Naviny

 Naviny

Hałodnyja zimy kałhasu imia Mičuryna

U kałhasie imia Mičuryna, što na Astravieččynie, u schoviščach zastałosia tolki 70 ton zbožža. A na patreby štomiesiac nieabchodna pad 50 ton. Kab našyja dziady paŭstavali z mahiłaŭ i pabačyli, jak žyvie Zachodniaja Biełaruś praz 60 hod savieckaj ułady!

Marjan Vianhroŭski

Turko — najlepšy baletnik

Učora pozna ŭviečary ŭ Vialikim teatry abvieścili imia laŭreata premii «Filip Morys» lepšym artystam baletu za 1999 hod. Abrali zusim maładzieńkaha tancora — Alaksieja Turko za partyju Tarera ŭ «Karmen-siuicie». Jon u teatry tolki z 1998 hodu, a pryjšoŭ ź Mienskaje chareahrafičnaje vučelni. Atrymaje jon 5000 dalaraŭ, a piać jahonych supiernikaŭ — pa suciašalnych 500 dalaraŭ.

Alena Danejka

Šaramiecicha versus Šaramiet

Sorak žančynaŭ, mužy, syny ci svajaki jakich paciarpieli ad pieraśledu aficyjnych uładaŭ, stvaryli «Žanočuju inicyjatyvu» — arhanizacyju ŭzajemadapamohi. U inicyjatyŭnuju hrupu ŭvajšli Aryna Viačorka, Taciana Klimava, Luboŭ Ščukina, Tamara Chaščavackaja, Lucyja Chalip, Ludmiła Šaramiet, Śviatłana Lavonava, Śviatłana Labiedźka, Taciana Statkievič, Halina Šareckaja, Halina Siŭčyk. Žančyny najpierš pryniali zajavu pratestu suprać źbićcia ŭ viaźnicy Andreja Klimava i zajavu pra haniebnaść biełaruska-rasiejskaha sajuzu. Pad druhoju zajavaju pastaviła svoj podpis i Halina Šaramiet, maci słavutaha maskoŭskaha dyktara.

U Sibir, kab nie piščeli

16 studzienia ŭ Barysavie 10 čałaviek vyjšli na niesankcyjavany pikiet na centralny plac horadu, kab vykazać pratest suprać parušeńnia pravoŭ čałavieka ŭ krainie i źviarnuć uvahu ludziej na palityčny praces nad Čyhirom. Praz 26 chvilinaŭ padjechali try milicejskija mašyny i zabrali Anatola Askierku, Hienadzia Haŭrusieva, Alaksandra Abramoviča i Alaksandru Jasiuk. Usich zatrymanych zavieźli ŭ HAUS, skłali pratakoły i praz paŭtary hadziny vypuścili. Składaŭ pratakoły i kiravaŭ zatrymańniem kapitan Kiryn. Jon chvaliŭsia zatrymanym, što ŭdzielničaŭ u šturmie Hroznaha pad čas pieršaj čačenskaj vajny, abiacaŭ, što Pucin z Łukašenkam naviaduć paradak, a Anatola Askierku, jaki ŭ pastarunku patrabavaŭ pierakładčyka, pahražaŭ vysłać u Sibir.

BNF hukaje “Viasnu—2000”

Sojm BNF u subotu ŭvahu skiravaŭ na padrychtoŭku masavych akcyjaŭ uviesnu 2000 hodu, pačynajučy z akcyi prafsajuzaŭ u abaronu pradprymalnikaŭ, Dnia Śviatoha Valancina, akcyi biełaruskich veteranaŭ vajny ŭ Aŭhanistanie 15 lutaha. Hałoŭnymi viesnavymi akcyjami stanuć Dzień Kanstytucyi, Dzień Voli i Čarnobylski Šlach, a taksama hadavina antybiełaruskaha referendumu 14 traŭnia. BNF zaklikaje ŭsich dałučacca.

Alaksiej Šein

Lavonavu dali 4 hady

Byłoha ministra sielskaje haspadarki Vasila Lavonava sudździa Čartovič pryznaŭ vinavatym u chabarnictvie j kradziažy dziaržaŭnaje majomaści j pakaraŭ čatyrma hadami kalonii z kanfiskacyjaj majomaści. Prysud Čartovič začytvaŭ hadzinu. Pa balšyni abvinavačańniaŭ Lavonava apraŭdali, adnak rešty akazałasia dastatkova, kab adpravić byłoha ministra ŭ turmu. Byccam by Lavonaŭ atrymaŭ jak chabar abo skraŭ charčoŭ i rečaŭ na 115 tys. denaminavanych rubloŭ — kala 140 dalaraŭ ZŠA. Takaja suma ličycca asabliva bujnoj. Bolš za dva hady, jakija Lavonaŭ pravioŭ u śledčym izalatary, jamu zaličanyja. Takim čynam, były ministar vyjdzie na volu nie paźniej za 11 listapada 2001 hodu. A kali budzie dobra pavodzicca ŭ kalonii, dyk i na paŭhady raniej.

