŭ hrošy za kvitki admienienaha kancertu ŭ 20-hradusny maroz. Takaja maralnaja adkaznaść pierad publikaj, skazaŭ paśla Volski. Admienieny kancert usio ž adbyŭsia ŭ kancy krasavika ŭ Vilni. Razam ź biletam na kancert słuchač atrymaŭ biaspłatnuju adnarazovuju vizu.
Siarhiej Michałok (hurt «Lapis Trubiackoj»)
Bronieciahnik biełaruskaha andehraŭndu Siarhiej Michałok za apošni hod staŭ ledź nie niefarmalnym nacyjanalnym lidaram. Pry kancy 2011 hoda biełaruskaja prakuratura pravodziła pravierku vostrych vykazvańniaŭ Michałka pra Łukašenku. U suviazi z hetym, Michałok nie viartajecca ŭ Biełaruś bolš za paŭhoda. Šmatlikija fanaty «Lapisaŭ» u Biełarusi naviedvajuć kancerty hurtu za miažoj karavanami bas-turaŭ.
Kamientary