Eŭropa hipermarkietaŭ

Eŭropa hipermarkietaŭ

Jakaja roźnica pamiž žycharami Eŭraźviazu i Biełarusi? Z boku haspadarlivaści my ź imi adnolkavyja! Aščadžajem, jedziem za blizki śviet, kab nabyć jakuju reč tańniej. Časam navat vypraŭlajemsia ŭ inšuju krainu z hetkaj patrebaj. Adno što biełarusy ŭ svaich “šop-turach” abmiežavanyja Polščaj i Litvoj, a eŭrapiejcy, uzbrojenyja šenhienskaj vizaj, vandrujuć pa ŭsioj Eŭropie. Biełarusy nielehalna viazuć u Polšču alkahol, a za Buham kuplajuć tannuju ježu, vopratku, budmateryjały. Žychary Eŭraźviazu biaruć u padarožža pa susiednich krainach tolki hrošy. Zajmacca drobnaj spekulacyjaj im niavyhadna. Atrymanyja hrošy nie apraŭdvajuć zatračanaha času. A voś pa supermarkietach eŭrapiejcy taksama švendajucca — što b takoje nabyć tańniej, čym doma.

Ceny na adnolkavyja tavary roźniacca ŭ krainach EZ na niekalki dziasiatkaŭ pracentaŭ. Tamu ŭ vychodnyja eŭrapiejskija hipermarkiety poŭnyja zamiežnikaŭ, što pryjechali nabyć štości zanadta darahoje na radzimie.

Bolšaść biełarusaŭ pakul i snom nia śniła hetkich vandrovak u Zachodniuju Eŭropu. Chiba žychary pamiežža z Polščaj raz na miesiac trasucca ŭ vahonach-“śpirtavozach”, kab paśla zaskočyć u pieršuju-lepšuju polskuju kramu ci na kirmaš dy napakavacca tannymi vyrabami.

Praŭda, dalej Bieł-Padlaski pohlad našych suajčyńnikaŭ nie siahaje.

A voś admysłova dla rasiejcaŭ u roznych miescach Eŭropy, niedaloka ad aeraportaŭ, nabudavali asobnych hipermarkietaŭ. Rasiejcy čarternymi rejsami prylatajuć siudy na dzień i pakidajuć Eŭropie tysiačy dalaraŭ. Asablivym popytam karystajucca znakamityja džynsy pa 7 eŭra, mužčynskija kašuli pa 2,5 eŭra i pinžaki pa 70. Eŭrapiejskija tavary, jakija kaštujuć bolš za 175 eŭra, u Polščy abkładajucca 22-pracentnym padatkam (PDV). A my ciahajemsia tudy pa hetkuju darahoŭlu!

Čym dalej na ŭschod, tym vyšejšyja ceny na vopratku, bižuteryju, dobruju parfumu. Tak, 100 mł tualetnaj vady “Opijum” u Polščy kaštuje 110 eŭra, a ŭ Dublinie — usiaho 73! Mabilniki najtańniejšyja ŭ Amsterdamie.

Ale eŭrapiejcaŭ adlehłaści nie pałochajuć: vandroŭka pa tannyja tavary časam akuplajecca ŭžo na zapraŭcy susiedniaj krainy. Tak, u Hrecyi benzyn kaštuje tolki 68 centaŭ. Italjancy płaciać za jaho na 31 cent bolš. Ale najbližejšy šlach u Eladu — praz mora. A to b šarahovy italjaniec moh aščadzić na 60-litrovym baku cełych 18,6 eŭra. A tyja, što žyvuć na poŭnačy Italii, štodzień stajać u čerhach na švajcarskich i aŭstryjskich zapraŭkach. Napampoŭvajučy napoŭnicu bak žaleznaha kania, jany chavajuć ad žonak sumlenna zekanomlenyja 20—30 eŭra. Vysokija ceny na paliva i ŭ niemcaŭ, jakija zapraŭlajucca na luksemburskich, polskich ci aŭstryjskich stancyjach. Miž tym, francuskija kiroŭcy kuplajuć paliva na čverć tańniej, čym luksemburžcy ci hišpancy. Najbolš nie pašancavała halandcam, u jakich samy darahi benzyn.

