DEMANTAŽ
Stahnacyjnamu režymu, jaki ciapier panuje ŭ Biełarusi, hramadzianie supraciŭlajucca pa-roznamu: mastackim słovam na litaraturnych čytańniach, nadpisami na ścienach, pikietami, šeściami, mitynhami, zbrojaj, jakuju nabyvajuć pry lubym zručnym vypadku, samymi roznymi i časam aryhinalnymi akcyjami pratestu.
Nočču z 31 žniŭnia na 1 vieraśnia ŭ Viciebsku źnik biust Suvorava, jaki znachodziŭsia pobač z budynkami harvajenkamatu, rajadździeła milicyi i abłasnoha KHB. Adkaznaść za demantaž uziaŭ na siabie lehiendarny Miron.
Nahadaju, što ŭ 1794 hodzie rasiejski pałkavodziec Suvoraŭ patapiŭ u kryvi paŭstańnie našych prodkaŭ za niezaležnaść. Siońnia pa ŭsioj Biełarusi stajać dziasiatki suvoravych, a ŭ Kobryni pa-raniejšamu dziejničaje muzej hetaha «hieroja». Takuju hańbu biełaruski patryjot Miron ciarpieć nie źbirajecca, pra što i zajaŭlaje svaimi akcyjami. I tym samym vielmi dapiakaje miascovaj uładzie. Ułada adkazvaje represijami.
2 vieraśnia ŭ Viciebsku byli zatrymanyja redaktar hazety «Vybar» Barys Chamajda, supracoŭniki vydańnia Ŭładzimier Pleščanka i Juraś Karpaŭ. U ich na kvaterach operupaŭnavažanyja kryminalnaha vyšuku praviali pieratrusy.
Chamajdu j Karpava pratrymali ŭ pastarunku Kastryčnickaha RAUS kala siami hadzinaŭ, ale potym adpuścili, vypisaŭšy im pozvy na treciaha vieraśnia. U jakaści śviedak.
Chamajda i Karpaŭ admovilisia davać śledčamu tłumačeńni.
Praz dvoje sutak pa zatrymańni Ŭładzimieru Pleščanku śledčy Aŭčyńnikaŭ vysunuŭ abvinavačvańnie pavodle artykułaŭ 201 č.2 KK RB «Złosnaje chulihanstva, jakoje vyznačajecca vyklučnym cynizmam i dziorzkaściu» (da piaci hadoŭ źniavoleńnia) i 225 č.2 KK RB «Naŭmysnaje źniščeńnie historyka-kulturnych kaštoŭnaściaŭ» (da dvuch hadoŭ turmy). Vykanalnik abaviazkaŭ prakurora Kastryčnickaha rajonu Viciebska Uł.Kazłoŭ vynies pastanovu pra aryšt padazravanaha Pleščanki z farmuloŭkaj: «Znachodziačysia na voli, moža pieraškodzić vykryćciu złačynstva». Jak paviedamlajuć našyja krynicy infarmacyi ŭ Viciebsku, na miescy, dzie stajaŭ biust akupanta, tamtejšyja pinkiertony pierakapali niekalki dziasiatkaŭ kvadratnych metraŭ hleby, šukajučy «rečavyja dokazy». Adnak lahična dumać, što kali Miron zmoh demantavać hipsavaje tułava pad nosam u milicyi dy abłhebe, dyk napeŭna jon pakłapaciŭsia i pra toje, kab nie pakinuć pa sabie śladoŭ.
Biust urešcie znajšli. A kala jaho i zapisku, u jakoj Miron papiaredžvaje ŭłady, što kali hramadzianin Pleščanka, staršynia Rady BNF «Vybar», nia budzie ŭ bližejšy čas vypuščany na volu, u Viciebsku mohuć być demantavanyja i inšyja pomniki, jakija symbalizujuć epochu rasiejska-balšavickaj akupacyi. Miarkujučy pa tym, ź jakoj nastojlivaściu i, možna skazać, prafesijanalizmam dziejničaje viciebski Miron, treba dumać, što i čarhovuju svaju pahrozu jon paśpiachova ździejśnić. Kali, viadoma, hramadzianin Pleščanka nia budzie adpuščany z turmy.
Što ž da pieramieščanaha biusta Suvorava, dyk viadoma, što pastaŭleny jon byŭ u biełaruskim Viciebsku až u 1952 hodzie, jašče pry žyćci Stalina. U 1987 hodzie, za hod da adkryćcia Kurapataŭ, hipsavy biust hieneralisimusa-akupanta byŭ uziaty pad dziaržaŭnuju achovu, ale ŭžo ŭ 1991 hodzie adździeł kultury viciebskaha harvykankamu ŭnios jaho ŭ śpis pomnikaŭ, jakija nia majuć historyka-kulturnaj kaštoŭnaści i tym samym nie padlahajuć dziaržaŭnaj achovie. Siońnia za sarakašaścihadovaha hipsavaha Suvorava biełarus Uładzimier Pleščanka ŭžo miesiac siadzić u turmie. Ale heta nie spyniaje niaŭłoŭnaha Mirona: da čarhovaj hadaviny Aršanskaj bitvy jon vyviesiŭ bieła-čyrvona-bieły ściah na 50-metrovaj viežy ŭ Loźnie, jakaja staić kala šašy Smalensk — Viciebsk.
Bo skazana ŭ starych piśmionach: mnie adpomščańnie i tym spłaču!
Miron Mienski
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar10
Kamientary