"Bałtyjskim chvalam" u efiry pakul admovili
U minułuju sieradu Kamisija radyjo i telebačańnia Litvy pa vynikach konkursu admoviła ŭ licenzii na viaščańnie dla radyjo "Bałtyjskija chvali".
Prajekt deputata litoŭskaha sejma Rymantasa Plejkisa sumiesna ź Biełaruskim Infarmacyjnym Centram praduhledžvaŭ štodzionnuju tranślacyju na siarednich chvalach pa-biełarusku jak ułasnych prahram, tak i retranślacyju inšych biełaruskich pieradačaŭ, jakija robiacca za miežami Biełarusi i vychodziać na karotkich chvalach. Ahułam "Bałtyjskija chvali" pretendavali na piać hadzinaŭ viečarovaha eteru. Adnak Kamisija radyjo i telebačańnia, nadzielenaja paŭnamoctvami raźmierkavańnia radyjočastotaŭ, paličyła prajekt niemetazhodnym.
Z kampetentnych krynicaŭ nam stała viadoma, što da takoha rašeńnia Kamisiju schiliŭ "zvanok" z administracyi prezydenta V.Adamkusa, jaki, u svaju čarhu, užo niekalki miesiacaŭ adčuvaje presynh z boku jak dyplamataŭ A.Łukašenki, tak i słužbaŭ biaśpieki rasiejska-biełaruskaha sajuzu, dla jakoha niedapuščeńnie "Bałtyjskich chvalaŭ" stałasia adnoj z hałoŭnych zadač. U pryvatnaści, jak stała viadoma ad supracoŭnikaŭ brytanskaha Vestminsterskaha fondu, što deklaravaŭ finansavuju padtrymku novamu radyjo, da ich z metaj spynić prajekt nieadnarazova źviartaŭsia pasoł Biełarusi ŭ Anhlii Uł.Ščasny.
Novaje radyjo miełasia stać alternatyŭnym srodkam masavaj infarmacyi na siarednich chvalach, što i naściarožvała prezydenta Łukašenku, paśla abrańnia jakoha, jak viadoma, u Biełarusi byli zakrytyja ŭsie niezaležnyja elektronnyja srodki masavaj infarmacyi. Admova ŭ licenzii čarhovy raz śviedčyć pra zaležnaść Litvy ad palityki ŭschodniaha susieda.
Infarmatar
P.S. U minułuju piatnicu Kamisija radyjo i telebačańnia Litvy, jakoj, vidavočna, zaležyć na ŭłasnaj niezaležnaści ad dziaržaŭnych strukturaŭ, sabrałasia znoŭ, kab "źmiakčyć" svajo raniejšaje admoŭnaje rašeńnie. U vyniku byŭ abvieščany novy konkurs na tyja samyja častoty, ale nie na standartnuju piacihadovuju licenziju, a na hadavuju. Zajaŭki prymajucca da 4 žniŭnia, a vyniki konkursu buduć abvieščanyja 18 žniŭnia. Jak paviedamiŭ "NN" Rymantas Plejkis, "Bałtyjskija chvali" ŭžo padrychtavali novuju zajaŭku, ale prahnazavać vynik jon nie biarecca. "Składvajecca ŭražańnie, što Kamisija tolki zaciahvaje čas, imknučysia zachavać bačnaść svajoj niezaležnaści ŭ krainie, dzie pavodle Kanstytucyi nia moža być dziaržaŭnaha kantrolu nad ŚMI", – skazaŭ R.Plejkis.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii31
Kamientary