Viačorka, Labiedźka, Krasucki pra rašeńnie Juščanki raspuścić Viarchoŭnuju radu

Pa prośbie BiełaPAN biełaruskija palityki prakamientavali rašeńnie prezidenta Ukrainy Viktara Juščanki raspuścić Viarchoŭnuju radu.

«Heta zakanamiernaje rašeńnie ŭ situacyi piermanientnaha kryzisu, — ličyć staršynia Partyi BNF Vincuk Viačorka. — Ad prezidenta taki krok zapatrabavaŭ peŭnaj mužnaści, uličvajučy jaho pavodziny na praciahu apošniaha hoda, kali pravodzilisia biaskoncyja kruhłyja stały. Niekatoryja vuzły, kali jany nie raźviazvajucca, davodzicca razrubać». V.Viačorka vykazaŭ nadzieju na abjadnańnie ŭkrainskich demakratyčnych sił, «ambicyi i supraćborstva jakich niehatyŭna paŭpłyvała na ich sumarny rejtynh». Na dumku palityka, kali ŭpłyŭ demakratyčnaha łahiera va Ukrainie budzie adnoŭleny, Kijeŭ budzie bolš žorstka aceńvać situacyju ŭ Biełarusi.

Namieśnik staršyni pastajannaj kamisii pa mižnarodnych spravach i suviaziach z SND Pałaty pradstaŭnikoŭ Nacyjanalnaha schodu Anatol Krasucki vykazaŭ škadavańnie ŭ suviazi z rašeńniem V.Juščanki. «Palityčny nakał u krainie nie spadaje, niahledziačy na projdzieny etap paśla prezidenckich i parłamienckich vybaraŭ. Usie hetyja dziejańni nie ŭ intaresach Ukrainy. Hałoŭnaje, kab usim chapiła mudraści nie vieści narod na barykady i vyrašać usie pytańni cyvilizavanym šlacham», — skazaŭ A.Krasucki. Pavodle jaho słoŭ, ciapierašniaja situacyja va Ukrainie stavić pad sumnieńnie praviadzieńnie ŭ najbližejšy čas sustrečy Viktara Juščanki i Alaksandra Łukašenki, jakaja ŭžo nieadnojčy pieranosiłasia. U toj ža čas, ličyć deputat, pa ekanamičnych adnosinach dźviuch krain palityčny kryzis u Kijevie «mocna nie ŭdaryć».

Na dumku lidera Abjadnanaj hramadzianskaj partyi Anatola Labiedźki, situacyju va Ukrainie skarystaje biełaruskaja prapahandysckaja mašyna. «Praciahniecca ekspłuatacyja tezisa: nie varta pravodzić «kalarovyja» revalucyi navat z udziełam miljonaŭ ludziej, tamu što jany nie pryvodziać da pazityŭnaha vyniku», — ličyć A.Labiedźka. Palityk zaklikaŭ da aściarožnaści ŭ acency padziej u Kijevie, bo «treba viedać nie tolki što havorać pa televizary, ale i što havorać i robiać u kułuarach».

Pra rašeńnie daterminova spynić paŭnamoctvy Viarchoŭnaj rady V.Juščanka abjaviŭ uviečary 2 krasavika. Daterminovyja vybary pryznačany na 27 maja. Parłamienckaja bolšaść, jakaja padtrymlivaje premjer‑ministra Viktara Janukoviča, ličyć niezakonnym rašeńnie prezidenta. U kaalicyju ŭvachodziać Partyja rehijonaŭ V.Janukoviča, Sacyjalistyčnaja partyja Ukrainy Alaksandra Maroza i Kamunistyčnaja partyja Ukrainy Piatra Simanienki. U kancy sakavika ab rašeńni ŭvajści ŭ kaalicyju abjavili niekatoryja deputaty apazicyi z Błoku Julii Cimašenki i praprezidenckaj «Našaj Ukrainy» Viačasłava Kirylenki. Kaalicyja maje prostuju bolšaść, ale nie maje kanstytucyjnaj.

• 0
• 0
• 0
• 0
• 0
• 0
• 0
• 0