Śledčy kamitet Rasii inicyjavaŭ pravierku ŭ suviazi sa znachodžańniem u kvatery Ksienii Sabčak bujnoj sumy najaŭnych hrošaj.
Pra heta pieradaje Lenta.ru sa spasyłkaj na sajt viedamstva.
Jak havorycca ŭ paviedamleńni, meta pravierki — vyśvietlić, ci byli z hetych hrošaj vypłačanyja padatki, a taksama dla jakich metaŭ «mahła pryznačacca takaja bujnaja suma, rasfasavanaja bolš čym u 100 kanviertaŭ».
Hrošy na ahulnuju sumu bolš za miljon jeŭra, a taksama 480 tysiač dalaraŭ i 480 tysiač rubloŭ, byli vyjaŭlenyja i kanfiskavanyja padčas pieratrusu, praviedzienaha supracoŭnikami SK u kvatery Ksienii Sabčak 11 červienia. Pieratrusy ŭ hety dzień taksama prajšli ŭ kvaterach Alaksieja Navalnaha, Siarhieja Udalcova i inšych apazicyjanieraŭ u miežach rasśledavańnia spravy ab «biesparadkach» 6 traŭnia.
12 červienia apazicyjaniery byli zaprošanyja na dopyt u Śledčy kamitet. U paviedamleńni adznačajecca, što źjavilisia usie, za vyklučeńniem Udalcova, jaki zajaviŭ, što idzie na apazicyjny «Marš miljonaŭ». U SKR zajavili, što dastaŭlać jaho na dopyt prymusova śledstva nie płanuje.
U čas dopytu ŭ prysutnaści apazicyjanieraŭ i ich advakataŭ byli ahledžanyja kanfiskavanyja padčas pieratrusaŭ rečy. U SK padkreślili, što ŭsie zaprošanyja prachodziać pa spravie ab biesparadkach ŭ jakaści śviedak, tamu miera strymańnia ŭ dačynieńni da ich abiracca nie budzie. Usiaho pa spravie ab biesparadkach na Bałotnaj płoščy 6 traŭnia byli zatrymanyja 13 padazravanych, siamiora ź ich znachodziacca pad aryštam.
Miž tym, 12 červienia śledčyja mierapryjemstvy praciahnulisia: błohier byŭ zaprošany na pieratrus u ofisie hramadskaj arhanizacyi «RosPił», jakuju jon uznačalvaje.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja87
Kamientary