10 tys. čałaviek padpisalisia za ŭniasieńnie źmianieńniaŭ u zakon «Ab svabodzie sumleńnia i relihijnych arhanizacyjach»
Za pieryjad z 22 krasavika pa 16 maja ŭ Biełarusi sabrana bolš za 10 tysiač podpisaŭ za ŭniasieńnie źmianieńniaŭ u zakon «Ab svabodzie sumleńnia i relihijnych arhanizacyjach».
Jak paviedamiŭ BiełaPAN pres‑sakratar kaardynacyjnaha centra kampanii pa abaronie pravoŭ na svabodu sumleńnia Siarhiej Łukanin, jaje pramiežkavyja vyniki byli ahučany na pasiadžeńni centra, jakoje adbyłosia 16 maja ŭ Minsku. Pavodle jaho słoŭ, kampanija prachodzić bolš čym u 30 haradach krainy. «Udzielniki pasiadžeńnia adznačyli ŭzmacnieńnie cisku na viernikaŭ, ab čym śviedčyć zabarona na śviaščenasłužeńnie kliryka Śviata‑Pakroŭskaj pravasłaŭnaj carkvy stalicy ajca Alaksandra Šramko i vysyłka ź Biełarusi zamiežnych śviataroŭ. Tak, z kanca minułaha hoda pa hety čas z krainy vysłany bolš za 25 zamiežnych misijanieraŭ. Pryčym bolšaści ź ich inkryminujecca dziejnaść, jakaja pahražaje nacyjanalnaj biaśpiecy Biełarusi. Udzielniki pasiadžeńnia źviarnuli ŭvahu na toje, što hetaja farmuloŭka vykarystoŭvajecca z 2001 hoda ŭ suviazi z pryniaćciem kancepcyi nacyjanalnaj biaśpieki, dzie dziejnaść zamiežnych relihijnych arhanizacyj i śviataroŭ na terytoryi krainy ŭjaŭlaje saboj pahrozu nacyjanalnaj biaśpiecy Biełarusi ŭ humanitarnaj halinie», — skazaŭ S.Łukanin.
Pavodle jaho słoŭ, kampanija pa zbory podpisaŭ vychodzić za ramki relihijnych arhanizacyj i nabyvaje ŭsio bolš hramadzianski charaktar. «U svaim vystupleńni jepiskap Abjadnańnia abščyn chryścijan poŭnaha Jevanhiella ŭ Respublicy Biełaruś Viačasłaŭ Hančarenka nahadaŭ słovy adnaho z zasnavalnikaŭ ZŠA Biendžamina Franklina ab tym, što «čałaviek, jaki zajaŭlaje ab nieabchodnaści abmiežavańnia svabody dla inšych, niedastojny svabody dla siabie». Tym samym jepiskap padkreśliŭ kaštoŭnaść svabody dla kožnaha hramadzianina Biełarusi», — zaznačyŭ S.Łukanin.
Nahadajem, što arhanizatary kampanii raźličvajuć sabrać nie mienš za 50 tysiač podpisaŭ pad adkrytym zvarotam da kiraŭnika dziaržavy, Kanstytucyjnaha suda, Pałaty pradstaŭnikoŭ Nacyjanalnaha schodu z zaklikam pryvieści ŭ adpaviednaść z Kanstytucyjaj zakon «Ab svabodzie sumleńnia i relihijnych arhanizacyjach», jaki dziejničaje z kanca 2002 hoda.
Fota photo.bymedia.net
Kamientary