Listy ŭ redakcyju
Złačynstva biaz terminu daŭnaści
Žyli my ŭ miastečku ŭ Zachodniaj Biełarusi. Dzieści ŭ piacidziasiatyja hady, jak chadziŭ ja ŭ škołu, niejak u chacie skazaŭ, što viosku Borki spalili niemcy. Tady maja maci raspaviała mnie, što viosku Staražoŭščyna i viosku Borki Ivacevickaha rajonu spalili partyzany.
U Staražoŭščynie svajakoŭ nie było, tamu padrabiaznaściaŭ my nia viedali. U Borkach ža žyła vialikaja siamja rodnaha brata majoj mamy. A na nievialičkim chutary pad Słonimam žyła ich rodnaja siastra. Hetyja partyzany čaściakom zachodzili na chutar i navat pakidali tam paranienych. Tamu i papiaredzili, što kali jość svajaki ŭ Borkach, dyk "chaj uciakajuć!" Ale vajna, šaściora małych dzietak... I siamja zastałasia ŭ Borkach.
"Samaachoŭcy" nie puskali partyzan u viosku ad lesu, dyk tyja ŭvajšli z boku miastečka.
Kali žonka majho dziadźki ŭbačyła, što iduć dva partyzany palić chatu, dyk vyjšła nasustrač: "Chłopčyki, nie palicie chatu, vuń šaściora dzietak u akopčyku siadziać!" Adzin partyzan streliŭ uharu: "Ujdzi, suka!" A druhi jaho papraviŭ: "Raźvie tak b́jut, vot tak b́jut!" Saviecki partyzan zastreliŭ biełaruskuju maci šaściarych dziaciej i spaliŭ ich chatu.
Moža, toj zabojca i ciapier žyvie dy atrymlivaje pryvilei. Ale ž i toje vajennaje złačynstva nia maje terminu daŭnaści.
Mikoła Ciareška, Miensk
Padtrymajem biełaruskamoŭnyja vydańni
Apošnim časam mienšaje nakład biełaruskamoŭnych vydańniaŭ u našaj krainie. Siońnia navat takija demakratyčnyja hazety jak "Narodnaja vola" dy "Naša svaboda" drukujucca na dźviuch movach. I treba zaŭvažyć, što publikacyi na rasiejskaj movie, na žal, pieravažajuć. Tamu my całkam padzialajem žadańnie sapraŭdnaj biełaruskaj hazety "Naša Niva" vychodzić nia prosta pa-biełarusku, a j pavodle klasyčnaha pravapisu, i aburanyja metanakiravanaju palitykaj dziaržaŭnych uładaŭ u źniščeńni hazety tolki za toje, što redakcyja maje sumleńnie praz artykuły svaich aŭtaraŭ dy listy čytačoŭ kazać praŭdu pra sapraŭdnuju Historyju i sučasnaść našaj krainy, pra dziaržaŭnuju palityku vyniščeńnia ŭsiaho biełaruskaha, pra dyskryminacyju ŭ Biełarusi Biełarusa! I heta ŭ toj čas, kali z maŭklivaha błasłavieńnia dziaržavy roznyja kaladziaržaŭnyja struktury (a navat Pravasłaŭnaja Carkva!) biespakarana drukujuć dy raspaŭsiudžvajuć litaraturu fašystoŭskaha źmiestu!
Tamu TBM zaklikaje padtrymać biełaruskamoŭnyja vydańni praz padpisku dy padpisacca na II paŭhodździe adrazu na dźvie demakratyčnyja kulturna-aśvietnickija hazety: "Našu Nivu" i "Naša słova" (hazeta TBM, štotydniovik, indeks 63865/2, košt na 6 mies. – 942 rub.). Tyja ž, chto pryniasie (albo dašle na adras Siadziby TBM, što ŭ Miensku na vuł. Rumiancava, 13, 220005) padpisnyja kvitki na abiedźvie hazety, atrymajuć u jakaści prezentu prystojnuju knižku na biełaruskaj movie.
Biełaruskuju hazetu – kožnaj biełaruskaj siamji!
Sakrataryjat TBM
Razam ź liliPucinym udarym pa Talibanu?
