№ 11 (168), 13 — 19 sakavika 2000 h.
listy ŭ redakcyju
Spabornictvy ŭ antybiełaruskaści
Iryna Parachońka, jakaja pabrałasia šlubam ź Jurjem Kazijatkam i pamianiała proźvišča (paśla čaho niekatoryja kalehi pačali zvać jaje Kazachońkaj, a jaho — Parazijatkam), niejak była viadučaj vypusku navin u 15.00 u niadzielu. Ale hety vypusk spaźniŭsia chvilin na 10. Niekatoryja hledačy paśpieli padumać, što ŭ krainie revalucyja ci pamior chto. Paźniej vyjaviłasia, što ź Irynaj zdaryłasia histeryka, i jana admoviłasia vychodzić u efir. Pryčyna — niechta zrabiŭ joj zaŭvahu jakraz pierad vypuskam. Paśla hetaha Irynu adchilili ad pracy viadučaj na niapeŭny termin.
A Jury Kazijatka paśpiachova pierajmaje łaŭry Zimoŭskaha. Raniej na BT užo adnojčy była kankurencyja pamiž dvuma rasiejskamoŭnymi arakułami — Alaksandram Zimoŭskim dy Iharam Hryšanom. Tady Hryšana źjeli, i jon znajšoŭ sabie prytułak u «Narodnaj hazecie» na čale z Šymanskim. Ciapier kažuć, što šancy Zimoŭskaha horšyja: maładaja kroŭ kankurenta až kipić. Navošta biełaruskamu BT dźvie tak zvanyja analityčnyja prahramy na rasiejskaj movie, nichto nie razumieje. Navat na Makajonka, 9 ličać heta parodyjaj na ORT z Darenkam i Šaramietam. Zimoŭski spadziajecca, što Kazijatka sydzie na BT-2, ale moža hetaha nie dačakacca — tady jaho samoha «syduć». Pakul ža Kazijatka pieraplunuŭ Zimoŭskaha ŭ antybiełaruskaści na BT: u subotniaj «Panaramie» navat tytry pišuć pa-rasiejsku, choć z paniadziełka pa piatnicu i ŭ «Rezanansie» — dahetul pa-biełarusku.
Tym časam biezvynikova praciahvajecca baraćba za čyściniu movy tam, dzie jana na BT jašče zastałasia. Iryna Suškievič pastajanna pramaŭlaje «pryspynić» zamiest «prypynić», a Jury Šamšur — «zaŭpeŭniŭ» zamiest «zapeŭniŭ». Pieravučyć ich pakul nie ŭdajecca. A voś Inha Chruščova (unutranaja televizijnaja mianuška Čypiła) ź ciažkaściu, adnak zmahła pazbavicca svajho admysłovaha słoŭca «ŭniverstytet».
Haradzienski karespandent ATN Mikałaj Kaziejka daŭmieŭsia prailustravać siužet pra samazabojcu, jaki ŭpaŭ z televiežy abłasnoha teleradyjoabjadnańnia. Spačatku jon pakazaŭ zdalok čałavieka, što pabieh da viežy, potym jahonyja nohi, jakija ŭźbiralisia pa prystupkach, narešcie, tyja ž nohi, što lažali na pakrytaj śnieham ziamli. Vykanaŭca roli nieviadomy, ale ideja bliskučaja. Dumaju, letam u repartažy z Horadni pra tapielcaŭ my ŭbačym čałavieka, jaki raspranajecca, potym jahonuju hałavu ŭ race, a dalej — burbałki dy kruhi na vadzie.
Hieorhi Kavaleŭski,
Miensk
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym8
Kamientary