Kali biełaruskaja savieckaja namenklatura i maje niejki symbal, dyk im staŭ Lavonaŭ, čałaviek, jaki zrabiŭ bliskučuju kamunistyčnuju karjeru, jaki pieramianiŭ pohlady pad upłyvam ubačanaha pad čas pracy ŭ Niamieččynie i pryjšoŭ da pierakanańnia ŭ vartaściach biełaruskaje niezaležnaści i rynkavaj ekanomiki. I trapiŭ u abcuhi toj samaj systemy, jakuju kavaŭ i hartavaŭ.

Adkazvajučy paśla sudu na pytańni žurnalistaŭ, jon skazaŭ, što za kraty jaho ŭpiok asabista Łukašenka, ale admoviŭsia pryznacca, za što hetaja pomsta.

Barys Tumar

Ź Vieny

U Vienie, dzie prachodziła štohadovaje pasiedžańnie Stałaha kamitetu Parlamenckaj Asamblei Arhanizacyi Biaśpieki i Supracoŭnictva ŭ Eŭropie, razhladałasia pytańnie Biełarusi. Viarchoŭny Saviet RB u pałacy Hoŭburh pradstaŭlali Siamion Šarecki i jahony namieśnik Anatol Labiedźka. Ad hrupy ABSE vystupiŭ sa spravazdačaj sp.Sieviaryn, i adbyłasia dyskusija. Pradstaŭniki Rasiei i Kirhistanu vystupili ŭ abaronu aficyjnaha Miensku i prapanavali dać słova Kanaplovu, jaki taksama pryjechaŭ u Vienu. Adnak prezydent Parlamenckaj Asamblei ABSE spn.Dejn admoviła, patłumačyŭšy, što heta budzie suprać praviłaŭ i praceduraŭ, pryniatych u ABSE. Pradstaŭnik ža Słavaččyny vystupiŭ z rezkaj krytykaj biełaruskich uładaŭ i prapanavaŭ skasavać u rezalucyi zaklik da kampramisu bakoŭ u spravie padrychtoŭki da vybaraŭ. 50 na 50, skazaŭ pradstaŭnik Słavaččyny, havoračy pra sytuacyju ŭ Biełarusi, heta ŭsio roŭna, jak vieści pieramovy pierad hazavaj kameraj pamiž katam i achviaraj, i kazać: vy abodva majecie racyju napałovu. Hetaja zajava vyklikała vopleski ŭ kiraŭnika delehacyi Złučanych Štataŭ Ameryki, vice-prezydenta Parlamenckaj Asamblei ABSE Stejni Hojera. Anatol Labiedźka davoli strymana, ale skieptyčna acaniŭ vynik pracy hrupy ABSE ŭ Miensku. Jon adznačyŭ, što ŭsie pahadnieńni, pad jakimi staić podpis Alaksandra Łukašenki, tak i tak nie vykonvajucca. Labiedźka zaklikaŭ pradstaŭnika Rasiei i ŭsich siabroŭ ABSE nie šturchać Biełaruś u Eŭropu praz Maskvu, kali jość šlach namnoha bolš karotki — praz Buh.

Pavodle Radyjo Svaboda

Z novym horam

13 ctudzienia 2000 hodu Alaksandar Łukašenka vystupaŭ na pryjomie z nahody navahodnich i kaladnych śviataŭ i vyklikaŭ siarod dyplamataŭ šmat plotak. Jak kažuć vidavočcy-dyplamaty, Łukašenka vyhladaŭ vielmi stamlonym i nervovym. Było bačna, što jon nie ŭ humory, što adčuvaje siabie kiepska. Rasiejskija dyplamaty kažuć, što Ŭładzimier Pucin byccam by zabaraniŭ Łukašenku pajezdki ŭ rasiejskija rehijony. Kali Łukašenka pryjaždžaje ŭ rasiejskuju huberniu ŭ ranhu prezydenta farmalna niezaležnaje krainy, dyk jon tym samym uzdymaje miascovaha hubernatara da svajho ŭzroŭniu, što, jak ličyć Pucin, razburaje centralizacyju ŭłady ŭ Rasiei. Źviarnuli ŭvahu i na toje, što Łukašenka vyjšaŭ na pryjom u supravadžeńni achovy.

