Naviny

Naviny

Bykava nie vypuskajuć ź Niamieččyny

Vasil Bykaŭ, jaki pryjechaŭ u Niamieččynu na zaprašeńnie tamtejšaha PEN-centru, ciapier pazbaŭleny mahčymaści ź Niamieččyny vyjaždžać.

Hetymi dniami ŭ Varšavie mierkavali naładzić prezentacyju polskaha pierakładu bykaŭskaj "Ściany", što vyjšła ŭ biełastockim vydaviectvie Alaksandra Maksymiuka i była vielmi prychilna sustretaja polskaj presaj i krytykaj. Piotra Kempiński ŭ hazecie "Žečpaspolita" napisaŭ, što hetuju knihu musić pračytać kožny palak, kab biełaruskaje siońnia nahadała jamu pra niadaŭniuju minuŭščynu Polščy. Ciopła adhuknuŭsia na knihu Bykava i Adam Michnik u "Hazecie Vyborčaj".

Bykaŭ, adnak, nia moža pryjechać na prezentacyju knihi ŭ Varšavie 5 červienia, jakuju ładzić Instytut Biełaruskaj Kultury. Reč u tym, što niamieckija ŭłady padoŭžyli jamu vizu na pierabyvańnie ŭ krainie na paŭhady tolki jak adnarazovuju. Ciapier jon nia maje mahčymaści vyjechać ź Niamieččyny, bo nia zmoh by viarnucca nazad.

Polskija biełarusy ŭ kuluarach havorać, što idziecca pra faktyčnaje internavańnie biełaruskaha piśmieńnika, "kab nia jeździŭ i nie nastrojvaŭ suśvietnaj hramadzkaj dumki suprać režymu Łukašenki". Prykry fakt abmiežavańnia svabody pieramiaščeńnia Vasila Bykava, ličać jany, – heta jašče adzin štrych u dvuchsensoŭnaj niamieckaj stratehii da Biełarusi, pieradusim skiravanaj na zabieśpiačeńnie biaspłatnaha tranzytu ź Niamieččyny ŭ Rasieju biez zališniaj uvahi na intaresy biełaruskaj niezaležnaści.

Navat kali abmiežavańnie maje čysta biurakratyčnyja pryčyny, jano śviedčyć pra abyjakavaje staŭleńnia Niamieččyny da biełaruskich intaresaŭ.

Barys Tumar

Źjezd Narodnaj Hramady

Narodnaja Hramada była vymušanaja ŭ apošni momant źmianić miesca praviadzieńnia svajho źjezdu, jaki pačaŭsia ŭ Miensku pazaŭčora. Pradstaŭniki kampanii "Bielinturyst", čyjo pamiaškańnie kala hatelu "Jubilejny" BSDP-NH brała ŭ arendu na čas źjezdu, naviedali ofis partyi 2 červienia i viarnuli hrošy za arendu, nie rastłumačyŭšy pryčynaŭ admovy. Jak ni šukali sacyjał-demakraty novaha pamiaškańnia, usiudy im admaŭlali. Tamu ad miesca zboru kala "Jubilejnaha" delehaty nakiravalisia ŭ siadzibu BNF "Adradžeńnie" na Varvašeni, 8, dzie j pačaŭsia źjezd. Pa darozie delehataŭ zdymali na videakameru supracoŭniki milicyi.

Adno z najvažniejšych pytańniaŭ źjezdu – pra mahčymy ŭdzieł partyi ŭ parlamenckich vybarach hetaj vosieńniu. Pavodle słovaŭ staršyni partyi, sp.Statkieviča, BSDP-NH sprabavała być bolš hnutkaj u hetym pytańni, spadziejučysia, što Alaksandar Łukašenka, straciŭšy nadziei atrymać realnuju ŭładu ŭ Maskvie, pojdzie na kampramisy z apazycyjaj dziela zachavańnia niezaležnaści Biełarusi. "Ale, na žal, ułady ŭsprymajuć lubyja sproby kampramisu jak słabaść, – zajaviŭ kiraŭnik BSDP (NH). – My možam zajavić ab svajoj hatoŭnaści ŭdzielničać u vybarach tolki kali my ŭbačym realnyja zruchi z boku ŭłady. U adkaz na ŭcisk treba demanstravać žorstkaść".

