Chto zamienić Navickaha?

analityka

Chto zamienić Navickaha?

Siońnia našy specyjalna naniatyja analityki razvažajuć pra toje, chto stanie novym premjer-ministram Biełarusi i što b mahła značyć zajava Pucina pra biełaruska-rasiejski sajuz. U dyskusii biaruć udzieł urač-futurolah Fiadupa, Zmahar niabačnaha frontu, viadomy žurnalist Tykubovič, apazycyjny palityk Łabećka i štatny analityk Kaladop.

Fiadupa: Heta ŭ jelcynskija časy za adzin pacałunak možna było hadavuju pradukcyju MTZ zbyć, a Pucina katletami nie karmi. Tamu adzinaj mahčymaściu vyjści z hetaj sytuacyi j adkłaści choć na niejki čas vialikuju porku dla Haranta Kanstytucyi źjaŭlajecca źmiena ŭradu. Ja dumaju, što idealnaj kandydaturaj na post novaha premjer-ministra byŭ by daśviedčany palityk, metrabudaŭnik Michał Marynič, jaki dniami zaklikaŭ abodvuch Harantaŭ nie dyskredytavać ideju bractva narodaŭ, a zrabić lepiej akcent na ekanamičnym pakaźniku — kab hramadzianie adčuli kankretnyja vyniki supracoŭnictva. Bo nadyšoŭ čas płacić pa rachunku!

Zmahar: Usio, što vy kažacie, a dakładniej, Vašymi vusnami kažuć specsłužby, — heta demahohija, raźličanaja na babku Teklu, jakaja vymiraje ad abniščańnia i tupika. Pucinu niedaspadoby pierš za ŭsio idealahičnaje šałupińnie biełaruskaha kiraŭnictva — słavianskaja rytoryka, vajna z movaj, admiena dziaržaŭnaje symboliki, razhon demanstracyjaŭ, sajuz z Rasiejaj… A heta źmienaj premjera nia vyrašyš!

Łabećka: Marynič? Dy vy što! Užo adzin toj fakt, što ŭ časie vieraśnioŭskich vybaraŭ jon byŭ z nami, całkam dyskredytuje jaho! U vačoch prezydenta, ja chacieŭ skazać. Navat maja kandydatura vyhladaje tut bolš pryvabna: ja ž nia lez za mandatam, jak hoły ŭ krapivu. Tym bolš, pryznajusia, što maju ŭłasnuju pazycyju i svoj pohlad na intehracyjny praces i pry najaŭnaści peŭnych prapanovaŭ moh by ŭznačalić…

Zmahar: Vy siabie ŭ lusterka bačyli? Vy čarapy svaje mierali? Sapraŭdnym biełaruskim premjeram moža stać tolki etničny biełarus bałta-słavianskaj rasy kryŭska-lićvinskaj mentalnaści, jaki budzie viedać na pamiać usie biełaruskija hramatyki j radavod vialikich kniazioŭ litoŭskich! Dyj jak moža antykanstytucyjnaja ŭłada abirać premjer-ministraŭ? Prapanuju zładzić vybary pad mižnarodnym pratektaratam!

Kaladop: Pavodle infarmacyi z daśviedčanych krynic, novym premjeram maje šancy stać čałaviek, jaki bačyć našuju sytuacyju z adlehłaści. Nievypadkova ŭ Biełaruś pryjaždžaje Barys Jelcyn — čałaviek z kalasalnym palityčnym i žyćciovym dośviedam, blizki siabar prezydenta Łukašenki. Jany mahli b utvaryć mocnuju kamandu i kanstruktyŭna…

Tykubovič: Kalehi, treba pamiatać, što rasiejskaha prezydenta atačajuć miryjady parkietnych i padparkietnych analitykaŭ, što kosiacca na hieahrafičnuju mapu, dzie Ruś vyhladaje bolš maštabna, čym Biełaruś. Jany rehularna padsoŭvajuć Pucinu niepravieranuju infarmacyju, a jon i vystupaje… Nie da kanca, vidać, uśviedamlaje histaryčnuju adkaznaść za kožny krok na šlachu intehracyi. Ale ŭ lubym razie, prava vybaru — za Harantam Kanstytucyi, jaki zaŭždy na dzień chutčejšy za nas usich. Nie sumniajusia, što pry tym premjeru, jakoha abiare jon, biełarusy j nadalej zmohuć jeździć pa spravach u Maskvu i Chanty-Mansijsk dy nie adčuvać siabie za miažoj.

Zmahar: Ale čerap jamu pamierać usio ž nie zaškodziła b!