Jak skasavać biełaruska-rasiejski sajuz?

Jak skasavać biełaruska-rasiejski sajuz?

Sajuz z Rasiejaj nia viečny. Ci praduhledžvajuć zaklučanyja ŭradami Łukašenki damoŭlenaści jurydyčnyja pracedury jahonaha skasavańnia?

Pieršy intehracyjny dakument – damova ab utvareńni supolnaści Biełarusi i Rasiei – byŭ padpisany 6 hod tamu, mieŭ čysta prapahandyscki charaktar i nie ŭstaloŭvaŭ nijakich uzajemnych abaviazacielstvaŭ. Tamu, choć jon i byŭ ratyfikavany zakonnym Viarchoŭnym Savietam, jaho spynieńnie naŭrad ci spatrebicca.

Padpisanaja praz hod damova ab sajuzie Biełarusi i Rasiei ŭžo bolš hruntoŭna vyznačała strukturu novaŭtvareńnia. Kab jaje skasavać, tre było, pavodle dakumentu, u piśmovym vyhladzie paviedamić ab hetym druhuju dziaržavu-ŭdzielnicu. U dakumencie ŭpieršyniu ŭźnikajuć časavyja terminy: paviedamlać ab vychadzie nieabchodna za 12 miesiacaŭ. Značna bolš uskładniaje skasavańnie damoŭlenaściaŭ akt ab utvareńni sajuznaj dziaržavy Biełarusi i Rasiei, padpisany ŭ śniežni 1999 h. Kab vyjści z sajuzu, nieabchodny ŭžo referendum, pryčym damova pierastaje dziejničać tolki praz 18 miesiacaŭ paśla jaho. Miž tym, sajuznyja zakony i dekrety abaviazkovyja da vykanańnia i ŭ hety čas. Navat kali ŭźniknuć supiarečnaści pamiž sajuznym i nacyjanalnym zakanadaŭstvami, pieravaha budzie na baku pieršaha.

U vypadku pieramohi apazycyi na prezydenckich vybarach skasavać sajuznuju damovu było b vielmi prosta: Łukašenka padpisvaŭ jaje ŭžo paśla skančeńnia, u adpaviednaści z kanstytucyjaj 1994 h., svajho terminu.

Ciapier ža aktyŭna rychtujecca kanstytucyjny akt, pryniaćcie jakoha paśla referendumu vykliča źmieny ŭ kanstytucyi. Adpaviedna, apošnija sajuznyja damoŭlenaści možna budzie skasavać taksama tolki praz praceduru ŭniasieńnia źmienaŭ u kanstytucyju, h.zn. praz Kanstytucyjny sud. Pra nieabchodnaść hetaha kaža i były sudździa kanstytucyjnaha sudu Michaił Pastuchoŭ: “Ciapierašnija sajuznyja damoŭlenaści praduhledžvajuć vychad z sajuzu tolki praz paŭtara hodu paśla referendumu, kali za heta prahałasuje bolšaja častka nasielnictva. Pytańnie ab skasavańni sajuźnickich adnosinaŭ uvachodzić u kampetencyju Kanstytucyjnaha sudu. Jano vyrašycca stanoŭča, kali budzie pryznana, što sajuznyja damovy nia ciahnuć nijakich abaviazacielstvaŭ u adnosinach da biełaruskaha narodu. Adnak dla pačatku takoj pracedury nieabchodna viarnuć Kanstytucyju 1994 h. ci pryniać novuju. Pavinny adbycca novyja prezydenckija, parlamenckija vybary. Biaz hetaha raźličvać na vychad z sajuznaj dziaržavy nie davodzicca. Pravieści referendum paprostu nierealna”.

V.P.