Źviartajučysia da źjezdu ad imia Partyi BNF, Jury Chadyka prapanavaŭ, kab asobnym punktam na źjeździe było pryniata rašeńnie pra ŭdzieł BSDP-NH hetym letam u Kanhresie demakratyčnych siłaŭ, dzie b uzhodniena prymałasia rašeńnie pra ŭdzieł ci niaŭdzieł apazycyjnych partyjaŭ u parlamenckich vybarach. Ju.Chadyka adznačyŭ, što na parlamenckija vybary ŭvosieni možna iści tolki ŭ tym vypadku, kali ŭłady pahodziacca jak minimum na dźvie ŭmovy – udzieł pradstaŭnikoŭ apazycyjnych partyjaŭ u vybarčych kamisijach i vybary častki deputataŭ pa partyjnych śpisach. Pryniaćcie hetych dźviuch umovaŭ harantavała b apazycyi surjoznaje pradstaŭnictva ŭ parlamencie i mahčymaść realna ŭpłyvać na sytuacyju ŭ krainie. Kali hetyja ŭmovy nia buduć vykananyja, apazycyi treba bajkatavać vybary, ličyć kiraŭnictva Partyi BNF.

Alaksiej Znatkievič, BiełaPAN

Kasić "dapamoža" prakuratura

Naprykancy minułaha tydnia kala troch socień kiraŭnikoŭ pradpryjemstvaŭ roznych formaŭ ułasnaści ŭ pracoŭny čas byli vyklikanyja ŭ Pinski vykankam. Namieśnik staršyni Aleś Hordzič začytaŭ telehramu staršyni abłvykankamu Vasila Daŭhalova pra niezadavalnialnyja tempy narychtoŭki karmoŭ i pra nieabchodnaść terminova paskoryć tempy sienakosu. Da ŭžo isnujučych normaŭ Daŭhaloŭ zahadaŭ dadać jašče 20%. Takim čynam, zadańni, jakija na siońniašni dzień vykananyja pradpryjemstvami, tolki na 0,3% pa narychtoŭcy siena i na 35% pa finansavaj dapamozie, vyrašana padvialičyć jašče napałovu.

Kiraŭnikam pradpryjemstvaŭ paviedamili, što kali nieabchodnaja kolkaść siena nia budzie narychtavanaja, dapamahać vykonvać normu budzie prakuratura.

Alaksiej Dzikavicki, Pinsk

Dni i nočy sielskich savietaŭ

Apošni tydzień niešta dziŭnaje tvaryłasia ŭ Malacickim sielsaviecie Kryčaŭskaha rionu. Kałhaśniki dziełavita snavali tudy-siudy, niešta pieranosili, niešta pierakatvali, farbavali płaty ŭzdoŭž centralnych vulic Malacičaŭ dy inšych viosak sielsavietu. Pradaŭcy ŭ kramach terminova padpraŭlali spravazdačnuju dakumentacyju i malavali ceńniki na tavary.

Reč u tym, što Kryčaŭski rajvykankam pastanaviŭ na praciahu hetaha hodu peryjadyčna pravodzić tak zvanyja Dni sielskich savietaŭ. Voś i padyjšła čarha Malacickaha. Na mierapryjemstva źjechalisia ŭsie načalniki adździełaŭ rajvykankamu, staršyni kałhasaŭ, zaprasili navat ludziej z abłvykankamu (ale jany nie pryjechali). V/a staršyni sielsavietu V.Kavaloŭ raskazvaŭ pra pośpiechi haspadarki, častavaŭ chlebam-sollu. Pavodle nieaficyjnaj infarmacyi z Kryčaŭskaha rajvykankamu, na arhanizacyju Dnia sielsavietu vydatkavany 1 miljon rubloŭ. Hrošy nie takija ŭžo vialikija, ale, kali ŭličyć, što zarobki kałhaśnikaŭ vahajucca ŭ miežach 5-7 tysiač…

