Barys Tumar. Stancyja koštam u 10 miljonaŭ žyćciaŭ

Stancyja koštam u 10 miljonaŭ žyćciaŭ

Pamočnik ministra abarony Biełarusi Jury Partnoŭ pastaviŭ adkryćcio radyjalakacyjnaje stancyi rańniaha papiaredžańnia ab rakietnym napadzie pad Hancavičami ŭ zaležnaść ad taho, «nakolki daloka zojduć ZŠA ŭ planach stvareńnia nacyjanalnaj systemy supraćrakietnaj abarony», paviedamiła Radyjo Svaboda.

Što ž niabozie-Biełarusi da amerykanskaj procirakietnicy? Niebiaśpieku dla Biełarusi sp.Partnoŭ patłumačyŭ hetak: “Biełaruś u adnym chaŭrusie z Rasiejaj, i my budziem padtrymlivać usie namahańni Rasiei ŭ spravie ŭmacavańnia jejnaje biaśpieki”. Rasieja ličyć, što plany ZŠA supiarečać damovie pa supraćpavietranym uzbrajeńni, padpisanaj u 1972 hodzie. ZŠA ž pierakonvajuć, što ŭ cyvilizavanaha śvietu niama inšaha sposabu zastrachavacca ad mahčymaj pahrozy z boku patencyjna terarystyčnych ci niestabilnych krain z dyktatarskimi režymami (jakija ciapier užo, vykraŭšy ci raspracavaŭšy, majuć rakietnyja technalohii i zbroju masavaha zabojstva), aproč jak stvaryć vielmi nadziejnuju systemu supraćrakietnaj abarony. Damova 1972 hodu raspracoŭvałasia pad tahačasny dvuchpolusny śviet. Praduhledžvałasia, što ni ŭ Ameryki, ni ŭ Savietaŭ nia budzie dobraj procirakietnicy — hetak abodva buduć hołyja i buduć bajacca napadać na inšaha, nia majučy jak abaranicca ad udaru ŭ adkaz.

Zaraz, kali Ameryka nie admovicca ad planaŭ umacavańnia biaśpieki Zachadu, Rasieja abiacaje pryniać “adekvatnyja miery”. Heta nia budzie nabližeńnie rasiejskich stratehičnych rakietaŭ u zachodnim kirunku na 500 biełaruskich kilametraŭ — što mahło b mieć adno symbaličnaje, a nie pryncypovaje značeńnie. Kreml pastanaviŭ zabiaśpiečycca inakš — adkryć stancyju pad Hancavičami. Pabudova tam hatovaja na 95%, a ahulnaja hatovaść stancyi da čynnaści — na 80%. Budujuć jaje ŭžo dziesiać hadoŭ, pracujuć zbolšaha rasiejskija specyjalisty. Budoŭlu zamarozili ad 1992-ha, kali mierkavałasia, što rasiejskija vojski pakinuć Biełaruś, ale adnavili za Łukašenkam. Ministar abarony Rasiei Ihar Siarhiejeŭ pad čas letašniaha vizytu da nas chvaliŭsia, što stancyju pastaviać «na bajavoje dziažurstva» ŭ 2000 hodzie. Hrošaj za jaje arendu naša dziaržava mieć nia budzie, bo pravy ŭłasnaści na stancyju pieradała Maskvie.

Stancyja pad Hancavičami — vializny abjekt radyjolakacyjnaha sačeńnia za pavietranaj prastoraju pa-nad usioj Eŭropaju, až pad Atlantyku, ad Hibrałtaru da Skandynavii.

Były ministar abarony Biełarusi Pavał Kazłoŭski ŭ interviju Radyjo Svaboda skazaŭ, što dziela biaśpieki samoj Biełarusi stancyja niepatrebnaja, ale jak element abarony Rasiei jaje ciažka pieraacanić. Bo analahičnuju stancyju ŭ Skrunde (Łatvija) demantavali, a pad Užharadam (ukrainskaje Zakarpaćcie) spynili budavać — jany ekalahična nie biaz škody, a palityčna niasuć pahrozu padjaremleńnia hetych krainaŭ Rasiei. Biełarusy ž panura bryduć da Maskvy ŭ zakład.

Stancyja i niedabudavanaja stała instrumentam šantažu śvietu jadziernaj Rasiejaj (pryčym biełaruskimi vusnami). Dabudavanaja, jana niekali moža abyścisia Biełarusi ŭ 10 miljonaŭ žyćciaŭ — košt našmat bolšy za toj, što kraina zapłaciła ŭ 1709-m, i 1812-m, i 1915-m, i 1944-m.

Pratestaŭ z boku biełaruskich pacyfisckich i ekalahičnych arhanizacyjaŭ pakul nie było.

Barys Tumar