Francuzy jeduć u Italiju pa tannaje vino, voziać dziaciej u tamtejšyja Makdonaldzy, pa darozie kuplajučy amal darmavy abutak. Ź Niamieččyny jany ciahnuć ZVČ-plity (škada, što im dalekavata da Ždanovičaŭ) i elektryčnyja prybory.

Piva tannaje ŭ Niamieččynie. Takaja samaja blašanačka ŭ Finlandyi kaštuje ŭ 5 razoŭ daražej! A voś minerałku niemiec, niahledziačy na śpiakotu, nabudzie ŭ Luksemburhu: schapiŭ skrynku, a zapłaciŭ napałovu mienš, čym doma.

Aŭstryjcy nabivajuć bahažniki vinom, mučnymi vyrabami, vopratkaj i abutkam, kali padarožničajuć pa Italii. I dla belhijcaŭ trapić tudy — mara žyćcia: tekstyl i abutak tańniejšyja na 30—300%! Ale, u adroźnieńnie ad sumiežnych ź Italijaj francuzaŭ i aŭstryjcaŭ, belhijcy mohuć nabyvać hetyja tannyja rečy tolki padčas turystyčnych badziańniaŭ — štodnia jeździć dalekavata. Praŭda, i ŭ blizkim Luksemburhu cyharety, piva j harodnina tańniejšyja. Pamidory tam kaštujuć u siarednim u 2,5 razu mienš, čym u Niamieččynie ci Belhii.

Najhorš žycharam Skandynavii, Irlandyi dy Vialikaj Brytanii. Da kantynentu dalekavata, i złosnyja kramniki karystajucca hetym dy dziaruć try skury za ŭsialakuju drabiazu. Tolki j zastajecca narvežcam, što telefanavać adzin druhomu i žalicca, bo majuć samyja nizkija taryfy. U švedaŭ najtańniejšyja ŭ Eŭropie cytrusavyja.

U Irlandyi pačak “Malbara” kaštuje 5 eŭra, u Anhlii — 7, u toj čas jak partuhalec moža nabyć sabie hetaje atruty ŭsiaho za 2 eŭra. Za 0,5 kh kavy na Zialonaj vyśpie vykładajuć 8, a chitravatyja hišpancy — tolki 2,7 eŭra.

Francuskija aŭto tańniejšyja ŭ Hišpanii j Hrecyi, čym na radzimie — takaja cenavaja palityka vytvorcaŭ. Niemcy taksama šukajuć rodnyja miłyja sercu madeli za miažoj.

U krainach EZ ceny na adnolkavyja tavary mohuć roźnicca na 40%. Heta vyklikaje šmatlikija pierasialeńni. Italjancam tańniej kupić žytło ŭ Francyi. Pamiežny horad Mentona ŭžo amal całkam “adabrany” ŭ francuzaŭ, tysiačy italjancaŭ žyvuć u Nicy i navakolnych miastečkach. Niemcy ž pacichu pierajaždžajuć u Hišpaniju — pahreć kostki pad ciopłym soncam na svajoj vile na marskim uźbiarežžy.

Čechi na pamiežžy ź Niamieččynaj nabudavali bolš za 2 tysiačy kirmašoŭ, dzie sprytna handlujuć alkaholem, kampakt-dyskami dy kamputarnym načyńniem. Byvajuć dni, kali niamieckija pamiežniki vypuskajuć 40 tys. svaich suajčyńnikaŭ u českuju viosku Potucky, dzie žyvie 250 žycharoŭ. Niamieckaje Ministerstva charčavańnia, pravioŭšy analiz českaha alkaholu, vyśvietliła, što ŭ 89% vypadkaŭ kuplenaja harełka i kańjaki — padrobnyja. Ale niemcy na heta nie asabliva zvažajuć, bo litar taje harełki, romu, šampanskaha ci jakoha absentu sa ślivavicaj kaštuje na kolki mazalom zaroblenych eŭra tańniej.

Rusłan Raviaka, Arkadź Šanski

Vykarystana statystyka tydniovika “Wprost”