Rasieja ŭžo nia brat

Rasijski analityčny centr Juryja Lavady («Lavada‑centr») apublikavaŭ novy rejtynh družalubnych i niedružalubnych dziaržaŭ u adnosinach da Rasii. Udzielnikam apytańnia, praviedzienaha ŭ mai hetaha hoda siarod 1.600 rasijan u 128 nasielenych punktach 48 rehijonaŭ krainy, prapanoŭvałasia nazvać piać krain, jakija, na ich dumku, možna ličyć najbolš blizkimi siabrami, sajuźnikami Rasii, i piać krain, jakija najbolš niedružalubna, varoža staviacca da RF.

Siarod najlepšych siabroŭ Rasii apynulisia Kazachstan (39%) i Biełaruś (38%), tady jak hod tamu ŭ anałahičnym rejtynhu ŭ Biełarusi było pieršaje miesca (47%), u Kazachstana — druhoje (33%). Dva hady tamu 46% apytanych nazvali sajuźnikam Rasii Biełaruś, 23% — Hiermaniju, 20% — Kazachstan.

Ekśpierty «Lavada‑centra» zaznačajuć, što chacia «samyja blizkija siabry» ciapier tyja ž, ale źmieny ŭ ich acenkach vielmi krasamoŭnyja. Pa‑pieršaje, Biełaruś zhubiła častku svaich prychilnikaŭ i manapolny status siabra Rasii numar adzin i dzielić jaho ciapier z Kazachstanam. Pa‑druhoje, sam hety status zasnoŭvajecca ciapier užo na značna mienšaj adnadušnaści mierkavańniaŭ, čym hod tamu.

Astatnija pazicyi ŭ pieršaj dziesiatcy siabroŭ Rasii za hod źmianilisia mała: Hiermanija (24%), Kitaj (19%), Armienija (15%), Indyja (14%), Ukraina (11%), Francyja (9%), Bałharyja (9%), Turkmienistan (8%). U paraŭnańni sa źviestkami anałahičnaha apytańnia, praviedzienaha dva hady tamu, ekśpierty źviartajuć uvahu na źmianieńnie staŭleńnia da Kitaja. Tak, kali ŭ 2005 hodzie 12% nazvali hetuju krainu sajuźnikam, to ŭ 2006 hodzie — užo 24%, praŭda, u hetym hodzie pakazčyk źniziŭsia da 19%.

Niedružalubnyja ŭ adnosinach da Rasii krainy sa značnym adryvam uznačalvaje Estonija (60%). «Palmu pieršynstva» ŭ radach niadobrazyčliŭcaŭ RF jana pierachapiła sioleta ŭ Łatvii (36%). Upieršyniu za apošnija hady źjaviłasia kraina, jakuju zmahli nazvać adnoj z najbolš niedružalubnych, varoža nastrojenych u dačynieńni da Rasii krain absalutnaja bolšaść rasijan.

Astatnija pazicyi ŭ pieršaj dziesiatcy vorahaŭ Rasii nastupnyja: Hruzija (46%), Łatvija (36%), ZŠA (35%), Litva (32%), Ukraina (23%), Polšča (20%), Afhanistan (11%), Irak (8%), Iran (7%).

U acenkach niadobrazyčliŭcaŭ, kanstatujuć sacyjołahi, rasijanie vykazvali i vykazvajuć bolš adnadušnaści, čym u acenkach sajuźnikaŭ. Inšymi słovami, za minuły hod rasijanie stali horš ujaŭlać sabie, chto ich najlepšy siabar, ale vobraz voraha staŭ bolš kansalidavanym. Ekśpierty «Lavada‑centra» vykazvajuć tryvohu nakont taho, što ŭ zaležnaści ad palityčnaj situacyi vobraz voraha moža lohka mianiać svaju łakalizacyju.

• 0
• 0
• 0
• 0
• 0
• 0
• 0
• 0