Sport
«Zavalili» Valiju
Małafiejeŭ zrabiŭ cud: pieršy raz za 4 hady ŭ aficyjnym turniry naša futbolnaja zbornaja vyjhrała
Staryja znajomcy z Uelsu prylacieli ŭ Biełaruś z drenna prychavanym namieram paŭtaryć letašniuju pieramohu ŭ Miensku (2:1). Tolki zabylisia «čyrvonyja cmoki», što ŭ adnu varonku snarad dvojčy nie traplaje.
Spravu abrazańnia kryłcaŭ latučym pačvarkam pačała našaja futbolnaja moładź (under 21) jašče ŭ piatnicu, kali ŭ Barysavie napchała svaim valijskim adnahodkam pa poŭnaj prahramie — 4:1.
U subotu bolš za 30 000 zaŭziataraŭ, siarod jakich i sotnia fenaŭ z Brytanii, raśsielisia na plastykavych kresłach hałoŭnaha stadyjonu krainy. Biełarusy išli na stadyjon z maraj pra pieršuju pieramohu ŭ aficyjnych turnirach za 4 hady. Bo apošni raz takaja viktoryja zdaryłasia ažno 31 žniŭnia 1996 hodu ŭ matčy z estoncami.
U pieršym tajmie biełarusy nia vykarystali pary zručnych momantaŭ, kab padmačyć reputacyju valijskaha bramnika Poła Džonza. Ale na 40-j chvilinie jon sam pryvioz hoł svajoj kamandzie: nia zdoleŭ zabrać miač paśla zakidu ŭ štrafnuju dy atrymaŭ za karšeń ad Alaksandra Chackieviča – 1:0!
Valija rynułasia ŭ ataku, adnak da kanca tajmu biełaruski bastyjon byŭ nieparušny. Padčas piarervy hałoŭny trener našaj zbornaj Eduard Małafiejeŭ ubiŭ chłopcam u hałovy, što treba zabivać jašče. Na pačatku druhoj pałovy hulni biełarusy abrynuli na haściej škvał atak, vynikam adnoj ź jakich stała druhaja praboina ŭ krejsery «Čyrvony Cmok». Jaje nanios trapnym strełam u kut bramy Valancin Bialkievič. Treci ŭdar pa pazycyjach haściej byŭ naniesieny arbitram, jaki pakinuŭ na poli tolki dziesiać valijcaŭ, dastaŭšy z kišeni čyrvonuju kartku ŭ adkaz na hrubaje parušeńnie praviłaŭ. I ŭsio ž za kolki chvilaŭ da kanca matču Hary Śpid razmačyŭ lik.
Ščaślivym vyćciom tysiačaŭ rodnych harlakoŭ adhuknuŭsia na trybunach finalny śvistok. Tolki zmročnaja fihura Eduarda Małafiejeva adrazu ž źnikła ŭ raspranalni. Vidać, razumieje koŭč, što hulnia biełarusaŭ pakul dalokaja ad toj, što treba pakazać praź miesiac, kab vystajać u matčy z palakami, jakija, miž inšym, rastrybušyli ŭ Kijevie zbornuju «žoŭta-błakitnych» – 3:1. Sapraŭdnuju vartaść našaj kamandy my daviedajemsia paśla kastryčnickaha ispytu ŭ Łodzi.
Bohuś Bijatlanionak
Ciapier čytajuć
Kaleśnikava: Łukašenka moža pajści na spynieńnie represij dziela budučyni i «ź niejkaj mudraści»27
Kaleśnikava: Łukašenka moža pajści na spynieńnie represij dziela budučyni i «ź niejkaj mudraści»
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary