№ 16 (173), 17 — 23 krasavika 2000 h.
Biesprecedentnaja rezalucyja Kanhresu ZŠA pra Biełaruś
Kamitet mižnarodnych znosinaŭ Pałaty Pradstaŭnikoŭ Kanhresu ZŠA ŭchvaliŭ prajekt rezalucyi ŭ spravie Biełarusi, pradstaŭleny kanhresmenam Semam Hiejdensanam, baćki jakoha pachodziać ź Biełarusi i byli ŭ vajnu ŭratavanyja sialanami Parafjanava, što pad Dokšycami.
Rezalucyja №304 asudžaje režym A.Łukašenki i patrabuje ad Rasiei pierastać spansaravać jaho. Hiejdensan adznačyŭ u svaim prajekcie nieabchodnaść padtrymki tych, chto pakutuje ŭ vyniku nielehitymnaha kiravańnia A.Łukašenki. Dakument asudžaje palityčna matyvavanyja aryšty dysydentaŭ i patrabuje ich nieadkładnaha vyzvaleńnia. “Łukašenka ŭžyvaje taktyku zaciahvańnia pieramovaŭ pad ehidaj ABSE. Atmasfera represijaŭ i strachu ŭ Biełarusi vyklučaje lubuju mahčymaść praviadzieńnia sioleta svabodnych i spraviadlivych vybaraŭ”, — zajaviŭ Hiejdensan.
U rezalucyi asudžajecca taksama padpisańnie sajuzu z Rasiejaj i stavicca pad sumnieŭ lehitymnaść jaho, bo demakratyčna abrany Łukašenka letaś straciŭ prava padpisvać takija dahavory ad imia dziaržavy. «Damova parušaje suverenitet Biełarusi i volu biełaruskaha narodu», — zajaviŭ sp.Hiejdensan. Adznačajecca taksama, što damova piarečyć memarandumu ab harantyjach biaśpieki, padpisanamu prezydentam Jelcynym u śniežni 94-ha ŭ časie samitu krain-siabroŭ ABSE ŭ Budapešcie. Narešcie, rezalucyja zaklikaje prezydenta Klintana ŭźniać pytańnie finansavaj padtrymki łukašenkaŭskaha režymu z boku rasiejskaha ŭradu. Hiejdensan adznačyŭ, što finansavaja padtrymka Kramlu, u pryvatnaści, źnižanyja ceny enerhanośbitaŭ, dazvalaje Łukašenku ŭtrymlivać vialikija palicejskija siły. Dakument zaklikaje administracyju Klintana dać Kanhresu spravazdaču z kankretnych krokaŭ, dziela taho kab prymusić urad Rasiei pierastać padtrymlivać režym Łukašenki i admovicca ad intehracyi ź Biełarusiaj u vajskovaj halinie.
Rezalucyja abiacaje być biesprecedentnaja. Jaje padtrymali ŭžo 130 kanhresmenaŭ.
Pavodle Radyjo Svaboda
Kamientary