Tydzień našaha žyćcia

 Tydzień našaha žyćcia

Niama vybaru, aproč bajkotu

Vybarčyja kamisii adsiejali amal usich niezaležnickich kandydataŭ

Stratehija bajkotu vybaraŭ akazałasia słušnaja. Ułady nie źbirajucca navat rabić vyhlad, što vybary roŭnyja i spraviadlivyja. Z prykładna 60 kandydataŭ, jakija stajali na placformie niezaležnaści i demakratyi, vybarčyja kamisii zarehistravali mieniej za 10. Pryčym siarod hetych 10 “pravieranych bajcoŭ” — tolki dvoje: M.Statkievič i M.Čyhir. Ale ciapier i tyja ŭžo nie vyklučajuć svajho vychadu ź biessensoŭnaj honki. Ułady staranna adsiejvali ŭsich tych, chto moh by ŭ budučym parlamencie vystupić u abaronu niezaležnaści: “zarezali” H.Hrušavoha, Ju.Čyhir, H.Pahaniajłu, N.Stužynskuju, Ju.Zujeva, U.Laŭkoviča, M.Złotnikava, T.Vaninu. “Nie prapuścili” praflideraŭ Hančaryka i Buchvostava. Zaharadzili darohu i pamiarkoŭnym eks-siabram łukašenkaŭskaj kamandy, što syšli ŭ adstaŭku.

Cikava, što “nie prapuścili” nivodnaha z tych dziejačaŭ, chto kali-kolviek uvachodziŭ u BNF. U toj ža čas liberał-demakraty j kamunisty, choć jany j nia mienš hołasna deklarujuć svaje pretenzii na ŭładu, amal biaz strataŭ prajšli hety etap vybarčaj honki. Jak i “iabłyčniki” Abramava j Fiaduta. Adsiavali nie “apazycyjaneraŭ”, adsiavali “niezaležnikaŭ”. Heta pra mnohaje śviedčyć. V.Šłyndzikaŭ, adzin ź lideraŭ AHP, jaki mieŭ niehałosna kaardynavać vybarčuju kampaniju demakratyčnych kandydataŭ, nia moh nie pryznać: “Nie zastajecca inšaha vybaru, jak dałučycca da bajkotu”. Pad jahonymi słovami ciapier možam padpisacca my ŭsie. Tyja, kamu darahaja niezaležnaść.

Na pačatku tydnia ŭłady aryštavali tyraž hazety “Rabočy” z zaklikam da bajkotu vybaraŭ. Kaniec tydnia adznačyŭsia taksama šmatlikimi zatrymańniami aktyvistaŭ apazycyi, što raspačali kampaniju aktyŭnaha bajkotu ŭ Miensku.

Treba dumać, vybarčaja ciahanina na hetym nia skončycca. Siamu-tamu chočacca prymusić apazycyjaneraŭ, pryčaravanych vidziežaj ułady, paŭźci da jaje na kaleniach. Tamu Centravybarkam urešcie zarehistruje, skažam, 9 sacyjał-demakrataŭ z 16... Hulacca z myškaj buduć doŭha.

Uva ŭsioj krainie tymčasam paadkryvali rachunki dla zboru dapamohi siemjam marakoŭ rasiejskaha padvodnaha čaŭna “Kursk”. Jaki cynizm! Na “Kursku” vypraboŭvali novuju śmiertanosnuju zbroju. Ekipaž submaryny, prynamsi kamandziry i pradstaŭniki vajennych zavodaŭ, što prysutničali na puskach tarpiedaŭ, viedali, na što iduć. Zbroja akazałasia niajakasnaja, i padłodku razarvała. Novaje pakaleńnie rasiejskaj zbroi maje być skiravana suprać inšych krainaŭ, asobnyja jaje vidy — i suprać Biełarusi taksama. I biełarusaŭ ža ahitujuć płacić za vyprabavańni ŭłasnaje śmierci. “Ty kryknuć nia možaš “Ratujcie”... Karespandenty “NN” pieradajuć z Połacku j Astraŭca, što hrošaj na tamtejšyja rachunki jašče nie pastupała.

B.T.