Łukašenka: Niekatoryja zamiežnyja banki viaduć siabie jak zamiežnyja ahienty
Jon źvinavaciŭ ich u ekanamičnym špijanažy.
Praca zamiežnych bankaŭ u Biełarusi abmiarkoŭvałasia 23 lipienia ŭ chodzie dakłada kiraŭnika Nacyjanalnaha banka Nadziei Jermakovaj Alaksandru Łukašenku.
Łukašenka nahadaŭ, što raniej daručaŭ źviarnuć uvahu na dziejnaść u Biełarusi daččynych pradpryjemstvaŭ i filijałaŭ zamiežnych bankaŭ.
«Jak pracujuć zamiežnyja banki, jakoje vaša mierkavańnie? — zadaŭ pytańnie Łukašenka. — Bo mnie pastupała infarmacyja, što niekatoryja zamiežnyja banki siabie viaduć prosta jak zamiežnyja ahienty ŭ poŭnym sensie hetaha słova.I ŭžo pradprymalniki kryŭdzilisia na toje, što finansavaja dakumientacyja vielmi šmatlikich kampanij kapijujecca i adpraŭlajecca niekatorych zakazčykam. Ja praviaraŭ. Heta sapraŭdy paćviardžajecca. Tamu ŭ svoj čas ja vas prasiŭ źviarnuć na heta ŭvahu.
Jakija miery nieabchodna pryniać, moža być, treba i majo ŭmiašańnie ŭ hetym płanie?».
Alaksandr Łukašenka źviarnuŭ uvahu na toje, što kali zamiežnyja banki pryjšli ŭ biełaruskuju ekanomiku, to pavinny na jaje pracavać, a nie prosta ŭdzielničać u cikavych dla siabie prajektach. «Banki, jakija pryjšli z zamiežnym kapitałam, u asnoŭnym rasijskim, na našym rynku pracujuć, kredytujuć ekanomiku», — adznačyła Nadzieja Jermakova.
Varta adznačyć, što infarmacyja ab vyciekach dakumientacyi z bankaŭ z zamiežnym kapitałam nie prachodziła. Nie da kanca jasna, što maje na ŭvazie Alaksandr Łukašenka i jakija banki padazraje.
Kamientary