Najbolš havaryli z Łukašenkam pasoł ZŠA Spekhard i kiraŭnik hrupy ABSE ŭ Biełarusi Vik. Padobna, ni da čaho nie dahavarylisia.

Hary Kumaniecki

ź biełaruskaj Vilenščyny

Veterany suprać anšlusu

Amal dźvie hadziny doŭžyłasia ŭ minułuju sieradu ŭ Maładečnie akcyja miascovaj filii Biełaruskaha Demabjadnańnia «Veteran». Dziesiać čałaviek abstupili kamień na Centralnaj płoščy, jaki lažyć u pamiać pakutnikaŭ za volu i niezaležnaść Biełarusi, zapaliŭšy śviečki. Hetym veterany vykazvali svoj pratest suprać anšlusu Biełarusi.

Marjan Vianhroŭski

z Puščanskaha kraju

Vaŭkavyskija ciepłavozy

U Vaŭkavysku navučylisia ładzić ciepłavozy. Adrazu znajšlisia klijenty z Rasiei. Płaciać strašnyja hrošy, aby paładzili — inakš u Sibiry jeździć niama čym.

Ivan Čapieka

z Padniaproŭja

Akcyjaneraŭ nie naduryš

Supołka Svabodnaha prafsajuzu ŭ ciapierašnim «sercy krainy», Škłoŭskim rajonie, vyjhrała dva sudovyja pracesy zapar suprać kiraŭnictva zakrytaha akcyjanernaha tavarystva «Pramień» (kolišniaja fabryka nadomnaj pracy).

Tut užo praciahły čas hrupa rabotnic abvinavačvaje dyrektara Siarhieja Žalazoŭskaha ŭ złoŭžyvańni słužbovym stanoviščam, padtasoŭcy dakumentaŭ, prypiskach. A ŭ pryvatnaści, u tym, što dyrektar pradavaŭ svajakam majomaść akcyjaneraŭ, pryčym pa zanižanych koštach. Samych aktyŭnych z buntaroŭ dyrektar prosta zvolniŭ. Cikava, što zvolnienyja, načalnicy cechaŭ Alona Harunova i Alaŭcina Prakapienka, — raniejšy i ciapierašni staršyni Praŭleńnia akcyjaneraŭ. Sudździ ž Taciana Kaškina i Hieorhi Dziemidzienka sprečku dyrektara z apazycyjnym prafsajuzam vyrašyli na karyść rabotnikaŭ. Supracoŭnicy viarnulisia na pracu.

Lutaŭski strajk

Zvyš 90% handlaroŭ z rečavych rynkaŭ Mahilova padtrymajuć lutaŭski ahulnanacyjanalny strajk, jaki miarkujecca raspačać z 1 lutaha. Pra heta śviedčać vyniki apytańnia 1113 čałaviek, što handlujuć na rynkach Mahilova, — paviedamiŭ lider prafsajuzu pryvatnych pradprymalnikaŭ Siarhiej Famin.

P.S. Miž tym, napiaredadni ahulnanacyjanalnaha strajku ŭłady stali cisnuć na niekatorych siabroŭ prafabjadnańnia handlaroŭ. Tak, na mienskim kirmašy «Dynama» zatrymali 35-hadovaha aktyvista Svabodnaha prafźviazu pradprymalnikaŭ Ihara Namočanku. Jamu skazali, što jon niezakonna raspaŭsiudžvaje antyprezydenckuju litaraturu — u prafsajuznym biuleteni, jaki jon razdavaŭ, była karykatura na čałavieka, padobnaha da Łukašenki.

Rekiet pa-dražynsku

Na Mahiloŭščynie ŭžo praktyčna adnoŭlenaje kolišniaje sacyjalistyčnaje spabornictva. U adroźnieńnie ad starych časoŭ, ciapier ułady vyrašyli, što ciažar konkursu bolš razumna pierakłaści na tych, siarod kaho jon i pravodzicca — pryniali rašeńnie ab stvareńni specyjalnaha fondu, u jaki pradpryjemstvy buduć unosić adpaviednyja sumy. Ź ich i pačastujuć pieramožcaŭ na ich ułasnyja hrošy.

«Fluhier» i Kasia ŭ Babrujsku

Učora ŭ Babrujsku ŭ pałacy zavodu humatechničnych vyrabaŭ śpiavali Kasia Kamockaja i tutejšaja hrupa «Fluhier». Hledačy (kala 250 čałaviek) i ź ziemlakoŭ, i z «Cepelinaŭ» ciešylisia. Kasia pryjechała ŭ Babrujsk z Poznani, dzie vystupała na spatkańni biełaruskaj i polskaj intelihiencyi.

Symon Hłazštejn