Darečy, u Malacickaj siaredniaj škole z-za biezhrašoŭja voś užo miesiac niama vady – idzie ramont vadapravodu, vučniaŭ z addalenych viosak nia kormiać, admienieny letni lahier dla školnikaŭ. A lahier – heta adzinaja mahčymaść dla mnohich viaskovych dziaciej prosta pajeści. Z-za žabractva i pitučaści baćkoŭ vialikaja kolkaść dzietak Malacickaha sielsavietu haładaje. Tymčasam šanoŭnyja hości znajomiacca z pośpiechami kałhasnaha ładu...

Andrej Kuźmin, Kryčaŭ

KHB i Sonca Maładzikovaje

Pry TBM Žodzina i Smalavicaha rajonu isnuje Asacyjacyja Demakratyčnych Nastaŭnikaŭ "Sonca Maładzikovaje", jakaja vydaje infarmacyjny biuleteń "Školny vieśnik". U № 1 ad 2000 h. była źmieščanaja infarmacyja pra mety asacyjacyi, pra pryvatny biełaruskamoŭny sadok Smalavičaŭ, pra vandroŭki, śviaty, škoły, pra tradycyi biełarusaŭ.

Paśla vychadu biuletenia supracoŭnik KHB zvaniŭ na miescy pracy aŭtaraŭ materyjałaŭ, ździŭlena pytajučysia ŭ kiraŭnictva: "Jany ŭ vas pracujuć?"

Paśla takoha telefanavańnia ŭ SŠ № 4, dzie pracuje adna aŭtarka, kalehi staranna pieračytvali jaje artykuł, ale nijak nie znachodzili kramoły. Taja prosta apisała vandroŭku ź dziećmi ŭ adnu viosačku, ni bolš, ni mienš.

Dziŭnyja ludzi! KHB treba ž taksama niešta pisać u dakładnych ab pracy.

S.Hiermanovič, Žodzina

Ad suchotaŭ buduć lačyć prymusova

U mahiloŭskim dyspansery dla chvorych na suchoty pačali prymusovaje lačeńnie tych, chto sam nia choča pazbyvacca žachlivaj chvaroby. Navat vyzvalili dla takich 30 admysłovych łožkaŭ. Pry hetych łožkach budzie dyžuravać milicyjant, kab nie źbiahali z dyspanseru. Padobnuju žorstkaść medyčnyja ŭłady tłumačać paharšeńniem ahulnaj sytuacyi z zachvorvańniami na suchoty. Medyki sprabujuć takim čynam spynić biadu. I ŭsio ž zakonnaść padobnaha prymusu vyklikaje vialikija sumnievy.

Symon Hłazštejn, Mahiloŭ

Zamiest turmy – 1000 dalaraŭ

Kryčaŭlanka Maryja Jarkovič vyjhrała sudovy praces u miascovaj milicyi. Hod tamu jaje aryštavali, abvinavaciŭšy ŭ kradziažy majomaści. Pratrymali try miesiacy za kratami, a potym sud z-za niedakazanaj viny vyzvaliŭ jaje adrazu ŭ zali pasiedžańnia. I vyrašyła Maryja Jarkovič, što milicyja musić kampensavać naniesienuju joj škodu, i padała pozvu ŭ sud. Sudździa znajšła, što milicyja sapraŭdy parušyła pravy hramadzianki i pryznačyła 950 tysiač rubloŭ kampensacyi, što ŭ pieraliku składaje amal 1000 dalaraŭ. Vo bahaćcie na ciotku zvaliłasia!

Symon Hłazštejn, Mahiloŭ