Sustreča ŭ Miensku čatyroch ciubiaciejek, adnoj vušanki dy sp. Alaksandra Łukašenki adkryvaje našym chłopcam bliskučyja perspektyvy vajskovaj karjery ŭ Aŭhanistanie.
Naša vojska jaŭna zastojała, marna jedučy narodnyja charčy dy nažyvajučy proležni na vajskovych łožkach; školnyja vajenruki prahnuć śviežaha vajenna-patryjatyčnaha materyjału. Što ž, BPSM maje pieršačarhovaje prava i pieravažnuju kvotu na novych Hierojaŭ Aŭhanu. Kali BPSM hidzicca pamiešvać hnoj na ŭdarnym žyviołahadoŭčym froncie, chaj pakaža, na što zdatny ich patryjatyzm na frantoch Talibanu. Zaŭvažu tolki, što dziesiaciklaśnikam našaj Dubroŭskaj škoły skazali ŭziać z saboju na vajskovyja zbory praściny i naŭlečki, bo ŭ vajskovaj častcy, kudy zaviazuć našych synoŭ dziela biessensoŭnaje vajskovaje muštry, niama paścielnaj bializny.
Ciapier Śvietłahorskaje RAA dumaje-varožyć, dzie ŭziać 28.000.000 rubloŭ, kab zavieźci padletkaŭ u toj Babrujsk. A ŭ śvietłahorskaj škole № 11, dzie jość vajenna-patryjatyčny kłas, ź junych vajenpatryjotaŭ spraŭna spraŭlajuć try 0,25 minimalnaha zarobku dvojčy na hod, kab zapłacić "kamandziroŭku" trom patryjatyčnym aficeram, što pryjaždžajuć pravodzić testy ź junymi vajenpatryjotami: vajskovaje viedamstva nia maje hrošaj. Što ž, za fanatyčny patryjatyzm treba płacić!
Dla vyjścia z ekanamičnaha kryzysu nam terminova patrebnyja bujnyja trafei. My nia možam čakać miłaściny z Zachadu (dy i ad Uschodu taksama)! Uziać jaje ŭ ich – naša zadača.
P.S. Cikava, jak u chodzie aperacyi my budziem nazyvać maskaloŭ: staršy brat ci starejšy?
A mo lepiej udaryć pa NATO? Tam trafei bolšyja i lepšyja. Aśmielusia prapanavać patryjatyčnuju daktrynu: usio za miežami Biełarusi – našy trafei, usie za miežami Biełarusi – našyja raby. Sprava za małym: pieramožnym anabazysam. I ŭsio ž: ci nie padpadaje plan liliPucina pad kryminalny punkt ab prapahandzie vajny?
Mikoła Busieł, baćka, Dubrova
Słova da "Biełaha Frontu"
Kali ŭ majoj publikacyi "Treciaja sila u Bierasci" ("Naša Niva", №20) jość niedakładnaści, prynošu siabram i lideram "Biełaha Frontu" svaje vybačeńni, ale zaŭvažu, što z majho paviedamleńnia nie vynikaje, što "BF" – strukturnaja adzinka RNIE ci ščylna ź im źnitavanaja struktura. Naadvarot, byŭ zrobleny akcent na samastojnaść abjadnańnia.
Što da prapahandy j dobraha staŭleńnia da biełaruskaje movy, dyk uźnikaje pytańnie – čamu ž ulotki nadrukavanyja na rasiejskaj?
Datyčna lozunhu "White Pride" – pieraprašaju, maje źviestki, vidać, byli niedarečnymi, ale ž hety lozunh uziaty na ŭzbrajeńnie suśvietnaj płyńniu skinhiedaŭ, ci "BF" da jaje siabie nie adnosić? (Tady navošta pisać uva ŭlotkach – "orhanizacija SKINHEAD")?
Pra dziejnaść "Kraju" čuvać, a pra akcyi "BF" isnuje infarmacyjny vakuum. Prapanuju aśviatlać svaje mierapryjemstvy, naprykład, u "NN".
I apošniaje: nijakaj sproby ŭbić klin pamiž "Krajem" i "BF" nie praduhledžvałasia, tamu zyču plonu abiedźvium arhanizacyjam, kali jany na karyść Baćkaŭščynie.
Žyvie Biełaruś!
A.Tyler, Bieraście
Kamientary