Тыдзень нашага жыцьця

 Тыдзень нашага жыцьця

Няма выбару, апроч байкоту

Выбарчыя камісіі адсеялі амаль усіх незалежніцкіх кандыдатаў

Стратэгія байкоту выбараў аказалася слушная. Улады не зьбіраюцца нават рабіць выгляд, што выбары роўныя і справядлівыя. З прыкладна 60 кандыдатаў, якія стаялі на пляцформе незалежнасьці і дэмакратыі, выбарчыя камісіі зарэгістравалі меней за 10. Прычым сярод гэтых 10 “правераных байцоў” — толькі двое: М.Статкевіч і М.Чыгір. Але цяпер і тыя ўжо не выключаюць свайго выхаду зь бессэнсоўнай гонкі. Улады старанна адсейвалі ўсіх тых, хто мог бы ў будучым парлямэнце выступіць у абарону незалежнасьці: “зарэзалі” Г.Грушавога, Ю.Чыгір, Г.Паганяйлу, Н.Стужынскую, Ю.Зуева, У.Ляўковіча, М.Злотнікава, Т.Ваніну. “Не прапусьцілі” прафлідэраў Ганчарыка і Бухвостава. Загарадзілі дарогу і памяркоўным экс-сябрам лукашэнкаўскай каманды, што сышлі ў адстаўку.

Цікава, што “не прапусьцілі” ніводнага з тых дзеячаў, хто калі-кольвек уваходзіў у БНФ. У той жа час лібэрал-дэмакраты й камуністы, хоць яны й ня менш голасна дэкляруюць свае прэтэнзіі на ўладу, амаль бяз стратаў прайшлі гэты этап выбарчай гонкі. Як і “яблычнікі” Абрамава й Фядута. Адсявалі не “апазыцыянэраў”, адсявалі “незалежнікаў”. Гэта пра многае сьведчыць. В.Шлындзікаў, адзін зь лідэраў АГП, які меў негалосна каардынаваць выбарчую кампанію дэмакратычных кандыдатаў, ня мог не прызнаць: “Не застаецца іншага выбару, як далучыцца да байкоту”. Пад ягонымі словамі цяпер можам падпісацца мы ўсе. Тыя, каму дарагая незалежнасьць.

На пачатку тыдня ўлады арыштавалі тыраж газэты “Рабочы” з заклікам да байкоту выбараў. Канец тыдня адзначыўся таксама шматлікімі затрыманьнямі актывістаў апазыцыі, што распачалі кампанію актыўнага байкоту ў Менску.

Трэба думаць, выбарчая цяганіна на гэтым ня скончыцца. Сяму-таму хочацца прымусіць апазыцыянэраў, прычараваных відзежай улады, паўзьці да яе на каленях. Таму Цэнтравыбаркам урэшце зарэгіструе, скажам, 9 сацыял-дэмакратаў з 16... Гуляцца з мышкай будуць доўга.

Ува ўсёй краіне тымчасам паадкрывалі рахункі для збору дапамогі сем’ям маракоў расейскага падводнага чаўна “Курск”. Які цынізм! На “Курску” выпрабоўвалі новую сьмертаносную зброю. Экіпаж субмарыны, прынамсі камандзіры і прадстаўнікі ваенных заводаў, што прысутнічалі на пусках тарпедаў, ведалі, на што ідуць. Зброя аказалася няякасная, і падлодку разарвала. Новае пакаленьне расейскай зброі мае быць скіравана супраць іншых краінаў, асобныя яе віды — і супраць Беларусі таксама. І беларусаў жа агітуюць плаціць за выпрабаваньні ўласнае сьмерці. “Ты крыкнуць ня можаш “Ратуйце”... Карэспандэнты “НН” перадаюць з Полацку й Астраўца, што грошай на тамтэйшыя рахункі яшчэ не паступала.

Б.Т.